Copper Price : వెండిని మించిన వేగంతో రాగి.. ఈ 3 స్టాక్స్తో ఇన్వెస్టర్లకు నోట్ల వర్షమే
ఈ 3 స్టాక్స్తో ఇన్వెస్టర్లకు నోట్ల వర్షమే
Copper Price : మెటల్ మార్కెట్లో ఇప్పుడు వెండి కంటే ఎక్కువగా కాపర్ పేరు మార్మోగిపోతోంది. రాబోయే కాలంలో రాగి ధరలు వెండిని మించి పెరిగే అవకాశం ఉందన్న అంచనాల మధ్య, స్టాక్ మార్కెట్ ఇన్వెస్టర్లు కాపర్ స్టాక్స్పై కన్నేశారు. ముఖ్యంగా ఎలక్ట్రిక్ వాహనాలు, డేటా సెంటర్లు, మౌలిక సదుపాయాల రంగం నుంచి వస్తున్న డిమాండ్ రాగికి కొత్త రెక్కలు ఇస్తోంది.
జనవరి 2026లో రాగి ధరలు అంతర్జాతీయ మార్కెట్లో టన్నుకు 13,000 డాలర్ల రికార్డు స్థాయిని తాకాయి. ప్రస్తుతం ఈ ధరలు కొద్దిగా తగ్గినా, భవిష్యత్తులో డిమాండ్ పెరుగుతుందన్న ICRA నివేదికలు ఇన్వెస్టర్లలో ఆశలు రేపుతున్నాయి. ఈ నేపథ్యంలో భారీ లాభాలను అందించే అవకాశం ఉన్న మూడు కీలక కంపెనీల వివరాలు ఇక్కడ ఉన్నాయి.
1. హిందుస్థాన్ కాపర్
ప్రభుత్వ రంగ సంస్థ అయిన హిందుస్థాన్ కాపర్, భారత్లో మైనింగ్ నుంచి రిఫైనింగ్ వరకు పూర్తి స్థాయిలో కార్యకలాపాలు సాగిస్తున్న ఏకైక కంపెనీ. కంపెనీ తన ఉత్పత్తి సామర్థ్యాన్ని ప్రస్తుతం ఉన్న 3.54 మిలియన్ టన్నుల నుంచి 2031 నాటికి 12.2 మిలియన్ టన్నులకు పెంచాలని లక్ష్యంగా పెట్టుకుంది. Q3FY26లో కంపెనీ ఆదాయం ఏకంగా 109% పెరిగి రూ.687 కోట్లకు చేరింది. నికర లాభం కూడా 148% వృద్ధి చెంది రూ.156 కోట్లుగా నమోదైంది.
2. వేదాంత
అనిల్ అగ్వాల్ నేతృత్వంలోని వేదాంత లిమిటెడ్ ఈ త్రైమాసికంలో రికార్డు స్థాయి ఫలితాలను సాధించింది. Q3FY26లో కంపెనీ నికర లాభం 60% పెరిగి రూ.7,807 కోట్లకు చేరింది. కంపెనీ కాపర్ విభాగం ఏడేళ్లలో లేనంత గరిష్టంగా 45 కిలో టన్నుల క్యాథోడ్ ఉత్పత్తిని సాధించింది. మార్జిన్లు 41%కి పెరగడం విశేషం.
3. హిండాల్కో
ఆదిత్య బిర్లా గ్రూపుకు చెందిన హిండాల్కో, రాగితో పాటు అల్యూమినియం రంగంలోనూ అగ్రగామిగా ఉంది. కంపెనీ ఆదాయం ఈ త్రైమాసికంలో 14% పెరిగి రూ. 66,521 కోట్లకు చేరింది. అమెరికాలోని తన అనుబంధ సంస్థ నోవెలిస్లో జరిగిన కొన్ని సాంకేతిక అంతరాయాల వల్ల లాభం 45% తగ్గి రూ.2,049 కోట్లుగా నమోదైనప్పటికీ, భారత్లో కాపర్ వ్యాపారం మాత్రం 33% వృద్ధితో బలంగా ఉంది.
భారతదేశం ప్రస్తుతం తన కాపర్ అవసరాల కోసం దిగుమతులపై ఎక్కువగా ఆధారపడుతోంది. అయితే దేశీయంగా పెరుగుతున్న పారిశ్రామికీకరణ, ఎలక్ట్రికల్ గ్రిడ్ విస్తరణ వల్ల ఈ మూడు కంపెనీలకు రాబోయే రెండేళ్లలో అద్భుతమైన అవకాశాలు ఉన్నాయి. కాపర్ ధరల పెరుగుదల ఈ కంపెనీల మార్జిన్లను మరింత పెంచే అవకాశం ఉంది.
