Anil Ambani : ఎస్బీఐ తర్వాత బ్యాంక్ ఆఫ్ ఇండియా.. అనిల్ అంబానీకి మరో షాక్!

Anil Ambani : ఎస్‌బీఐ తర్వాత ఇప్పుడు బ్యాంక్ ఆఫ్ ఇండియా కూడా దివాలా తీసిన రిలయన్స్ కమ్యూనికేషన్స్ లోన్ అకౌంట్ ను ఫ్రాడ్ ‎గా ప్రకటించింది. ఈ కేసులో మాజీ డైరెక్టర్, పారిశ్రామికవేత్త అనిల్ అంబానీ పేరు కూడా చేర్చింది. 2016లో నిధుల దుర్వినియోగం జరిగినట్లు బ్యాంక్ ఆరోపిస్తోంది. 2016 ఆగస్టులో బ్యాంక్ ఆఫ్ ఇండియా రిలయన్స్ కమ్యూనికేషన్స్‌కు రూ.700 కోట్ల లోన్ ఇచ్చింది. అయితే, అక్టోబరు 2016లో మంజూరైన లోన్‌లో సగం డబ్బును ఒక ఫిక్స్‌డ్ డిపాజిట్‌లో పెట్టారని, ఇది లోన్ నిబంధనలకు విరుద్ధమని ఆర్.కామ్ స్టాక్ ఎక్స్‌ఛేంజ్‌కు ఇచ్చిన సమాచారంలో బ్యాంక్ పేర్కొంది.

ఆర్.కామ్ ప్రకారం ఆగస్టు 22న బ్యాంక్ ఆఫ్ ఇండియా నుంచి ఒక లేఖ అందింది. అందులో బ్యాంక్.. కంపెనీ, దాని ప్రమోటర్, మాజీ డైరెక్టర్ అనిల్ అంబానీ, మాజీ డైరెక్టర్ మంజరీ అశోక్ కక్కర్ లోన్ ఖాతాను మోసపూరితమైనదిగా ప్రకటించినట్లు పేర్కొంది. గతంలో జూన్‌లో ఎస్‌బీఐ కూడా ఇదే ఆరోపణలు చేసింది. ఎస్‌బీఐ ఫిర్యాదు తర్వాత, సీబీఐ అనిల్ అంబానీకి చెందిన రిలయన్స్ కమ్యూనికేషన్స్ కార్యాలయాలపై, ఆయన నివాసాలపై దాడులు చేసింది. ఎస్‌బీఐ ఇచ్చిన ఫిర్యాదు ఆధారంగా సీబీఐ ఈ దాడులు నిర్వహించింది. అనిల్ అంబానీ నిధుల గోల్‌మాల్ వల్ల బ్యాంక్‌కు రూ. 2,929.05 కోట్ల నష్టం వాటిల్లిందని ఎస్‌బీఐ ఆరోపించింది.

ఈ ఆరోపణలను అనిల్ అంబానీ ప్రతినిధి గట్టిగా ఖండించారు. ఈ ఫిర్యాదు 10 సంవత్సరాల క్రితం నాటి విషయమని, ఆ సమయంలో అనిల్ అంబానీ కంపెనీలో నాన్-ఎగ్జిక్యూటివ్ డైరెక్టర్‌గా మాత్రమే ఉన్నారని, రోజువారీ కార్యకలాపాల్లో ఆయనకు ఎలాంటి పాత్ర లేదని పేర్కొన్నారు. బ్యాంకింగ్ చట్టాల ప్రకారం.. ఒక ఖాతాను మోసపూరితమైనదిగా ప్రకటించిన తర్వాత, దానిపై క్రిమినల్ చర్యలు తీసుకోవడానికి ఎన్‌ఫోర్స్‌మెంట్ ఏజెన్సీలకు పంపాలి. అలాగే, అప్పు తీసుకున్నవారు ఐదు సంవత్సరాల వరకు బ్యాంకులు, ఇతర సంస్థల నుంచి కొత్త ఫైనాన్స్ పొందకుండా నిషేధం విధిస్తారు.

బ్యాంక్ ఆఫ్ ఇండియా ప్రకారం.. 2017 జూన్ 30 నాటికి ఆర్.కామ్ లోన్ రూ. 724.78 కోట్లతో ఎన్‌పీఏగా మారింది. రుణాన్ని చెల్లించడానికి బ్యాంక్ ప్రయత్నించినా ఆర్.కామ్ దానిని చెల్లించడంలో విఫలమైంది. ఈ ఏడాది ఏప్రిల్ నాటికి ఆర్.కామ్ మొత్తం అప్పు రూ. 40,400 కోట్లుగా ఉంది. భారీ అప్పుల కారణంగా, కంపెనీ దివాలా ప్రక్రియలోకి వెళ్ళింది. ప్రస్తుతం ఎస్‌బీఐ నేతృత్వంలోని కమిటీ ఆర్.కామ్ వ్యవహారాలను పర్యవేక్షిస్తోంది.