Rare Earth : భారత్ ఈవీ మార్కెట్‌కు పెద్ద ఊరట..రేర్ ఎర్త్ లోహాలకు చైనా తాళం తెరిచింది

Rare Earth : మోడ్రన్ టెక్నాలజీకి వెన్నెముకగా పరిగణించబడే రేర్ ఎర్త్ మెటల్స్ ఎగుమతులపై చైనా ఒక కీలక నిర్ణయం తీసుకుంది. శుక్రవారం నాడు, సాధారణ పౌర వినియోగం కోసం ఈ లోహాల ఎగుమతికి తాము అధికారికంగా అనుమతి ఇస్తున్నట్లు చైనా ప్రకటించింది. చైనా కఠినమైన ఎగుమతి నియంత్రణలతో చాలా కాలంగా ఇబ్బంది పడుతున్న భారత్‌తో సహా అనేక దేశాలకు ఈ నిర్ణయం గొప్ప ఉపశమనాన్ని ఇచ్చింది. చైనా విదేశాంగ మంత్రిత్వ శాఖ ప్రతినిధి గువో జియాకున్ మాట్లాడుతూ.. ఈ లోహాలను పౌర అవసరాల కోసం ఉపయోగిస్తే, ఎగుమతిదారులు అన్ని నిబంధనలను పాటిస్తే, ఎటువంటి షరతులు లేకుండా సకాలంలో అనుమతి ఇస్తామని స్పష్టం చేశారు.

పౌర వినియోగానికి సడలింపు ఇచ్చినా, ఈ రేర్ ఎర్త్ లోహాలను రక్షణ ఉత్పత్తులలో ఉపయోగించే అవకాశం ఉంటే మాత్రం ఎగుమతికి అనుమతి ఉండబోదని చైనా తేల్చి చెప్పింది. మీడియం మరియు హెవీ రేర్ ఎర్త్ లోహాలు ద్వంద్వ వినియోగం వర్గానికి చెందినవి (అంటే సైనిక, పౌర అవసరాలు రెండింటికీ ఉపయోగపడతాయి). అందుకే చైనా ప్రపంచ శాంతి, ప్రాంతీయ స్థిరత్వం కారణాలను చూపుతూ, రక్షణ రంగానికి సంబంధించిన లోహాలపై తమ పట్టు సడలించడానికి సిద్ధంగా లేదని స్పష్టమైంది. ప్రపంచవ్యాప్తంగా రేర్ ఎర్త్ లోహాల మైనింగ్‌లో సుమారు 70%, ప్రాసెసింగ్‌లో దాదాపు 90% వాటాను చైనా మాత్రమే నియంత్రిస్తోంది.

చైనా తీసుకున్న ఈ నిర్ణయం భారతదేశానికి ఒక సంజీవని లాంటిది. దేశంలోని ఆటోమొబైల్ రంగం, ముఖ్యంగా వేగంగా అభివృద్ధి చెందుతున్న ఎలక్ట్రిక్ వాహనాల మార్కెట్, ఈ లోహాల సరఫరా కోసం చాలా కాలంగా కష్టపడుతోంది. డిసెంబర్ 12న జరిగిన విదేశాంగ మంత్రిత్వ శాఖ స్థాయి చర్చల్లో న్యూఢిల్లీ ఈ ఎగుమతి నియంత్రణ సమస్యను చైనా ముందు గట్టిగా లేవనెత్తింది. చైనా ఈ తాజా మెత్తబడిన వైఖరి భారతీయ పరిశ్రమకు తాత్కాలికంగా ఊరటనిస్తుంది. అయితే రక్షణ, వ్యూహాత్మక రంగాలలో చైనాపై ఆధారపడవలసిన సవాలు మాత్రం ఇంకా అలాగే ఉంది. రేర్ ఎర్త్ లోహాలతో పాటు, హెవీ బోరింగ్ యంత్రాల ఎగుమతిని కూడా భారత్ చైనాను డిమాండ్ చేసింది.