Diamond Jewelry: ఫెస్టివల్ మార్కెట్లో సరికొత్త ట్రెండ్.. భారీగా పెరగనున్న డైమండ్ విక్రయాలు
డైమండ్ విక్రయాలు
Diamond Jewelry: దేశంలో పండుగల సీజన్ అట్టహాసంగా ప్రారంభమైంది. నవరాత్రుల వేళ మార్కెట్లలో కొనుగోళ్ల జోరు విపరీతంగా పెరిగింది. అయితే ఈసారి ఆభరణాల మార్కెట్ ట్రెండ్ గతంతో పోలిస్తే పూర్తిగా మారిపోయింది. దీనికి ప్రధాన కారణం పసిడి ధరలు ఆకాశాన్నంటుతుండటమే. గత కొన్ని సంవత్సరాలలో పసిడి ధరలు భారీగా పెరగడంతో సామాన్య, మధ్యతరగతి ప్రజల బడ్జెట్ తలకిందులైంది. దీంతో భారీ ఆభరణాలకు స్వస్తి పలికి, తక్కువ బడ్జెట్‌లో లభించే డైమండ్ జ్యువెలరీ కొనుగోలు చేయడానికి వినియోగదారులు అమిత ఆసక్తి చూపుతున్నారు.
పసిడి ధరల పెరుగుదల
గత కొంతకాలంగా పసిడి ధరలు భారీగా పెరగడం ఆభరణాల ప్రియులను ఆందోళనకు గురిచేసింది. నివేదికల ప్రకారం పసిడి ధరలు ఊహించని విధంగా 54 శాతం వరకు ఎగబాకాయి. ఈ నేపథ్యంలో భారీ బంగారు హారాలు కొనుగోలు చేసే బదులు, అదే బడ్జెట్‌లో అందమైన వజ్రాభరణాలను ఎంచుకోవడానికి కస్టమర్లు ప్రాధాన్యత ఇస్తున్నారు. మరోవైపు చిన్న వజ్రాల ధరలు గత సంవత్సరంతో పోలిస్తే సుమారు 25 శాతం వరకు తగ్గడం వినియోగదారులకు మరింత కలిసొచ్చింది. దీంతో పసిడి కంటే డైమండ్స్ కొనుగోలు చేయడం ఆర్థికంగా ఆకర్షణీయమైన డీల్‌గా మారుతోంది.
బడ్జెట్‌కు తగినట్లుగా మారుతున్న డిజైన్లు
బంగారం ధరలు విపరీతంగా పెరగడంతో ప్రజలు ఇప్పుడు రూ.10 వేల నుంచి రూ.లక్ష వరకు ఉండే బడ్జెట్ ఆభరణాలపై ఎక్కువగా దృష్టి పెడుతున్నారు. కస్టమర్ల అవసరాలకు తగినట్లుగా ప్రముఖ ఆభరణాల సంస్థలు సైతం సరికొత్త డిజైన్లను మార్కెట్లోకి తీసుకువస్తున్నాయి. ఆభరణాలను మరింత చౌకగా, అందంగా తీర్చిదిద్దడానికి 18 క్యారెట్లు, 14 క్యారెట్లు చివరికి 9 క్యారెట్ల బంగారంలోనూ వజ్రాలను పొందుపరుస్తున్నారు. దీనివల్ల తక్కువ బడ్జెట్‌లోనే ప్రీమియం లుక్ లభిస్తుండటంతో మార్కెట్లో డైమండ్స్‌కు డిమాండ్ విపరీతంగా పెరుగుతోంది.
రోజువారీ వాడకానికి పెరుగుతున్న ఆదరణ
పెళ్లిళ్లు, ప్రత్యేక వేడుకల కోసం మాత్రమే కాకుండా నిత్య జీవితంలో ధరించేందుకు వీలుగా ఉండే తేలికపాటి ఆభరణాల వైపు కొనుగోలుదారులు ఎక్కువగా మొగ్గు చూపుతున్నారు. ముంబై, దేశంలోని ఇతర ప్రధాన నగరాల్లో రిటైల్ వర్తకులు చెబుతున్న దాని ప్రకారం రూ.25 వేల ప్రారంభ ధర నుంచే అద్భుతమైన డైమండ్ రింగ్స్, ఇయర్ రింగ్స్ అందుబాటులో ఉన్నాయి. కేవలం చూపించడానికి కాకుండా, పదే పదే వేర్వేరు సందర్భాల్లో ధరించడానికి అనుకూలంగా ఉండే డిజైన్లకే కస్టమర్లు మొదటి ప్రాధాన్యత ఇస్తున్నారు.
