Crude Oil : ట్రంప్ వ్యూహం ఫెయిల్.. రష్యా చమురు కొనుగోలులో చైనా తర్వాత భారతే టాప్

Crude Oil : రష్యా ముడి చమురు మార్కెట్‌లోకి రాకుండా ఆపడానికి అమెరికా అధ్యక్షుడు చాలా ప్రయత్నాలు చేస్తున్నా, ఆ ప్రయత్నాలలో ఆయన విఫలమవుతున్నట్లు స్పష్టమవుతోంది. హెల్సింకికి చెందిన సెంటర్ ఫర్ రీసెర్చ్ ఆన్ ఎనర్జీ అండ్ క్లీన్ ఎయిర్ నివేదిక ఈ విషయాన్ని స్పష్టం చేసింది. ఈ నివేదిక ప్రకారం.. అక్టోబర్‌లో చైనా తర్వాత రష్యా ముడి చమురు కొనుగోలు చేసిన దేశాల్లో భారత్ రెండవ అతిపెద్ద దేశంగా నిలిచింది.

CREA నివేదిక ప్రకారం అక్టోబర్ నెలలో రష్యా నుంచి ముడి చమురు కొనుగోలు చేసిన దేశాల వివరాలు ఇలా ఉన్నాయి. చైనా $3.7 బిలియన్ డాలర్ల విలువైన చమురు కొనుగోలు చేసి మొదటి స్థానంలో ఉంది. భారత్ $2.5 బిలియన్ డాలర్ల విలువైన ముడి చమురు కొనుగోలు చేసి రెండవ స్థానంలో నిలిచింది. ముఖ్యంగా భారత్, చైనాలతో అమెరికా ట్రేడ్ డీల్స్ (వాణిజ్య ఒప్పందాల) గురించి చర్చలు జరుపుతున్నప్పటికీ, ఈ కొనుగోళ్లు కొనసాగుతున్నాయి.

ముడి చమురుతో పాటు బొగ్గు, గ్యాస్ వంటి మొత్తం శిలాజ ఇంధనాల దిగుమతుల జాబితాలో చైనా $5.8 బిలియన్ డాలర్లు, భారత్ $3.1 బిలియన్ డాలర్లు, టర్కీ $2.7 బిలియన్ డాలర్లు (మూడవ అతిపెద్ద కొనుగోలుదారు), యూరోపియన్ యూనియన్ $1.1 బిలియన్ డాలర్లు (నాల్గవ స్థానం) ఉన్నాయి.

ఉక్రెయిన్‌తో రష్యా చేస్తున్న యుద్ధానికి ఈ నిధులు సహాయపడుతున్నాయని ఆరోపిస్తూ, రష్యా చమురు కొనుగోళ్లను తగ్గించాలని పశ్చిమ దేశాలు భారత్, చైనాలపై ఒత్తిడి చేస్తున్నాయి. అయితే, రష్యా చమురు ధర తక్కువగా ఉండటంతో ఈ దేశాలు కొనుగోలును ఆపడం లేదు. అక్టోబర్‌లో భారత్ $351 మిలియన్ డాలర్ల విలువైన రష్యన్ బొగ్గును, $222 మిలియన్ డాలర్ల విలువైన ఆయిల్ ఉత్పత్తులను కూడా దిగుమతి చేసుకుంది.

రష్యన్ ఆయిల్ ఉత్పత్తులలో టర్కీ అతిపెద్ద కొనుగోలుదారుగా ఉంది ($957 మిలియన్ డాలర్లు). దాదాపు సగం డీజిల్ కొనుగోలు చేసింది. అలాగే పైప్‌లైన్ గ్యాస్ ($929 మిలియన్), ముడి చమురు ($572 మిలియన్) కొనుగోలు చేసింది. ఈయూ $824 మిలియన్ డాలర్ల విలువైన రష్యన్ ఎల్‌ఎన్‌జీ, పైప్‌లైన్ గ్యాస్‌ను, $311 మిలియన్ డాలర్ల విలువైన ముడి చమురును కొనుగోలు చేసింది. రష్యా శిలాజ ఇంధనాల కొనుగోలులో దక్షిణ కొరియా 5వ స్థానంలో ఉంది. ఇందులో 53% బొగ్గు ($215 మిలియన్), ఆ తర్వాత ఎల్‌ఎన్‌జీ ($107 మిలియన్) ఉన్నాయి. గత నెలలో అమెరికా, రష్యాకు చెందిన రోస్‌నెఫ్ట్, లుకోయిల్‌పై ఆంక్షలు విధించింది. దీని ప్రభావం డిసెంబర్ నెల దిగుమతి గణాంకాల్లో కనిపిస్తుందని ఆశించబడుతోంది.