Share Market : దుమ్ములేపిన షేర్ మార్కెట్.. 76నిమిషాల్లోనే ఇన్వెస్టర్లకు భారీ లాభాలు

Share Market : అటు చూస్తే ఇరాన్-ఇజ్రాయెల్ దేశాల మధ్య ఉద్రిక్త పరిస్థితులు ప్రపంచదేశాలను టెన్షన్ కు గురిచేస్తున్నాయి. కానీ ఇటు మన ఇండియాలో మాత్రం షేర్ మార్కెట్లో పెట్టుబడి పెట్టిన వాళ్ళు నోట్ల కట్టలు లెక్కబెట్టుకున్నారు. వారం చివరి రోజు ప్రపంచవ్యాప్తంగా అంతా గందరగోళంగా ఉన్నా కూడా మన భారత షేర్ మార్కెట్ అదిరిపోయే విధంగా పెరిగిపోయింది. కేవలం 76 నిమిషాల్లోనే పెట్టుబడిదారుల జేబులు నిండిపోయాయి. మార్కెట్ తెరుచుకోగానే సెన్సెక్స్, నిఫ్టీ దూసుకుపోయాయి. దాంతో కోట్లాది రూపాయలు లాభాలు వచ్చాయి.

ఆసియా మార్కెట్లలో కొంచెం మంచి వాతావరణం కనిపించడం, విదేశాల నుంచి డబ్బులు బాగా రావడం వల్ల గత మూడు రోజుల నుంచి పడిపోతున్న సెన్సెక్స్, నిఫ్టీ శుక్రవారం ఉదయాన్నే పెరిగాయి. బీఎస్‌ఈ సెన్సెక్స్ మొదట్లో మామూలుగా మొదలైనా, తర్వాత 289.43 పాయింట్లు పెరిగి 81,651.30 దగ్గర ఓపెన్ అయ్యింది. ఉదయం 10:31 నిమిషాలకల్లా ఏకంగా 750 పాయింట్ల వరకు పెరిగిపోయింది. ఎన్‌ఎస్‌ఈ నిఫ్టీ కూడా రికార్డులు బద్దలు కొడుతూ 25,000 మార్కును దాటేసింది. ఇప్పుడు మార్కెట్లో కనిపించే హెచ్చుతగ్గులు చాలావరకు మధ్యప్రాచ్యంలో ఉన్న పరిస్థితుల వల్లే వస్తున్నాయని నిపుణులు అంటున్నారు. ఒకవేవేళ అక్కడ యుద్ధ టెన్షన్ తగ్గితే మన షేర్ మార్కెట్ ఇంకా పాజిటివ్‌గా ఉండే అవకాశం ఉంది.

వివిధ రంగాల షేర్లలో చూస్తే, నిఫ్టీ రియల్టీ రంగం షేర్లు అన్నింటికంటే బాగా పెరిగాయి. ఏకంగా 1.40% జంప్ అయ్యాయి. తర్వాత నిఫ్టీ పీఎస్‌యూ బ్యాంక్ షేర్లు 1.11% పెరిగాయి. మిడ్‌క్యాప్ 100, ఎనర్జీ రంగాల షేర్లు 0.60% పెరిగాయి. మెటల్, ఇన్‌ఫ్రాస్ట్రక్చర్, ఆయిల్ అండ్ గ్యాస్, ఆటో, బ్యాంక్, ఎఫ్‌ఎంసీజీ రంగాల షేర్లు కూడా కొద్దిగా లాభపడ్డాయి. స్మాల్‌క్యాప్ 100 కూడా 0.50% పెరిగింది. ఫార్మా, ప్రైవేట్ బ్యాంక్ రంగాల షేర్లలో కొద్దిగా పెరుగుదల కనిపించింది. ఐటీ రంగం మాత్రం పెద్దగా మారలేదు, 0.05% మాత్రమే పెరిగింది. అలాగే, మార్కెట్లో భవిష్యత్తుపై ఉండే భయం తగ్గుతున్నట్లు చెప్పే ఇండియా వీఐఎక్స్ (India VIX) ఇండెక్స్ 4.42% తగ్గి 13.63 పాయింట్లకు వచ్చింది.

ప్రభుత్వ ప్రాజెక్టులకు డబ్బు ఇచ్చే కంపెనీలు, అంటే ఐఆర్‌ఈడీఏ (IREDA), పీఎఫ్‌సీ (PFC), ఆర్‌ఈసీ (REC), హడ్కో (HUDCO), ఐఆర్‌ఎఫ్‌సీ (IRFC) లాంటి వాటి షేర్లు 4 శాతం వరకు పెరిగాయి. ఎందుకంటే, ఆర్‌బీఐ ప్రాజెక్టులకు డబ్బు ఇవ్వడంపై కొత్త రూల్స్ ఇచ్చింది. కమర్షియల్ రియల్ ఎస్టేట్ (వ్యాపార భవనాల నిర్మాణం) కోసం బ్యాంకులు 1.25శాతం సాధారణ నిబంధన పెట్టుకోవాలని, ఇళ్ల నిర్మాణం, ఇతర ప్రాజెక్టుల కోసం 1% నిబంధన పెట్టుకోవాలని ఆర్‌బీఐ చెప్పింది.

సెన్సెక్స్‌లో ఉన్న 30 పెద్ద కంపెనీల్లో, మహీంద్రా అండ్ మహీంద్రా, ఇటర్నల్ (జొమాటో పాత పేరు), స్టేట్ బ్యాంక్ ఆఫ్ ఇండియా, అల్ట్రాటెక్ సిమెంట్, బజాజ్ ఫిన్‌సర్వ్, మారుతి షేర్లు బాగా లాభపడ్డాయి. ఇండస్‌ఇండ్ బ్యాంక్, బజాజ్ ఫైనాన్స్, టెక్ మహీంద్రా, కోటక్ మహీంద్రా బ్యాంక్ షేర్లు మాత్రం నష్టపోయాయి. ఆసియా మార్కెట్లలో దక్షిణ కొరియాలోని కాస్పి, జపాన్‌లోని నిక్కీ 225, షాంఘై ఎస్‌ఎస్‌ఈ కాంపోజిట్, హాంగ్‌కాంగ్‌లోని హాంగ్‌సెంగ్ అన్నీ లాభపడ్డాయి. అమెరికా మార్కెట్లు గురువారం సెలవు దినం (జూన్‌టీంథ్) వల్ల మూసివేశారు.

అంతర్జాతీయ మార్కెట్లో బ్రెంట్ క్రూడ్ ఆయిల్ ధర 2.45 శాతం తగ్గి, ఒక్కో బ్యారెల్ $76.92 డాలర్ల దగ్గర ఉంది. షేర్ మార్కెట్ లెక్కల ప్రకారం, విదేశీ పెట్టుబడిదారులు (ఎఫ్‌ఐఐ) గురువారం షేర్లు కొన్నారు, రూ.934.62 కోట్లు లాభపడ్డారు. మన దేశీయ పెట్టుబడిదారులు (డీఐఐ) కూడా రూ.605.97 కోట్ల షేర్లు కొన్నారు.