China Economic Crisis: ఆర్థిక సంక్షోభంలో చైనా..పడిపోయిన ఎగుమతులు.. మరో పాకిస్తాన్ కాబోతుందా ?

China Economic Crisis: ప్రపంచంలోనే రెండవ అతిపెద్ద ఆర్థిక వ్యవస్థ అయిన చైనా ప్రస్తుతం తీవ్రమైన ఆర్థిక సంక్షోభం అంచున నిలబడి ఉంది. అక్టోబర్ నెలకు సంబంధించిన తాజా ఆర్థిక గణాంకాలు చైనాను మాత్రమే కాక, ప్రపంచ ఆర్థిక విశ్లేషకులను కూడా కలవరపాటుకు గురిచేశాయి. ఫ్యాక్టరీ అవుట్‌పుట్, రిటైల్ అమ్మకాలు రెండూ గత సంవత్సరంలోకెల్లా అత్యంత నెమ్మదిగా పెరిగాయి. దశాబ్దాలుగా అభివృద్ధికి మారుపేరుగా నిలిచిన చైనా ఆర్థిక వ్యవస్థ ఇప్పుడు అటు దేశీయ డిమాండ్ లేక, ఇటు పెట్టుబడులు తగ్గి, నలువైపులా ఒత్తిడిని ఎదుర్కొంటోంది.

అనేక దశాబ్దాలుగా, భారీ వృద్ధిని సాధించడానికి చైనా రెండు సులభమైన వ్యూహాలను అమలు చేసింది: 1. తమ పెద్ద ఫ్యాక్టరీల ద్వారా ప్రపంచమంతటికీ భారీ ఎగుమతులు చేయడం. 2. ప్రభుత్వ ఖజానా నుంచి డబ్బు తీసి దేశంలో పెద్ద ఎత్తున మౌలిక సదుపాయాల ప్రాజెక్టులు నిర్మించడం. అయితే, ఇప్పుడు ఈ రెండు మార్గాలు కూడా మూసుకుపోయినట్లు కనిపిస్తోంది. అమెరికా అధ్యక్షుడు డొనాల్డ్ ట్రంప్ విధించిన టారిఫ్‌ల కారణంగా, చైనా ఇకపై అమెరికా మార్కెట్‌పై మాత్రమే ఆధారపడడం కష్టమైంది. అలాగే, దేశీయంగా పారిశ్రామిక సామర్థ్యం గరిష్ట స్థాయికి చేరడంతో, కొత్తగా వృద్ధిని సాధించడం కష్టమవుతోంది.

ఫ్యాక్టరీ అవుట్‌పుట్, అమ్మకాలు భారీగా డౌన్

చైనా జాతీయ గణాంకాల బ్యూరో విడుదల చేసిన అక్టోబర్ నెల గణాంకాలు చాలా ఆందోళన కలిగిస్తున్నాయి:

పారిశ్రామిక ఉత్పత్తి: సెప్టెంబర్‌లో 6.5% పెరిగిన ఈ రంగం, అక్టోబర్‌లో కేవలం 4.9% మాత్రమే పెరిగింది. ఇది ఆగస్టు 2024 తర్వాత నమోదైన అత్యంత బలహీనమైన వృద్ధి రేటు.

రిటైల్ అమ్మకాలు: దేశీయ డిమాండ్‌ను సూచించే రిటైల్ అమ్మకాలు కేవలం 2.9% మాత్రమే పెరిగాయి. ఇది వినియోగదారుల్లో నమ్మకం తగ్గి, ఖర్చు చేయడానికి వెనుకాడుతున్నారనే విషయాన్ని స్పష్టం చేస్తోంది. చైనాలో అతిపెద్ద సింగిల్స్ డే షాపింగ్ ఫెస్టివల్ కూడా ఈసారి ఆశించినంత అమ్మకాలను పెంచలేకపోయింది.

ఎగుమతి, పెట్టుబడి రంగాల్లో భారీ షాక్

చైనాకు ప్రధాన ఆందోళనగా మారిన దాని ఎగుమతి రంగం అక్టోబర్‌లో హఠాత్తుగా కుప్పకూలింది. అమెరికన్ మార్కెట్‌లో ఉన్న మాంద్యం మరియు టారిఫ్‌లే దీనికి ప్రధాన కారణం.ఎనిమిది నెలల వృద్ధి తర్వాత కారు అమ్మకాలు ఒక్కసారిగా పడిపోయాయి. జనవరి నుంచి అక్టోబర్ మధ్య స్థిర ఆస్తుల పెట్టుబడిలో 1.7% క్షీణత నమోదైంది.ముఖ్యంగా ప్రాపర్టీ రంగంలో కొత్త ఇళ్ల ధరలు గత సంవత్సరంలోకెల్లా అత్యంత వేగంగా పడిపోవడం భయాన్ని మరింత పెంచుతోంది.

పెద్ద రిలీఫ్ ప్యాకేజీ కోసం ఎదురుచూపు

ప్రస్తుతం చైనా తన వృద్ధి లక్ష్యాన్ని 5% గా పెట్టుకుంది. ఈ లక్ష్యాన్ని చేరుకోవడానికి ప్రభుత్వం పెద్ద ఎత్తున ఉత్తేజకర ప్యాకేజీ ఇచ్చేందుకు సిద్ధంగా లేదు. అయితే, చాలా మంది ఆర్థికవేత్తలు ప్రభుత్వం మళ్లీ పాత పద్ధతిలోనే మౌలిక సదుపాయాల ప్రాజెక్టులకు మాత్రమే ప్రాధాన్యత ఇస్తుందని భావిస్తున్నారు. ఎగుమతులు, డిమాండ్ ఇలాగే బలహీనపడితే, 2026కు ముందే చైనా పెద్ద ఆర్థిక సంస్కరణలు లేదా రిలీఫ్ ప్యాకేజీ ప్రకటించక తప్పదని నిపుణులు హెచ్చరిస్తున్నారు.