National Consumer Helpline : వినియోగదారులకు పండగే..హెల్ప్‌లైన్ పుణ్యమా అని రూ.52 కోట్ల రీఫండ్

National Consumer Helpline : వినియోగదారుల హక్కుల పరిరక్షణలో కేంద్ర వినియోగదారుల వ్యవహారాల మంత్రిత్వ శాఖ ఈ ఆర్థిక సంవత్సరంలో సంచలన విజయాలను నమోదు చేసింది. కేవలం ఒక ఫోన్ కాల్ లేదా ఆన్‌లైన్ ఫిర్యాదుతో కోట్లాది రూపాయల రీఫండ్‌ను సామాన్య ప్రజలకు తిరిగి ఇప్పించింది. ముఖ్యంగా నేషనల్ కన్స్యూమర్ హెల్ప్‌లైన్ ద్వారా వినియోగదారులు కోర్టుల చుట్టూ తిరగాల్సిన అవసరం లేకుండానే, కంపెనీలతో మాట్లాడి సమస్యలను పరిష్కరించడం విశేషం. దీనికి సంబంధించిన పూర్తి వివరాలు ఇక్కడ ఉన్నాయి.

రూ. 52 కోట్ల రీఫండ్.. 80 వేల ఫిర్యాదుల పరిష్కారం

కేంద్ర ప్రభుత్వం మంగళవారం విడుదల చేసిన గణాంకాల ప్రకారం.. ఈ ఏడాది జనవరి వరకు నేషనల్ కన్స్యూమర్ హెల్ప్‌లైన్ మొత్తం 31 రంగాలకు చెందిన 79,521 ఫిర్యాదులను పరిష్కరించింది. దీని ద్వారా వినియోగదారులకు ఏకంగా రూ.52 కోట్ల రీఫండ్‌ లభించింది. వినియోగదారుల రక్షణ చట్టం 2019 కింద ఈ హెల్ప్‌లైన్ ఒక డిజిటల్ వారధిలా పనిచేస్తోంది. ఏదైనా కంపెనీపై ఫిర్యాదు అందిన వెంటనే, దానిని నేరుగా ఆ సంస్థకు పంపి, నిర్ణీత కాలపరిమితిలో పరిష్కరించేలా నిరంతరం పర్యవేక్షిస్తారు. దీనివల్ల కన్స్యూమర్ కోర్టులకు వెళ్లే శ్రమ, సమయం మరియు డబ్బు ఆదా అవుతున్నాయి.

ఈ-కామర్స్ రంగంలోనే అత్యధిక మోసాలు

మన దేశంలో ఆన్‌లైన్ షాపింగ్ పెరగడంతో పాటు దానికి సంబంధించిన ఫిర్యాదులు కూడా భారీగా పెరిగాయి. మొత్తం ఫిర్యాదుల్లో ఈ-కామర్స్ రంగానివే సింహభాగం అని ప్రభుత్వం తెలిపింది. ఈ ఒక్క రంగం నుంచే 47,743 ఫిర్యాదులు రాగా, అధికారుల చొరవతో సుమారు రూ.36 కోట్ల నగదు వినియోగదారుల ఖాతాల్లోకి తిరిగి చేరింది. మెట్రో నగరాల నుంచే కాకుండా మారుమూల గ్రామాల నుంచి కూడా ప్రజలు ఈ హెల్ప్‌లైన్‌ను ఆశ్రయిస్తుండటం విశేషం. దేశవ్యాప్తంగా ఎక్కడ ఉన్నా ఆన్‌లైన్ షాపింగ్‌లో మోసపోతే NCH అండగా నిలుస్తోంది.

ట్రావెల్, టూరిజం రంగానికి రూ.4 కోట్లు

ఈ-కామర్స్ తర్వాత ఎక్కువగా ఫిర్యాదులు వచ్చిన రంగం ట్రావెల్, టూరిజం. విమాన టికెట్లు, హోటల్ బుకింగ్‌లు, టూర్ ప్యాకేజీల విషయంలో ఎదురైన ఇబ్బందులపై వినియోగదారులు ఫిర్యాదు చేయగా, సుమారు రూ.4 కోట్ల రీఫండ్‌ను హెల్ప్‌లైన్ ఇప్పించింది. కన్స్యూమర్ హెల్ప్‌లైన్ అనుసరిస్తున్న కన్వర్జెన్స్ మోడల్ వల్ల కంపెనీలు కూడా వినియోగదారుల సమస్యలను వేగంగా పరిష్కరించడానికి మొగ్గు చూపుతున్నాయి. మీకూ ఏదైనా సమస్య ఎదురైతే కన్స్యూమర్ హెల్ప్‌లైన్ నంబర్ 1915 కి కాల్ చేసి మీ హక్కును కాపాడుకోవచ్చు.