ATF Rates : వరుసగా రెండో నెలలో జెట్ ఇంధనం ధరల మోత.. విమాన టిక్కెట్ల ధరలు పెరిగే ఛాన్స్

ATF Rates : దేశీయంగా లేదా అంతర్జాతీయంగా ప్రయాణించే విమాన ప్రయాణికులకు ఒక బ్యాడ్ న్యూస్. రాబోయే రోజుల్లో విమాన టిక్కెట్ల ధరలు పెరిగే అవకాశం ఉంది. ఎందుకంటే, వరుసగా రెండో నెలలో కూడా దేశంలోని చమురు సంస్థలు జెట్ ఇంధనం ధరలను పెంచాయి. ముడి చమురు ధరల్లో హెచ్చుతగ్గులు, డాలర్‌తో పోలిస్తే రూపాయి విలువ పడిపోవడం, పండుగ సీజన్‌లో విమానాలకు డిమాండ్ పెరగడం వంటి అనేక కారణాల వల్ల ఈ పెరుగుదల నమోదైంది. ఈసారి జెట్ ఇంధనం ధర కిలోలీటర్‌కు రూ.750 కంటే ఎక్కువ పెరిగింది. దేశంలోని నాలుగు ప్రధాన నగరాల్లో దేశీయ, అంతర్జాతీయ విమానాల కోసం జెట్ ఇంధనం ధరలు ఎలా ఉన్నాయో ఇప్పుడు చూద్దాం.

పెట్రోలియం కంపెనీలు దేశీయ, అంతర్జాతీయ విమాన ప్రయాణాలకు ఉపయోగించే జెట్ ఇంధనం ధరలను వరుసగా రెండో నెలలో పెంచాయి. తాజా పెరుగుదల నవంబర్ నెలలో నమోదైంది. దేశీయ విమానాలకు జెట్ ఇంధనం ధర కిలోలీటర్‌కు రూ.750కి పైగా పెరిగింది. అయితే, అంతకుముందు అక్టోబర్‌లో నమోదైన కిలోలీటర్‌కు రూ.3,000 పెరుగుదలతో పోలిస్తే ఇది చాలా తక్కువ. ముడి చమురు ధరల్లో హెచ్చుతగ్గులు, అమెరికన్ డాలర్‌తో పోలిస్తే రూపాయి బలహీనపడటం, పండుగ సీజన్‌లో విమాన ప్రయాణ డిమాండ్ పెరగడం ఈ ధరల పెరుగుదలకు ప్రధాన కారణాలుగా నిలిచాయి.

గత రెండు నెలల కాలంలో ఈ నాలుగు నగరాల్లోనూ జెట్ ఇంధనం ధర కిలోలీటర్‌కు సుమారు రూ.3,600 నుంచి రూ.3,900 వరకు పెరిగింది. చెన్నైలో అత్యధికంగా రూ.3,937.72 పెంపు నమోదైంది. దేశీయ విమానాలతో పాటు, అంతర్జాతీయ విమానాలకు ఉపయోగించే జెట్ ఇంధనం ధరలు కూడా పెరిగాయి, అయితే నవంబర్ నెలలో ఈ పెరుగుదల స్వల్పంగా ఉంది. అంతర్జాతీయ విమానాల కోసం జెట్ ఇంధనం ధర కిలోలీటర్‌కు సగటున 3.50 డాలర్లు పెరిగింది. ఢిల్లీ, ముంబైలో కిలోలీటర్‌కు 3.57 డాలర్లు పెరిగి, ధరలు వరుసగా 817.01, 816.80 డాలర్లకు చేరాయి. కోల్‌కతా, చెన్నైలో 3.58 డాలర్లు పెరిగి, ధరలు వరుసగా 855.63, 812.36 డాలర్లకు చేరాయి. జెట్ ఇంధనం అనేది విమానయాన సంస్థల ప్రధాన నిర్వహణ ఖర్చులలో ఒకటి. వరుసగా పెరుగుతున్న జెట్ ఇంధనం ధరలను భర్తీ చేసుకోవడానికి విమానయాన సంస్థలు తమ టిక్కెట్ల ధరలను పెంచే అవకాశం ఉంది. దీంతో దేశీయ, అంతర్జాతీయ విమాన ప్రయాణం మరింత ఖరీదైనదిగా మారవచ్చు. ఇది ప్రయాణీకుల జేబులకు మరింత భారం కానుంది.