జాతీయ రహదారులపై కొత్త టోల్‌ విధానం
New toll system to simplify travel on national highways and expressways
కేంద్ర ప్రభుత్వం జాతీయ రహదారులు, ఎక్స్‌ప్రెస్‌వేలపై ప్రయాణాన్ని సరళీకృతం చేసేందుకు కొత్త టోల్‌ విధానంపై కసరత్తు చేస్తోంది. హైవేలపై ట్రాఫిక్‌ జామ్‌ కాకుండా టోల్‌ వసూలు విషయంలో అనేక సంస్కరణలు తీసుకువస్తోంది. శాటిలైట్‌ ఆధారిత టోల్‌ వసూలుకు కూడా ప్రయత్నాలు చేస్తోంది. ఈ క్రమంలో మరో వినూత్న విధానం అందుబాటులోకి తెచ్చింది. దేశవ్యాప్తంగా జాతీయ రహదారులు, ఎక్స్‌ప్రెస్‌వేలు, రాష్ట్ర ఎక్స్‌ప్రెస్‌వేలపై అపరిమితంగా ప్రయాణించేందుకు కేంద్రం కొత్త విధానం అందుబాటులోకి తెచ్చింది. ఈ విధానం కింద, వాహనదారులు వార్షికంగా 3 వేల రూపాయలు చెల్లించి ఏడాదిపాటు టోల్‌ చెల్లించకుండా ప్రయాణం చేయవచ్చు. ప్రతి టోల్‌ గేట్‌ వద్ద విడిగా ఫీజు చెల్లించాల్సిన అవసరం లేకుండా... వాహనదారులకు సమయం, ఖర్చు ఆదా చేస్తుంది.
ప్రస్తుత ఫాస్ట్‌ట్యాగ్‌ వ్యవస్థతో ఈ ప్యాకేజీ అనుసంధానం అవుతుంది, కాబట్టి అదనపు డాక్యుమెంట్లు అవసరం లేదు. ఫాస్ట్‌ట్యాగ్‌ను రీఛార్జ్‌ చేయడం ద్వారా ఈ సౌలభ్యాన్ని పొందవచ్చు. ఈ విధానం దీర్ఘకాలిక ప్రయాణికులు, వ్యాపారవేత్తలకు ఆర్థికంగా లాభదాయకంగా ఉంటుందని నిపుణులు అభిప్రాయపడుతున్నారు. వార్షిక ప్యాకేజీతోపాటు, దూరం ఆధారిత టోల్‌ విధానం కూడా ప్రవేశపెట్టనుంది. ఈ విధానంలో, 100 కిలోమీటర్ల దూరానికి 50 రూపాయలు చెల్లిస్తే సరిపోతుంది. స్థానికంగా తరచూ ప్రయాణించే వాహనదారులు, చిన్న వ్యాపారులు ఈ ఎంపికతో ఆర్థిక భారం తగ్గించుకోవచ్చు. ఈ విధానం టోల్‌ చెల్లింపుల్లో పారదర్శకతను పెంచడమే కాక, టోల్‌ గేట్ల వద్ద రద్దీని తగ్గించడానికి దోహదపడుతుంది.
గతంలో ప్రతిపాదిత 30 వేల రూపాయలతో 15 ఏళ్లపాటు అపరిమిత ప్రయాణం అనే జీవితకాల ఫాస్ట్‌ట్యాగ్‌ ఆలోచనను ప్రభుత్వం విరమించుకుంది. దీనిని అమలు చేసే అవకాశం లేదని తెలుస్తోంది.ఈ కొత్త టోల్‌ విధానం జాతీయ రహదారులపై ట్రాఫిక్‌ జామ్‌లను తగ్గించి, డిజిటల్‌ చెల్లింపుల వినియోగాన్ని పెంచుతుందని అధికారులు ఆశిస్తున్నారు. ఫాస్ట్‌ట్యాగ్‌ వ్యవస్థ ద్వారా టోల్‌ సేకరణ సులభతరం కావడంతో, రహదారి నిర్వహణ, మౌలిక సదుపాయాల అభివృద్ధికి నిధులు సమకూరుతాయి. ఈ పథకం రాష్ట్రాల సమన్వయంతో త్వరలో అమలులోకి రానుంది, ఇది విజయవంతమైతే రాష్ట్ర రహదారులకు కూడా విస్తరించే అవకాశం ఉంది. ఈ విధానం వాహనదారులకు ఆర్థిక సౌలభ్యం కల్పించడమే కాక, రహదారి రవాణా వ్యవస్థను మరింత సమర్థవంతంగా మారుస్తుందని నిపుణుల అంచనా. ఈ పథకం అమలులో సాంకేతిక సమస్యలు, రాష్ట్రాల మధ్య సమన్వయం వంటి సవాళ్లను అధిగమించాల్సి ఉంటుంది.
