8th Pay Commission : లక్నోలో ఎనిమిదో వేతన సంఘం కీలక భేటీ.. జీతాలు, ఫిట్మెంట్ ఫ్యాక్టర్పై తేలనున్న లెక్కలు
జీతాలు, ఫిట్మెంట్ ఫ్యాక్టర్పై తేలనున్న లెక్కలు
8th Pay Commission : కేంద్ర ప్రభుత్వ ఉద్యోగులు, పించనదార్లకు ఎంతో కాలంగా ఎదురుచూస్తున్న ఎనిమిదో వేతన సంఘం కీలక అడుగు ముందుకు వేసింది. రాబోయే రోజుల్లో కేంద్ర ప్రభుత్వ ఉద్యోగుల కనీస ప్రాథమిక వేతనం, ఫిట్మెంట్ ఫ్యాక్టర్ పెంపు, అలవెన్సుల మార్పులపై చర్చించడానికి వేతన సంఘం తన అధికారిక పర్యటనల షెడ్యూల్ను ఖరారు చేసింది. ఇందులో భాగంగా వచ్చే జూన్ నెలలో ఉత్తరప్రదేశ్ రాజధాని లక్నోలో వేతన సంఘం బృందం ఒక అత్యంత కీలకమైన సమావేశాన్ని నిర్వహించబోతోంది. ఈ వేతన సంఘం సమావేశం ఉద్యోగుల జీతభత్యాల రోడ్మ్యాప్ సిద్ధం చేయడానికి ఎంతో నిర్ణయాత్మకంగా మారనుంది. జూన్ 22, 23 తేదీల్లో లక్నో వేదికగా సాగే ఈ సమావేశంలో వివిధ ఉద్యోగ సంఘాల ప్రతినిధులు, ఆర్థిక రంగ నిపుణులు పాల్గొననున్నారు. ఈ సందర్భంగా ఉద్యోగుల కనీస బేసిక్ శాలరీని పెంచడం, కొత్త భత్యాల నిర్మాణం, పించనదార్ల సమస్యలపై ప్రాథమికంగా చర్చించనున్నారు. లక్నో పర్యటనలో కమిషన్ను కలిసి తమ వినతులను సమర్పించాలనుకునే ఉత్తరప్రదేశ్కు చెందిన కేంద్ర ప్రభుత్వ సంస్థలు, యూనియన్లు జూన్ పదో తేదీ లోపు వేతన సంఘం అధికారిక వెబ్సైట్ ద్వారా ఆన్లైన్లో దరఖాస్తు చేసుకోవాలని స్పష్టం చేశారు.
ఎవరెవరు దరఖాస్తు చేసుకోవచ్చు?
ప్రస్తుతానికి కేవలం ఉత్తరప్రదేశ్ పరిధిలోని కేంద్ర ప్రభుత్వ సంస్థలు, విద్యా సంస్థలు, గుర్తింపు పొందిన ఉద్యోగ సంఘాలు, సమాఖ్యలు మాత్రమే ఈ లక్నో పర్యటనలో కమిషన్తో చర్చలు జరపడానికి దరఖాస్తు చేసుకోవడానికి అర్హులు. దరఖాస్తు చేసుకునే వారు తమ డిమాండ్లతో కూడిన మెమోరాండాన్ని వెబ్సైట్లో అప్లోడ్ చేసిన తర్వాత వచ్చే యునిక్ మెమో ఐడీని కూడా సమర్పించాల్సి ఉంటుంది. ఈ సమావేశం జరిగే వేదిక, సమయం వంటి పూర్తి వివరాలను ఎంపిక చేసిన సంఘాలకు తర్వాత ప్రత్యేకంగా తెలియజేస్తారు.
ఇతర రాష్ట్రాల ఉద్యోగులు ఆగాల్సిందే
ఉత్తరప్రదేశ్ మినహా మిగిలిన రాష్ట్రాలు, కేంద్రపాలిత ప్రాంతాలకు చెందిన ఉద్యోగ సంఘాలు ఈ లక్నో పర్యటనకు దరఖాస్తు చేయవద్దని కమిషన్ స్పష్టమైన నిబంధన పెట్టింది. ఇతర రాష్ట్రాల కోసం రాబోయే రోజుల్లో వేర్వేరు దశల్లో ప్రత్యేక పర్యటనలు ఉంటాయని, ఆయా సమయాల్లో వారు తమ వినతులను సమర్పించవచ్చని స్పష్టం చేసింది. కాబట్టి మిగతా ప్రాంతాల ఉద్యోగులు తదుపరి నోటిఫికేషన్ వచ్చే వరకు వేచి చూడాల్సి ఉంటుంది.
జూన్ నెల పర్యటనల పూర్తి షెడ్యూల్
8వ వేతన సంఘం జూన్ నెలలో దేశంలోని పలు ప్రాంతాలలో విస్తృతంగా పర్యటించనుంది. జూన్ ఒకటో తేదీ నుంచి నాలుగో తేదీ వరకు జమ్మూ కాశ్మీర్ రాజధాని శ్రీనగర్లో పర్యటించి అక్కడి ఉద్యోగ సంఘాలతో సమావేశం కానుంది. ఆ తర్వాత జూన్ ఎనిమిదో తేదీన కేంద్రపాలిత ప్రాంతమైన లడఖ్లో పర్యటించి అక్కడి ఉద్యోగుల క్షేత్రస్థాయి సమస్యలను, భౌగోళిక పరిస్థితులను అడిగి తెలుసుకోనుంది. ఆ తర్వాతే జూన్ చివరి వారంలో లక్నో పర్యటనకు రానుంది.
వేతన సంఘం సిఫార్సులు ఎందుకు ముఖ్యం?
దేశవ్యాప్తంగా ఉన్న కోట్లాది మంది కేంద్ర ప్రభుత్వ ఉద్యోగులు, విశ్రాంత ఉద్యోగుల జీవన ప్రమాణాలను ఈ వేతన సంఘం సిఫార్సులు నిర్ణయిస్తాయి. కాలానుగుణంగా పెరిగే ధరలకు అనుగుణంగా జీతాలను సవరించడానికి కేంద్రం ఈ కమిషన్ను ఏర్పాటు చేసింది. ఈ కమిషన్ తన తుది నివేదికను ప్రభుత్వానికి సమర్పించడానికి పద్దెనిమిది నెలల గడువు ఉంది. ఒకవేళ పూర్తి స్థాయి నివేదిక ఇవ్వడం ఆలస్యమైతే ఉద్యోగులకు తక్షణ ఉపశమనం కలిగించేలా మధ్యంతర నివేదిక ఇచ్చే అవకాశం కూడా ఉంది.
కమిషన్ పరిశీలించే ప్రధానాంశాలు ఇవే
గత నవంబర్ రెండు వేల ఇరవైఐదులో ఖరారు చేసిన నిబంధనల ప్రకారం వేతన సంఘం కేవలం జీతాలు పెంచడమే కాకుండా దేశ ఆర్థిక క్రమశిక్షణను కూడా పరిగణనలోకి తీసుకుంటుంది. దేశ ఆర్థిక పరిస్థితి, సంక్షేమ పథకాలకు అయ్యే ఖర్చులు, పాత-కొత్త పెన్షన్ విధానాల వల్ల ప్రభుత్వంపై పడే ఆర్థిక భారం, రాష్ట్ర ప్రభుత్వాల ఖజానాలపై పడే ప్రభావం, ప్రైవేటు రంగంలో ప్రస్తుతం ఉన్న జీతాల స్థాయి, వివిధ కఠిన ప్రాంతాలలో పని చేసే ఉద్యోగుల సేవా నిబంధనలను క్షుణ్ణంగా పరిశీలించిన తర్వాతే కమిషన్ తన తుది నిర్ణయాన్ని ప్రకటిస్తుంది.
