Zelio Electric : సింగిల్ ఛార్జ్ తో 100కిమీ.. మొబైల్ ఫోన్ కంటే తక్కువ ధరకే ఎలక్ట్రిక్ స్కూటర్

Zelio Electric : ఎలక్ట్రిక్ వాహనాలకు పెరుగుతున్న డిమాండ్ నేపథ్యంలో భారత మార్కెట్లోకి కొత్తకొత్త ఎలక్ట్రిక్ స్కూటర్లు వస్తున్నాయి. ఈ క్రమంలో దేశంలోనే అత్యంత చవకైన ఎలక్ట్రిక్ స్కూటర్ అయిన నైట్+ను జెలియో ఎలక్ట్రిక్ అనే స్టార్టప్ లాంచ్ చేసింది. తక్కువ ధరలో మంచి ఫీచర్స్ కావాలనుకునే వారికి ఈ స్కూటర్ ఒక మంచి ఆప్షన్. జెలియో ఎలక్ట్రిక్ తమ కొత్త నైట్+ ఎలక్ట్రిక్ స్కూటర్‌ను రూ.59,990 (ఎక్స్-షోరూమ్) ధరతో భారత మార్కెట్‌లో విడుదల చేసింది. ఇప్పటివరకు మీడియం రేంజ్, ఖరీదైన స్కూటర్లలో మాత్రమే కనిపించిన స్మార్ట్ ఫీచర్లు ఈ బడ్జెట్ స్కూటర్‌లో అందుబాటులో ఉన్నాయని కంపెనీ పేర్కొంది. ముఖ్యంగా తక్కువ బడ్జెట్‌లో మంచి పనితీరు, ఫీచర్లను కోరుకునేవారిని దృష్టిలో ఉంచుకొని ఈ స్కూటర్‌ను రూపొందించారు.

నైట్+ స్కూటర్ చాలా ఆకర్షణీయమైన ఫీచర్లతో వస్తుంది. హిల్ హోల్డ్ కంట్రోల్, క్రూయిజ్ కంట్రోల్ , ఫాలో-మి-హోమ్ హెడ్‌ల్యాంప్స్ , USB ఛార్జింగ్ పోర్ట్, రిమూవబుల్ బ్యాటరీ వంటి ఫీచర్లు ఉన్నాయి. ఈ స్కూటర్‌లో 1.8kWh రిమూవబుల్ LFP బ్యాటరీ ఉంది. ఇది ఒక్కసారి పూర్తి ఛార్జ్ చేస్తే 100 కి.మీ రేంజ్ ఇస్తుందని కంపెనీ పేర్కొంది. దీని గరిష్ట వేగం గంటకు 55 కి.మీ. ఈ స్కూటర్ బుకింగ్‌లు దేశవ్యాప్తంగా ఉన్న జెలియో ఎలక్ట్రిక్ డీలర్‌షిప్‌లలో ఇప్పటికే మొదలయ్యాయి. స్కూటర్ డెలివరీలు ఆగస్టు 20, 2025 నుంచి ప్రారంభమవుతాయి.

నైట్+ స్కూటర్ మొత్తం 6 రంగులలో అందుబాటులో ఉంది. గ్లోసీ వైట్, గ్లోసీ బ్లాక్ వంటి సింగిల్ టోన్ రంగుల్లోనూ, మ్యాట్ బ్లూ & వైట్, మ్యాట్ రెడ్ & వైట్, మ్యాట్ యెల్లో & వైట్, మ్యాట్ గ్రే & వైట్ వంటి డ్యూయల్ టోన్ రంగుల్లో లభిస్తుంది. జెలియో ఎలక్ట్రిక్ సహ-వ్యవస్థాపకుడు ముకుంద్ బహేతీ మాట్లాడుతూ.. "నైట్+ అనేది ఒక స్కూటర్ మాత్రమే కాదు. తక్కువ ధరలో మంచి ఫీచర్లున్న ఎలక్ట్రిక్ వాహనాలను అందరికీ అందించాలనే మా లక్ష్యంలో ఇది ఒక భాగం. రూ.59,990 ధరతో, ఇది దాని సెగ్మెంట్‌లో అత్యుత్తమ ఎలక్ట్రిక్ స్కూటర్" అని చెప్పారు.