GST : సిగరెట్లపై 40% జీఎస్టీ.. అదనపు పన్నులు కూడా ఉంటాయా? రాష్ట్రాలకు నష్టమా?

GST : సిగరెట్లు, ఇతర పొగాకు ఉత్పత్తులను 40% జీఎస్టీ పరిధిలోకి తీసుకురావడం వల్ల రాష్ట్ర ప్రభుత్వాలకు వచ్చే ఆదాయ నష్టాన్ని భర్తీ చేయడానికి కేంద్ర ప్రభుత్వం ఒక మార్గాన్ని కనుగొంది. నివేదికల ప్రకారం.. ఈ వస్తువులపై జీఎస్టీతో పాటు అదనపు పన్నులను విధించి, ఆ మొత్తాన్ని రాష్ట్రాలకు పంపిణీ చేయాలని కేంద్రం యోచిస్తోంది. గతంలో కూడా ఇదే విధమైన వ్యవస్థ ఉండేది. పొగాకు, ఇతర సిన్ గూడ్స్ పై 28% జీఎస్టీ, అదనపు కాంపెన్సేషన్ సెస్ విధించారు. అవన్నీ కలిపి సిగరెట్లు, ఇతర ఉత్పత్తులపై పన్ను 50% నుంచి 90% వరకు ఉండేది. ఇప్పుడు 40% జీఎస్టీతో పాటు మొత్తం పన్ను 52-88% వరకు ఉండేలా అదనపు పన్నులను నిర్ణయించడానికి ప్రభుత్వం సిద్ధమవుతోంది.

ఈ వ్యవస్థ శాశ్వతంగా ఉండదు. జీఎస్టీ పరిధిలోకి సిగరెట్లను తీసుకురావడం వల్ల వచ్చిన నష్టాన్ని భర్తీ చేయడానికి రాష్ట్రాలు తీసుకున్న అప్పు తీరే వరకు ఈ కాంపెన్సేషన్ సెస్ ఉంటుంది. దశలవారీగా ఈ సెస్​ను తగ్గించి, చివరికి పూర్తిగా తొలగిస్తారని మనీకంట్రోల్ వెబ్‌సైట్ నివేదించింది. కొత్త జీఎస్టీ సిస్టంలో నాలుగు పన్నుల శ్లాబులకు బదులుగా కేవలం రెండు శ్లాబులను మాత్రమే ఉంచారు. అవి 5%, 18%. దీనితో పాటు సిగరెట్లు వంటి ఆరోగ్యానికి హానికరమైన వస్తువులు, లగ్జరీ వస్తువులను సిన్ గూడ్స్ గా వర్గీకరించి, వాటికి ప్రత్యేక పన్ను శ్లాబును కేటాయించారు. వాటిపై 40% జీఎస్టీ ఉంటుంది.

గతంలో ఈ సిన్ గూడ్స్ పై 28% జీఎస్టీ ఉండేది. దానితో పాటు అదనపు సెస్​లు కూడా విధించేవారు. 2017లో జీఎస్టీ అమలులోకి రాకముందు రాష్ట్ర ప్రభుత్వాలు సిగరెట్లు, ఇతర ఉత్పత్తులపై వేర్వేరు పన్నులు విధించేవి. జీఎస్టీ వచ్చిన తర్వాత పన్నును 28%గా నిర్ణయించారు. దీనివల్ల రాష్ట్ర ప్రభుత్వాలకు పన్నుల ఆదాయం తగ్గుతున్నందున, దాన్ని భర్తీ చేయడానికి కాంపెన్సేషన్ సెస్ను చేర్చారు. ఈ సెస్ నుంచి వచ్చే ఆదాయాన్ని నిల్వ చేసి, రాష్ట్రాలకు తిరిగి పంపిణీ చేసేవారు. ఈ విధంగా రాష్ట్ర ప్రభుత్వాల ఆదాయ నష్టాన్ని భర్తీ చేయడం సాధ్యమవుతుంది.

ఇప్పుడు కేంద్ర ప్రభుత్వం సిగరెట్లపై జీఎస్టీని 28% నుంచి 40%కి పెంచింది. అదే సమయంలో, కాంపెన్సేషన్ సెస్​ను పూర్తిగా తొలగించాలని యోచిస్తోంది. అలా చేస్తే రాష్ట్రాలకు ఆదాయ నష్టం జరగవచ్చు. అందుకే, సెస్​ను ఒక్కసారిగా తొలగించకుండా దశలవారీగా తగ్గిస్తున్నారు. 2017లో జీఎస్టీ అమలులోకి వచ్చినప్పుడు కాంపెన్సేషన్ సెస్​ను 5 సంవత్సరాలు కొనసాగించాలని నిర్ణయించారు. 2020లో కోవిడ్ సంక్షోభం వచ్చినప్పుడు రాష్ట్రాల పన్ను ఆదాయం తగ్గింది. అందుకే మరో 5 సంవత్సరాలు సెస్​ను కొనసాగిస్తున్నారు. ఈ మార్పు 2026 మార్చిలో ముగుస్తుంది.