Anil Ambani : బ్రదర్స్ వార్ ఇన్ స్టాక్ మార్కెట్..అన్న దాటేసిన అనిల్ అంబానీ

Anil Ambani : భారతీయ స్టాక్ మార్కెట్ గురువారం నాడు చరిత్ర సృష్టించింది. నిఫ్టీ ఆల్-టైమ్ హైకి చేరుకోగా సెన్సెక్స్ కూడా 86,000 మార్కును దాటింది. ఈ జోరులో దేశంలోని అగ్రశ్రేణి వ్యాపారవేత్తలైన అంబానీ సోదరుల కంపెనీల షేర్లు కూడా ఫోకస్‌లో ఉన్నాయి. అయితే, ఇక్కడ ఒక ఆసక్తికరమైన విషయం ఏంటంటే.. మార్కెట్ ర్యాలీలో అన్నయ్య ముఖేష్ అంబానీని తమ్ముడు అనిల్ అంబానీ అధిగమించారు. ముఖేష్ అంబానీకి చెందిన ప్రముఖ సంస్థ రిలయన్స్ ఇండస్ట్రీస్ షేర్ ధర సుమారు 0.31 శాతం పడిపోయి రూ.1,565.00 వద్ద ట్రేడ్ అవుతుంది.

అనిల్ అంబానీకి చెందిన కంపెనీల షేర్లలో మాత్రం బలమైన వృద్ధి కనిపించింది. రిలయన్స్ పవర్ షేర్లు దాదాపు 2.68 శాతం పెరిగి రూ.40.54 వద్ద ట్రేడ్ అవుతున్నాయి. అదే విధంగా అనిల్ అంబానీకి చెందిన మరో కంపెనీ రిలయన్స్ ఇన్‌ఫ్రా షేర్లు కూడా సుమారు 5 శాతం భారీ పెరుగుదలతో రూ.165.85 వద్ద ట్రేడ్ అవుతున్నాయి. మార్కెట్ మొత్తం ఆల్-టైమ్ హై వద్ద ఉన్నా, ముఖేష్ అంబానీకి చెందిన రిలయన్స్ ఇండస్ట్రీస్ షేర్లు మాత్రం కొద్దిగా పడిపోవడం ఇక్కడ గమనించదగిన విషయం. గురువారం మధ్యాహ్నం 11:40 గంటల ప్రాంతంలో సెన్సెక్స్ దాదాపు 275 పాయింట్ల లాభంతో 85,883.76 వద్ద కొనసాగింది.

షేర్ మార్కెట్‌లో ఈ దూకుడుగా పెరుగుదలకు మూడు ప్రధాన కారణాలు కనిపిస్తున్నాయి. మొదటిది అమెరికా ఫెడరల్ రిజర్వ్, భారతీయ రిజర్వ్ బ్యాంక్ డిసెంబర్‌లో వడ్డీ రేట్లను తగ్గిస్తాయనే ఆశతో ఇన్వెస్టర్లు సానుకూలంగా ఉన్నారు. రెండవది, పెద్ద కంపెనీల షేర్లు చౌకగా దొరుకుతాయనే అంచనాలతో విదేశీ సంస్థాగత ఇన్వెస్టర్లు మళ్లీ పెద్ద ఎత్తున కొనుగోళ్లు చేస్తున్నారు. నవంబర్ 26న విదేశీ ఇన్వెస్టర్లు సుమారు రూ.4,778 కోట్ల విలువైన షేర్లను కొనుగోలు చేశారు. మూడవది, రష్యా-ఉక్రెయిన్ యుద్ధాన్ని ముగించే దిశగా చర్చల ఆశలు పెరిగాయి. ఈ అంశం గ్లోబల్ మార్కెట్ సెంటిమెంట్‌ను మెరుగుపరిచి భారత మార్కెట్‌కు మద్దతుగా నిలుస్తోంది.