Credit Freeze : మీ క్రెడిట్ రిపోర్ట్ భద్రంగా ఉందా? క్రెడిట్ ఫ్రీజ్ అంటే ఏమిటి?

Credit Freeze : నేటి డిజిటల్ యుగం ప్రజల జీవితాన్ని సులభతరం చేసినప్పటికీ, డిజిటల్ ఫ్రాడ్ కూడా విపరీతంగా పెరిగింది. సైబర్ నేరగాళ్లు కొత్త పద్ధతుల్లో వ్యక్తిగత సమాచారాన్ని దొంగిలించి, ప్రజల జీవితకాల సంపాదనను ఒక్క క్షణంలో దోచుకుంటున్నారు. ఈ నేరగాళ్లు కేవలం వ్యక్తిగత సమాచారం మాత్రమే కాకుండా, మీ క్రెడిట్ రిపోర్ట్ వివరాలను కూడా దొంగిలించి ఫ్రాడ్ చేసే అవకాశం ఉంది. అందుకే మీ క్రెడిట్ సమాచారాన్ని సురక్షితంగా ఉంచుకోవడం చాలా అవసరం. ఈ భద్రతా ప్రక్రియనే క్రెడిట్ ఫ్రీజ్ లేదా సెక్యూరిటీ ఫ్రీజ్ అని అంటారు.

క్రెడిట్ ఫ్రీజ్ అంటే ఏమిటి?

క్రెడిట్ ఫ్రీజ్ అనేది మీ క్రెడిట్ రిపోర్ట్‌కు ఇచ్చే ఒక రకమైన సెక్యూరిటీ లాక్ వంటిది. ఈ ప్రక్రియ ద్వారా మీ క్రెడిట్ రిపోర్ట్‌ను ఇతరులు యాక్సెస్ చేయకుండా నిరోధించవచ్చు. క్రెడిట్ ఫ్రీజ్ సక్రియంగా ఉన్నప్పుడు, ఏ బ్యాంకు కానీ, రుణదాత కానీ మీ క్రెడిట్ రిపోర్ట్‌ను తనిఖీ చేయలేరు. అంటే మీ పేరు మీద కొత్త లోన్ లేదా క్రెడిట్ కార్డు తీసుకోవడానికి ఎవరైనా ప్రయత్నించినా, వారి అప్లికేషన్ ప్రాసెస్ అవ్వదు. ముఖ్యంగా గమనించవలసిన విషయం ఏమిటంటే.. ఈ ఫ్రీజ్ మీ క్రెడిట్ హిస్టరీ లేదా క్రెడిట్ స్కోర్‌పై ఎలాంటి ప్రభావం చూపదు.

క్రెడిట్ రిపోర్ట్ ఎప్పుడు ఫ్రీజ్ చేయాలి?

మీ క్రెడిట్ డేటా చోరీ అవుతుందని లేదా చోరీ అయ్యే అవకాశం ఉందని మీకు అనుమానం వచ్చినప్పుడు క్రెడిట్ రిపోర్ట్‌ను ఫ్రీజ్ చేయాలి. అలాగే మీ క్రెడిట్ రిపోర్ట్‌లో మీకు తెలియని ఏదైనా అపరిచిత లోన్ ఎంక్వైరీ కనిపించినా, వెంటనే మీ రిపోర్ట్‌ను ఫ్రీజ్ చేసుకోవచ్చు. ఇది మీ సమాచారాన్ని ఉపయోగించి ఫ్రాడ్ జరగకుండా నిరోధించడానికి అత్యంత కీలకమైన భద్రతా చర్య.

క్రెడిట్ రిపోర్ట్‌ను ఎలా ఫ్రీజ్ చేయాలి?

క్రెడిట్ రిపోర్ట్‌ను ఫ్రీజ్ చేయడానికి మీరు ఆన్‌లైన్‌లో క్రెడిట్ బ్యూరోలకు దరఖాస్తు చేసుకోవాలి. ఈ ప్రక్రియ కోసం మీరు ఆధార్ కార్డు, పాన్ కార్డు వంటి ప్రభుత్వ గుర్తింపు పత్రాలు, ఇతర సంబంధిత డాక్యుమెంట్లను ఉపయోగించవచ్చు. ఒకసారి మీరు క్రెడిట్ రిపోర్ట్‌ను ఫ్రీజ్ చేసిన తర్వాత, కొత్త లోన్ తీసుకోవడానికి లేదా కొత్త క్రెడిట్ కార్డుకు అప్లై చేయడానికి ముందు, మీరు తప్పనిసరిగా ఆ ఫ్రీజ్‌ను తాత్కాలికంగా తొలగించాల్సి ఉంటుందని గుర్తుంచుకోవాలి.