Farming India : రైతన్నలకు కేంద్రం బంపర్ ఆఫర్..గోధుమలు, చక్కెర ఎగుమతులకు గ్రీన్ సిగ్నల్

Farming India : భారతదేశ రైతన్నలకు కేంద్ర ప్రభుత్వం తీపి కబురు అందించింది. దేశంలో గోధుమలు, చక్కెర నిల్వలు పుష్కలంగా ఉండటంతో, వాటిని విదేశాలకు ఎగుమతి చేసేందుకు గ్రీన్ సిగ్నల్ ఇచ్చింది. దీనివల్ల రైతులకు అంతర్జాతీయ మార్కెట్‌లో మంచి ధర లభించడమే కాకుండా, దేశీయ మార్కెట్‌లో ధరల స్థిరీకరణకు అవకాశం ఏర్పడనుంది. ప్రపంచంలోనే రెండో అతిపెద్ద వ్యవసాయ దేశంగా ఉన్న భారత్, తాజాగా 25 లక్షల మెట్రిక్ టన్నుల గోధుమలు, అదనంగా 5 లక్షల టన్నుల చక్కెర ఎగుమతికి అనుమతినిచ్చింది. దేశీయంగా నిల్వలు, ధరలు, సరఫరాను క్షుణ్ణంగా పరిశీలించిన తర్వాతే కేంద్ర ప్రభుత్వం ఈ కీలక నిర్ణయం తీసుకుంది. గత నెలలోనే ప్రభుత్వం 5 లక్షల టన్నుల గోధుమ పిండి, ఇతర ఉత్పత్తుల ఎగుమతికి అనుమతించిన సంగతి తెలిసిందే. ఇప్పుడు ఏకంగా భారీ స్థాయిలో ముడి గోధుమల ఎగుమతికి పచ్చజెండా ఊపడం రైతులకు పెద్ద ఊరట.

రికార్డు స్థాయి దిగుబడితోనే ఇది సాధ్యం

నిజానికి, 2022లో దేశంలో వీచిన తీవ్రమైన వడగాల్పుల వల్ల గోధుమ పంట దెబ్బతిని ధరలు ఆకాశాన్ని తాకాయి. దీంతో ప్రభుత్వం ఎగుమతులపై నిషేధం విధించింది. కానీ, 2025 సంవత్సరం భారత రైతులకు అద్భుతమైన ఫలితాలను ఇచ్చింది. మెరుగైన వాతావరణం, నాణ్యమైన విత్తనాలు, వరుసగా కురిసిన రెండు మంచి రుతుపవనాల వల్ల దేశంలో ఏకంగా 11.79 కోట్ల మెట్రిక్ టన్నుల రికార్డు స్థాయి గోధుమ దిగుబడి నమోదైంది. ఈ భారీ నిల్వలే ఇప్పుడు భారత్‌ను మళ్ళీ ఎగుమతుల రేసులో నిలబెట్టాయి.

అంతర్జాతీయ మార్కెట్‌లో సవాళ్లు

ప్రభుత్వం ఎగుమతులకు అనుమతినిచ్చినప్పటికీ, వ్యాపారుల ముందు కొన్ని సవాళ్లు ఉన్నాయి. ప్రస్తుతం భారతీయ గోధుమల ధర అంతర్జాతీయ మార్కెట్‌తో పోలిస్తే కాస్త ఎక్కువగా ఉంది. అర్జెంటీనా వంటి దేశాలు టన్ను గోధుమలను 200 డాలర్లకే ఇస్తుంటే, భారతీయ గోధుమల ధర సుమారు 280 డాలర్లు పలుకుతోంది. పొరుగు దేశమైన బంగ్లాదేశ్ వంటి కొనుగోలుదారులు తక్కువ ధరకు నాణ్యమైన గోధుమలను కోరుకుంటున్నారు. కాబట్టి నిర్ణీత ఎగుమతి లక్ష్యాన్ని చేరుకోవాలంటే నాణ్యత మరియు ధర విషయంలో వ్యాపారులు జాగ్రత్త పడాల్సి ఉంటుంది.

రైతులకు చేకూరనున్న మేలు

ఈ నిర్ణయం వల్ల రైతులకు గిట్టుబాటు ధర లభించే అవకాశం ఉంది. మార్కెట్‌లో నిల్వలు పేరుకుపోయి ధరలు పడిపోకుండా, విదేశీ ఎగుమతుల వల్ల గిరాకీ పెరుగుతుంది. చక్కెర విషయంలో కూడా ఇప్పటికే నవంబర్‌లో 15 లక్షల టన్నులకు అనుమతి ఉండగా, ఇప్పుడు అదనంగా మరో 5 లక్షల టన్నులకు పచ్చజెండా ఊపారు. దీనివల్ల చక్కెర మిల్లులకు ఆర్థికంగా వెసులుబాటు కలిగి, రైతులకు చెల్లించాల్సిన బకాయిలు త్వరగా అందే అవకాశం ఉంది.