Air India : కష్టాల్లో ఎయిర్ ఇండియా..తగ్గిపోయిన బుకింగ్స్..ఆపై డీజీసీఏ కొరడా
తగ్గిపోయిన బుకింగ్స్..ఆపై డీజీసీఏ కొరడా
Air India : అహ్మదాబాద్‌లో జరిగిన విమాన ప్రమాదం తర్వాత ఎయిర్ ఇండియా కష్టాలు తీరడం లేదు. కంపెనీకి బుకింగ్స్లో తగ్గుదల కనిపించింది. ఇప్పుడు విమానయాన నియంత్రణ సంస్థ డీజీసీఏ కంపెనీపై కొరడా ఝళిపించింది. సిబ్బంది భద్రతా ప్రమాణాలను తీవ్రంగా, పదేపదే ఉల్లంఘించినందుకు భారత పౌర విమానయాన నియంత్రణ సంస్థ ఎయిర్ ఇండియాను నిలదీసింది. అంతేకాకుండా, ఎయిర్‌లైన్ షెడ్యూలింగ్ విభాగంలో సిబ్బంది రోస్టరింగ్ బాధ్యత వహించే ముగ్గురు సీనియర్ అధికారులను వారి పదవుల నుండి తొలగించాలని ఆదేశించింది.
డీజీసీఏ టాటా గ్రూప్ కు చెందిన ఎయిర్ ఇండియాను తమ ముగ్గురు అధికారులు చూరా సింగ్(డివిజనల్ వైస్ ప్రెసిడెంట్), పింకీ మిట్టల్ (చీఫ్ మేనేజర్ – క్రూ షెడ్యూలింగ్), పాయల్ అరోరా(క్రూ షెడ్యూలింగ్ – ప్లానింగ్) లపై తక్షణమే అంతర్గత క్రమశిక్షణా చర్యలు ప్రారంభించాలని కోరింది.
ఈ అధికారులు విమాన సిబ్బంది షెడ్యూలింగ్‌లో నిబంధనలను ఉల్లంఘించినందుకు బాధ్యులుగా గుర్తించారు. లైసెన్సింగ్, విమాన సమయం, విశ్రాంతి వ్యవధి నిబంధనలను పాటించకుండా తమ సిబ్బందికి షెడ్యూల్ చేస్తున్నారని ఎయిర్ ఇండియా అంగీకరించింది. ఇవి విమాన భద్రతకు చాలా ముఖ్యమైనవి. డీజీసీఏ జూన్ 20న విడుదల చేసిన లేఖలో, ఎయిర్ ఇండియా ARMS నుండి CAE ఫ్లైట్, క్రూ మేనేజ్‌మెంట్ సిస్టమ్లో మార్పులు చేసిన తర్వాత జరిగిన ఆడిట్‌లో ఈ ఉల్లంఘనలు బయటపడ్డాయని పేర్కొంది.
భవిష్యత్తులో సిబ్బంది షెడ్యూలింగ్, లైసెన్సింగ్ లేదా విమాన సమయ నిబంధనలను ఏదైనా ఉల్లంఘిస్తే కఠిన చర్యలు తీసుకుంటామని డీజీసీఏ హెచ్చరించింది. ఇందులో జరిమానా, లైసెన్స్ రద్దు లేదా ఎయిర్ ఇండియా కార్యకలాపాలకు అనుమతిని రద్దు చేయడం వంటివి ఉండవచ్చు.
ఈ ఏడాది ఫిబ్రవరిలో ఢిల్లీ హైకోర్టు డీజీసీఏను పైలట్ల కోసం సవరించిన డ్యూటీ, విశ్రాంతి నిబంధనలను కచ్చితంగా పాటించాలని ఆదేశించింది. ఇవి జులై 1, 2025 నుండి దశలవారీగా అమలులోకి వస్తాయి. సివిల్ ఏవియేషన్ రిక్వైర్మెంట్స్ ప్రకారం కనీస వారపు విశ్రాంతిని 36 గంటల నుండి 48 గంటలకు పెంచడం, రాత్రి పూట కార్యకలాపాలను గరిష్టంగా రెండు ల్యాండింగ్‌లకే పరిమితం చేయడం వంటి నిబంధనలు ఉన్నాయి. పైలట్ల అలసటను తగ్గించడానికి, ఎయిర్‌లైన్స్‌కు సురక్షితమైన డ్యూటీ షెడ్యూల్‌ను నిర్ధారించడానికి ఉద్దేశించిన ఈ నిబంధనలను, ఫిబ్రవరిలో డీజీసీఏ దాఖలు చేసిన అఫిడవిట్‌లో పైలట్ యూనియన్లు, ఎయిర్‌లైన్స్, పౌర విమానయాన మంత్రిత్వ శాఖతో సంప్రదించిన తర్వాత ఖరారు చేశారు.
