Indian Railways : రైల్వే టికెట్ బుకింగ్స్‌లో డిజిటల్ జోరు.. 88 శాతం మంది మొబైల్ నుంచే టికెట్లు

Indian Railways : భారతీయ రైల్వేలో డిజిటల్ విప్లవం కొత్త పుంతలు తొక్కుతోంది. ఇకపై రైలు టికెట్ బుక్ చేసుకోవడం అంటే కౌంటర్ల దగ్గర గంటల తరబడి వేచి ఉండాల్సిన అవసరం లేదని గణాంకాలు చెబుతున్నాయి. ప్రస్తుతం దేశంలో ఏకంగా 88 శాతం రిజర్వేషన్ టికెట్లు ఆన్‌లైన్ ద్వారానే బుక్ అవుతున్నాయని రైల్వే శాఖ మంత్రి అశ్విని వైష్ణవ్ లోక్‌సభలో వెల్లడించారు. అయితే, ఇదే సమయంలో టికెట్ల దళారీలను అరికట్టేందుకు, ప్రయాణికులకు మరింత పారదర్శకమైన సేవలు అందించేందుకు రైల్వే శాఖ ఆధార్ కార్డును తప్పనిసరి చేస్తూ కీలక నిర్ణయం తీసుకుంది.

ఆధార్ వెరిఫికేషన్ - కొత్త నిబంధనలివే

రైల్వే టికెట్ల బుకింగ్‌లో పారదర్శకత పెంచడానికి, దళారీల దోపిడీని అరికట్టడానికి ప్రభుత్వం కఠినమైన చర్యలు చేపట్టింది. జూలై 1, 2025 నుంచి తత్కాల్ టికెట్లను కేవలం ఆధార్ వెరిఫైడ్ యూజర్లు మాత్రమే బుక్ చేసుకోగలరు. సాధారణ రిజర్వేషన్లు ప్రారంభమైన మొదటి రోజు కూడా కేవలం ఆధార్ ధృవీకరించబడిన ఖాతాలకే ఆన్‌లైన్ బుకింగ్ అందుబాటులో ఉంటుంది. అయితే, ఆధార్ లింక్ చేయని వారి ఖాతాలను పూర్తిగా మూసివేయలేదని, కానీ వారు కొన్ని పరిమితులతో టికెట్లు బుక్ చేసుకోవాల్సి ఉంటుందని రైల్వే తెలిపింది. ఈ నిబంధన వల్ల ఒకే వ్యక్తి వేర్వేరు పేర్లతో నకిలీ అకౌంట్లు సృష్టించడం సాధ్యం కాదు.

ఆన్‌లైన్ వర్సెస్ కౌంటర్ - గణాంకాలు ఏం చెబుతున్నాయి?

2025-26 ఆర్థిక సంవత్సరంలో ఫిబ్రవరి నాటి గణాంకాలను పరిశీలిస్తే, ప్రయాణికులు డిజిటల్ ప్లాట్‌ఫామ్‌లకే ఓటు వేస్తున్నారు. ఈ కాలంలో సుమారు 48.25 కోట్ల టికెట్లు ఆన్‌లైన్ ద్వారా బుక్ అవ్వగా, కేవలం 6.15 కోట్ల టికెట్లు మాత్రమే స్టేషన్ కౌంటర్ల దగ్గర అమ్ముడయ్యాయి. దీన్ని బట్టి ప్రయాణికులు ఐఆర్‌సీటీసీ వెబ్‌సైట్ లేదా యాప్‌ను వాడుకోవడానికి ఎంత ప్రాధాన్యత ఇస్తున్నారో అర్థం చేసుకోవచ్చు. ఆన్‌లైన్ సిస్టమ్‌ను నిరంతరం అప్‌గ్రేడ్ చేయడానికి ఐఆర్‌సీటీసీ వసూలు చేసే కన్వీనియన్స్ ఫీజు కూడా ప్రయాణికులకు పెద్ద భారంగా అనిపించడం లేదు.

నకిలీ ఐడీల ఏరివేత - రైల్వే స్పెషల్ డ్రైవ్

టికెట్ దళారీల ఆగడాలను అరికట్టేందుకు రైల్వే శాఖ భారీ స్థాయిలో సెర్చింగ్ ఆపరేషన్ నిర్వహించింది. 2025లో ఏకంగా 3.04 కోట్ల నకిలీ యూజర్ ఐడీలను శాశ్వతంగా మూసివేసింది. మరో 2.94 కోట్ల అకౌంట్లను తాత్కాలికంగా సస్పెండ్ చేసింది. తత్కాల్ టికెట్లను సామాన్యులకు దక్కకుండా బాట్ టెక్నాలజీతో బుక్ చేసే వారిపై కూడా ఉక్కుపాదం మోపింది. యాంటీ-బాట్ టెక్నాలజీ ద్వారా సుమారు 64 శాతం అనుమానాస్పద ట్రాఫిక్‌ను అడ్డుకోగలిగారు. సైబర్ క్రైమ్ పోర్టల్‌లో కూడా దళారీలపై వందలాది ఫిర్యాదులు నమోదయ్యాయి.

టెక్నాలజీతో పారదర్శకత - భవిష్యత్తు ప్రణాళిక

వెబ్‌సైట్‌లో లోడ్ తగ్గించడానికి కంటెంట్ డెలివరీ నెట్‌వర్క్ (CDN)ను రైల్వే ఏర్పాటు చేసింది. దీనివల్ల బుకింగ్ సమయంలో సైట్ హ్యాంగ్ అవ్వకుండా ప్రయాణికులు వేగంగా లావాదేవీలు పూర్తి చేయవచ్చు. వెయిటింగ్ లిస్ట్ టికెట్లను క్యాన్సిల్ చేసుకుంటే పాత పద్ధతిలోనే క్లర్కేజ్ ఛార్జీలు వర్తిస్తాయని ప్రభుత్వం స్పష్టం చేసింది. రైల్వే వ్యవస్థను పూర్తిగా డిజిటలైజ్ చేయడంతో పాటు సామాన్యుడికి సీటు దొరికేలా చూడటమే తమ ప్రధాన లక్ష్యమని అశ్విని వైష్ణవ్ పేర్కొన్నారు. మరిన్ని సెక్యూరిటీ ఫీచర్లను జోడించి రైల్వే ప్రయాణాన్ని మరింత సులభతరం చేసేందుకు నిరంతర కృషి జరుగుతోంది.