Income Tax : జీతం పెరుగుతుంది.. పన్ను భారం తగ్గుతుందా? .. బడ్జెట్ పై సామాన్యుడి ఆశలు

Income Tax : కేంద్ర ప్రభుత్వం బడ్జెట్ 2025లో వార్షిక ఆదాయపు పన్ను మినహాయింపును రూ. 12 లక్షలకు పెంచింది. ఇప్పుడు, రూ. 50 లక్షల వరకు ఆదాయానికి పన్ను మినహాయింపు ఇవ్వాలని డిమాండ్ వస్తోంది. పరిశ్రమల మండలి PHDCCI బుధవారం ఈ ప్రతిపాదనను చేసింది. రూ. 50 లక్షల వరకు వార్షిక ఆదాయం ఉన్న వ్యక్తులకు ఆదాయపు పన్ను రేట్లను భారీగా తగ్గించి, కేవలం అంతకంటే ఎక్కువ ఆదాయం ఉన్నవారికి మాత్రమే 30 శాతం అత్యధిక పన్ను రేటును వర్తింపజేయాలని కోరింది. ప్రస్తుత కొత్త ఆదాయపు పన్ను విధానంలో, రూ. 24 లక్షలకు మించి వార్షిక ఆదాయం ఉన్న వ్యక్తులకు 30 శాతం అత్యధిక పన్ను రేటు వర్తిస్తుంది.

రెవెన్యూ సెక్రటరీ అరవింద్ శ్రీవాస్తవకు సమర్పించిన తమ ప్రి బడ్జెట్ సిఫార్సులలో, PHDCCI డైరెక్ట్ ట్యాక్స్ సిస్టమ్ లో అనేక సంస్కరణలతో పాటు, పరోక్ష పన్నుల విషయంలో కూడా పలు సూచనలు చేసింది. కార్పొరేట్ పన్ను రేట్లను సర్ఛార్జ్‌తో సహా 25 శాతానికి తగ్గించారని, దీని ఫలితంగా పన్ను వసూళ్లు గణనీయంగా పెరిగాయని చాంబర్ గుర్తుచేసింది. కార్పొరేట్ పన్ను రేట్లు తగ్గినా, పన్ను వసూళ్లు పెరిగాయంటే, పన్ను రేట్లలో మార్పులు కంప్లయన్స్‌ను పెంచి, ఆదాయాన్ని పెంచాయని స్పష్టంగా తెలుస్తుంది.

వ్యక్తిగత ఆదాయపు పన్ను రేట్లలో అత్యధికంగా 30 శాతం ఉందని, సర్ఛార్జ్ 5 శాతం నుండి 25 శాతం వరకు ఉండటం వల్ల కొన్ని సందర్భాలలో గరిష్ట పన్ను రేటు 39 శాతం వరకు చేరుకుంటుందని చాంబర్ పేర్కొంది. అధిక ఆదాయపు పన్ను రేట్ల కారణంగా పన్ను చెల్లింపుదారులు తీవ్ర భారం మోస్తున్నారని ఆందోళన చెందుతున్నారు. వారి ఆదాయంలో 40 శాతం ప్రభుత్వానికి వెళుతుందని, మిగిలిన 60 శాతం మాత్రమే వారి సొంత ఖర్చులకు మిగులుతుందని వాదించింది. అభివృద్ధి చెందిన దేశాల్లో పన్ను చెల్లింపుదారులకు లభించే ప్రయోజనాలు, సౌకర్యాలను కూడా చాంబర్ హైలైట్ చేసింది.

చాంబర్ తన నివేదికలో రూ. 30 లక్షల వరకు ఆదాయంపై గరిష్ట పన్ను రేటు 20 శాతం, రూ. 30 లక్షల నుండి రూ. 50 లక్షల వరకు ఆదాయంపై 25 శాతం, రూ. 50 లక్షలకు మించి ఆదాయంపై 30 శాతం ఉండాలని అభ్యర్థించింది. ఇది కంప్లయన్స్, పన్ను వసూళ్లను పెంచడమే కాకుండా, మధ్యతరగతి ప్రజలకు పెద్ద ఊరటనిస్తుంది. కొత్త మ్యానుఫ్యాక్చరింగ్ యూనిట్లను ప్రోత్సహించడానికి ఆదాయపు పన్ను చట్టంలోని సెక్షన్ 115BAB ను తిరిగి అమలు చేయాలని కూడా PHDCCI సూచించింది. ఇది భారతదేశంలో విదేశీ కంపెనీలు తమ అనుబంధ సంస్థలను స్థాపించడానికి, మ్యానుఫ్యాక్చరింగ్ యూనిట్లలో పెట్టుబడి పెట్టడానికి పెద్ద ప్రోత్సాహాన్ని అందిస్తుంది. తద్వారా ఆర్థిక వ్యవస్థ వృద్ధి, ఉద్యోగ కల్పనకు సహాయపడుతుంది.