Indian Railways: అక్టోబర్ 1 నుంచి రైల్వే కొత్త రూల్స్: ఒరిజినల్ ఐడీ కార్డు లేకపోతే జరిమానా ఖాయం

Indian Railways: రైళ్లలో ప్రయాణించే ప్రయాణికులకు రైల్వే శాఖ ముఖ్యమైన హెచ్చరిక జారీ చేసింది. అక్టోబర్ 1 నుంచి అక్టోబర్ 31 వరకు నెల రోజుల పాటు సెంట్రల్ రైల్వే ప్రత్యేక టికెట్ తనిఖీ ప్రచారాన్ని నిర్వహించబోతోంది. పండుగల సీజన్‌లో ప్రయాణికుల రద్దీని ఆసరాగా చేసుకుని నకిలీ టికెట్లతో ప్రయాణించే వారిని, సడలింపులను దుర్వినియోగం చేసే వారిని అరికట్టడమే ఈ డ్రైవ్ ప్రధాన ఉద్దేశం. స్టేషన్లు, రైళ్లలో టీటీఈలు మునుపటి కంటే చాలా కఠినంగా తనిఖీలు చేపడతారు. ఈ క్రమంలో టికెట్ కలిగి ఉన్నప్పటికీ, సరైన ఒరిజినల్ గుర్తింపు కార్డు చూపించకపోతే ప్రయాణికులు తీవ్ర సమస్యలు ఎదుర్కోవాల్సి వస్తుంది.

ఒరిజినల్ గుర్తింపు కార్డు తప్పనిసరి

ప్రయాణ సమయంలో కేవలం టికెట్ ప్రింటౌట్ లేదా ఫోన్‌లో మెసేజ్ చూపిస్తే సరిపోదు. టికెట్‌తో పాటు పాస్‌పోర్ట్, పాన్ కార్డ్, డ్రైవింగ్ లైసెన్స్, ఓటర్ ఐడీ, ప్రభుత్వ గుర్తింపు కార్డులు లేదా డిజిలాకర్ ద్వారా అధికారికంగా ధృవీకరించిన డిజిటల్ కార్డుల వంటి అసలైన గుర్తింపు కార్డును తప్పనిసరిగా వెంట ఉంచుకోవాలి. ఒకే టికెట్‌పై ఒకటి కంటే ఎక్కువ మంది ప్రయాణిస్తున్నట్లయితే, కనీసం ఒక్కరి వద్దనైనా అసలైన ఐడీ కార్డు ఉండాలి. ఐడీ కార్డు చూపించడంలో విఫలమైతే, ఆ టికెట్‌పై ఉన్న ప్రయాణికులందరినీ వితౌట్ టికెట్ (సాధారణ ప్రయాణ టికెట్ లేని) ప్రయాణికులుగా పరిగణించి రైల్వే నిబంధనల ప్రకారం భారీ జరిమానాలు విధిస్తారు.

కోటాలు, సడలింపు పొందిన వారిపై ప్రత్యేక దృష్టి

ప్రత్యేక డిస్కౌంట్లు లేదా కన్సెషన్ ధరలతో టికెట్లు పొందిన వారు, రిజర్వేషన్ కోటా కింద సీట్లు పొందిన వారి వివరాలను అధికారులు ప్రత్యేకంగా తనిఖీ చేయనున్నారు. ప్రయాణికుడు నిజంగానే ఆ సడలింపు లేదా కోటాకు అర్హుడా కాదా అని నిర్ధారించుకోవడానికి ఐడీ ప్రామాణీకరణను క్షుణ్ణంగా పరిశీలిస్తారు. టికెట్ వేరొకరి పేరిట బుక్ చేసి, ఇతరులు ప్రయాణించడం వంటి అక్రమాలను అరికట్టడానికి ఈ నిర్ణయం తీసుకున్నారు. అర్హత పత్రాలు సరిగ్గా లేకపోతే టికెట్ రద్దవ్వడమే కాకుండా చట్టపరమైన చర్యలు కూడా ఉంటాయి.

ఈ-పాస్/పీటీఓ వినియోగదారులకు హెచ్చరిక

రైల్వే ఉద్యోగులు, వారి కుటుంబ సభ్యులు వినియోగించే ఈ-పాస్, పీటీఓ (ప్యాసేజ్ టికెట్ ఆర్డర్) ద్వారా చేసే ప్రయాణాలపై కూడా అధికారులు గట్టి నిఘా ఉంచనున్నారు. ఈ-పాస్ ఉచిత ప్రయాణానికి సదుపాయం కల్పిస్తే, పీటీఓ ద్వారా రాయితీ ధరకే టికెట్ లభిస్తుంది. అయితే, ప్రయాణానికి ముందే ఈ-పాస్ లేదా పీటీఓను సరైన విధానంలో అథారిటీ టూ ట్రావెల్‎గా మార్చుకున్నారో లేదో చెక్ చేసుకోవాలి. ప్రయాణ సమయంలో వారు కూడా ఒరిజినల్ ఐడీ కార్డును తప్పనిసరిగా చూపించాల్సి ఉంటుంది. ప్రక్రియ పూర్తి కాకపోయినా లేదా ఐడీ లేకపోయినా టికెట్ లేని ప్రయాణంగా భావించి చర్యలు తీసుకుంటారు.

అన్‌‌రిజర్వ్‌డ్ టికెట్ల తనిఖీ

ఈ తనిఖీలు కేవలం రిజర్వ్‌డ్ లేదా రాయితీ టికెట్లకు మాత్రమే పరిమితం కావు. జనరల్ ప్రయాణికుల టికెట్లను కూడా అధికారులు సమగ్రంగా తనిఖీ చేస్తారు. అనుమానం వచ్చిన ప్రతి టికెట్‌ను టీటీఈలు తమ వద్ద ఉండే అత్యాధునిక హ్యాండ్‌హెల్డ్ టీటీఈ యాప్ ద్వారా క్షణాల్లో సరిచూస్తారు. నకిలీ టికెట్లు, పాత తేదీల టికెట్లను మార్చి ప్రయాణించే వారిని పట్టుకోవడానికి ఈ టెక్నాలజీ ఉపయోగపడుతుంది. కాబట్టి ప్రయాణం మొదలుపెట్టే ముందే టికెట్ వివరాలు, గుర్తింపు కార్డులు సరిగ్గా ఉన్నాయో లేదో ఒకసారి సరిచూసుకోవడం మంచిది.