Plane Crash : అహ్మదాబాద్ విమాన దుర్ఘటన.. ఎయిర్ ఇండియాకు ఎంత నష్టం.. బాధితులకు పరిహారం ఎంతంటే ?

Plane Crash : అహ్మదాబాద్ ఎయిర్‌పోర్ట్ సమీపంలో సంభవించిన ఎయిర్ ఇండియా విమాన ప్రమాదం అత్యంత విషాదకరమైన సంఘటనలలో ఒకటి. ఈ ప్రమాదంలో విమానంలో ప్రయాణిస్తున్న 242 మందిలో ఒకరు మాత్రమే ప్రాణాలతో బయటపడినట్లు, మిగిలిన 241 మంది దుర్మరణం చెందినట్లు అధికారులు ప్రకటించారు. ఈ నేపథ్యంలో ఎయిర్ ఇండియా సంస్థ మరణించిన ప్రయాణికుల కుటుంబాలకు ఒక్కొక్కరికి రూ.1 కోటి పరిహారం ప్రకటించింది. ఎయిర్ ఇండియా తీసుకున్న ఈ నిర్ణయం అంతర్జాతీయ చట్ట నియమాలకు అనుగుణంగా ఉందని నిపుణులు తెలిపారు.

అంతర్జాతీయ విమానాలు ప్రమాదానికి గురైనప్పుడు ప్రయాణికులకు గాయాలైనప్పుడు లేదా మరణించినప్పుడు ఎంత పరిహారం చెల్లించాలనే దానిపై 1999 మాంట్రియల్ కన్వెన్షన్లో నిర్ణయాలు తీసుకున్నారు. భారతదేశం కూడా ఈ సదస్సులో భాగస్వామి దేశం. మాంట్రియల్ కన్వెన్షన్ రూపొందించిన నిబంధనల ప్రకారం, విమాన ప్రమాదం జరిగినప్పుడు ప్రతి ఒక్కరికీ కనీసం 1,28,821 ఎస్‌డిఆర్‌లు (SDRs) పరిహారంగా ఇవ్వాలి. ప్రమాదంలో ఎయిర్‌లైన్స్ కంపెనీ తప్పు లేకపోయినా ఈ పరిహారం ఇవ్వడం తప్పనిసరి. ఒకవేళ ఎయిర్‌లైన్స్ కంపెనీ నిర్లక్ష్యం లేదా లోపం ఉన్నట్లు తేలితే పరిహారం ఇంకా ఎక్కువగా ఉంటుంది. దీనిని అంతర్జాతీయ కోర్టులు నిర్ణయిస్తాయి.

SDR అంటే ఏమిటి?

ఎస్‌డిఆర్ (SDR) అంటే 'స్పెషల్ డ్రాయింగ్ రైట్స్'. ఇది అంతర్జాతీయ ద్రవ్య నిధి (IMF) రిజర్వ్ కరెన్సీ. డాలర్, యూరో, పౌండ్, యెన్ వంటి కొన్ని అంతర్జాతీయ కరెన్సీల విలువ ఆధారంగా ఎస్‌డిఆర్ విలువ ఉంటుంది. ప్రస్తుతం, ఒక ఎస్‌డిఆర్ విలువ సుమారు రూ.110.20 గా ఉంది. కాబట్టి, మరణించిన ప్రతి ప్రయాణికుడి కుటుంబానికి ఎయిర్‌లైన్స్ కంపెనీ కనీసం 1,28,821 ఎస్‌డిఆర్‌లను పరిహారంగా చెల్లించాలి. ఇది భారతీయ రూపాయలలో దాదాపు రూ.1.42 కోట్లకు సమానం అవుతుంది. ఎయిర్ ఇండియా కంపెనీ రూ.కోటి పరిహారం ప్రకటించడం ఈ మొత్తం పరిహారంలో ఒక భాగంగా ఉంటుంది.

టాటా గ్రూప్ యాజమాన్యంలోని ఎయిర్ ఇండియా కంపెనీ తన అన్ని విమానాలకు కలిపి ఒకేసారి ఇన్సూరెన్స్ చేయించుకుంటుంది. ఇది 20 బిలియన్ డాలర్ల భారీ ఇన్సూరెన్స్ స్కీమ్. 20 బిలియన్ డాలర్లు అంటే భారతీయ రూపాయలలో దాదాపు రూ.1.72 లక్షల కోట్లకు సమానం అవుతుంది.

ఈ గ్లోబల్ ఏవియేషన్ ఇన్సూరెన్స్ పథకంలో రెండు ప్రధాన భాగాలు ఉంటాయి. విమానానికి జరిగిన నష్టానికి పరిహారం, ప్రయాణికులకు చెల్లించాల్సిన పరిహారం.

విమానం ఎంత పాతది, ఏ స్థితిలో ఉంది అనే అంశాల ఆధారంగా, ప్రస్తుత విలువకు అనుగుణంగా విమానానికి పరిహారం చెల్లించబడుతుంది. ప్రమాదానికి గురైనట్లు పేర్కొన్న విమానం బోయింగ్ 787-8 డ్రీమ్‌లైనర్. కొత్త విమానం విలువ 211 నుండి 280 మిలియన్ డాలర్లు ఉంటుంది. ప్రమాదానికి గురైనట్లు పేర్కొన్న విమానం 2013 మోడల్ కాగా, 2021లో దీనికి 115 మిలియన్ డాలర్లకు ఇన్సూరెన్స్ చేయబడినట్లు సమాచారం. కాబట్టి, ఎయిర్ ఇండియాకు కనీసం ఈ మొత్తం పరిహారం లభిస్తుంది.

ప్రతి ప్రయాణికుడికీ ఇన్సూరెన్స్ కవరేజ్ ఉంటుంది. అయితే, అందరికీ ఒకే రకమైన పరిహారం లభించదు. మరణించిన వ్యక్తి ఆదాయం, కుటుంబానికి అతను ఎంతవరకు ఆధారం, అతని వయస్సు, భవిష్యత్ సంపాదన సామర్థ్యం వంటి అంశాల ఆధారంగా పరిహారం నిర్ణయించబడుతుంది. ఎయిర్ ఇండియా తన అన్ని విమానాలకు న్యూ ఇండియా అష్యూరెన్స్ కంపెనీ నుంచి ఇన్సూరెన్స్ సర్వీసులను పొందింది.