Digital India: మోదీ సర్కారు 11ఏళ్ల డిజిటల్ మిషన్.. భారత్ ఎలా మారింది ? ఎంత విజయం సాధించింది ?

Digital India: నరేంద్ర మోదీ ప్రభుత్వం అధికారంలోకి వచ్చి 11ఏళ్లు పూర్తయింది. 2014 నుంచి 2025 వరకు కేంద్ర ప్రభుత్వం టెక్నాలజీ రంగంలో ఎన్నో కీలకమైన చర్యలు తీసుకుంది. మారుమూల ప్రాంతాల ప్రజలకు కూడా ఇంటర్నెట్ అందుబాటులోకి తీసుకురావడం, కనెక్టివిటీని బలోపేతం చేయడం, 5G సేవలను విస్తరించడం, భారత్ AI మిషన్‌ను ప్రారంభించడం వంటి కార్యక్రమాలతో, దేశం నేడు టెక్నాలజీ విషయంలో చాలా పటిష్టంగా మారింది. ఇది డిజిటల్ ఇండియా దార్శనికతకు నిదర్శనం.

ప్రతి ఇంటికి ఇంటర్నెట్

మోడీ ప్రభుత్వం కేంద్రంలో అధికారంలోకి వచ్చిన తర్వాత, గత 11 ఏళ్లలో దేశంలోని గ్రామీణ ప్రాంతాల్లో మొబైల్ నెట్‌వర్క్ వేగంగా విస్తరించింది. ప్రజలకు పటిష్టమైన, మెరుగైన ఇంటర్నెట్ కనెక్టివిటీ లభించింది. మార్చి 2014లో మొత్తం అర్బన్ టెలిఫోన్ కనెక్షన్లు 555.23 మిలియన్లు ఉండగా, అక్టోబర్ 2024 నాటికి ఇది 661.36 మిలియన్లకు పెరిగింది. మార్చి 2014లో గ్రామీణ టెలిఫోన్ కనెక్షన్ల సంఖ్య 377.78 మిలియన్లు ఉండగా, అక్టోబర్ 2024 నాటికి ఇది 527.34 మిలియన్లకు పెరిగింది. మార్చి 2014లో భారతదేశంలో మొత్తం 93.3 కోట్ల టెలిఫోన్ కనెక్షన్లు ఉండగా, ఏప్రిల్ 2025 నాటికి ఇది 120 కోట్లకు పైగా పెరిగే అవకాశం ఉంది. ఈ పెరుగుదల దేశవ్యాప్తంగా కనెక్టివిటీ విస్తరణను సూచిస్తుంది. ఇంటర్నెట్ వినియోగంలో కూడా భారత్ భారీ పురోగతి సాధించింది.

మార్చి 2014లో మొత్తం ఇంటర్నెట్ కనెక్షన్ల సంఖ్య 251.5 మిలియన్లు ఉండగా, జూన్ 2024 నాటికి ఇది 969.6 మిలియన్లకు పెరిగింది. పదేళ్లలో ఇంటర్నెట్ కనెక్షన్లు 285.53 శాతం పెరిగాయి. మార్చి 2014లో దేశంలో 6.1 కోట్ల బ్రాడ్‌బ్యాండ్ కనెక్షన్లు ఉండగా, ఆగస్టు 2024 నాటికి ఇది 94.92 కోట్లకు చేరింది. పదేళ్లలో 1452 శాతం భారీ పెరుగుదల నమోదైంది. 2016 నుండి దేశంలో 4G కనెక్టివిటీ వేగంగా విస్తరించింది. దీని ఫలితంగా ఈ రోజు దేశంలోని మూలమూలలకూ హై-స్పీడ్ ఇంటర్నెట్ అందుబాటులో ఉంది. దేశంలోని 6,44,131 గ్రామాలలో, డిసెంబర్ 2024 నాటికి 6,15,836 గ్రామాలు 4G మొబైల్ కనెక్టివిటీని పొందాయి. ఇది గ్రామీణ భారతదేశంలో డిజిటల్ అక్షరాస్యతను పెంచుతోంది.ః

5G మాయ

అక్టోబర్ 2022లో 5G సేవలు ప్రారంభమైనప్పటి నుండి దేశం డిజిటల్ ప్రయాణం మరింత వేగవంతమైంది. కేవలం 22 నెలల్లో భారతదేశం 4.74 లక్షల బేస్ ట్రాన్స్‌సీవర్ స్టేషన్లను నిర్మించింది. 5G సేవలు 99.6 శాతం జిల్లాల్లో అందుబాటులోకి వచ్చాయి. 5G రాకతో ఇంటర్నెట్ వేగం పెరిగి, డేటా వినియోగం సులభతరం అయ్యింది. ఇది డిజిటల్ లావాదేవీలు, ఆన్‌లైన్ విద్య, టెలిమెడిసిన్ వంటి రంగాలకు మరింత బలాన్ని ఇస్తోంది.

తగ్గిన ఇంటర్నెట్ ధర

2014లో 1GB ఇంటర్నెట్‌కు ప్రజలు రూ.308 వరకు ఖర్చు చేయాల్సి వచ్చేది. కానీ మోదీ ప్రభుత్వం వచ్చాక ఇంటర్నెట్ ధరలను గణనీయంగా నియంత్రించారు. 2022లో 1GB ఇంటర్నెట్ ఖర్చులో భారీ తగ్గింపు కనిపించింది. దాని ధర కేవలం రూ.9.34కు తగ్గింది. ఇది సామాన్య ప్రజలకు ఇంటర్నెట్‌ను మరింత అందుబాటులోకి తెచ్చింది. తద్వారా డిజిటల్ సేవలను ఎక్కువ మంది వినియోగించుకోవడానికి అవకాశం కల్పించింది.

భారత్‌నెట్

మోదీ ప్రభుత్వం డిజిటల్ ఇండియా మిషన్ ముఖ్య ఉద్దేశాలలో ఒకటి గ్రామీణ ప్రాంతాలను ఇంటర్నెట్‌కు అనుసంధానించడం. ఈ దిశగా భారత్‌నెట్ (BharatNet) ప్రాజెక్ట్ కీలక పాత్ర పోషించింది. జనవరి 2025 నాటికి, భారత్‌నెట్ పథకం కింద 2.18 లక్షలకు పైగా గ్రామ పంచాయితీలకు ఇంటర్నెట్ సదుపాయం కల్పించారు. ఈ చొరవ కింద ప్రభుత్వం 6.92 లక్షల కిలోమీటర్ల ఆప్టికల్ ఫైబర్ కేబుల్‌ను వేసింది. ఇది గ్రామీణ భారతదేశంలో డిజిటల్ సేవలను అందించడంలో విప్లవాత్మక మార్పులు తీసుకొచ్చింది.

డిజిలాకర్

2015లో ప్రజలు తమ ముఖ్యమైన పత్రాలను డిజిటల్ రూపంలో సురక్షితంగా నిల్వ చేయడానికి డిజిలాకర్ ను ప్రారంభించారు. 2015లో సంవత్సరానికి 9.98 లక్షల మంది యూజర్లు సైన్ అప్ చేసుకోగా, తొమ్మిదేళ్ల తర్వాత (2024లో) ఈ సంఖ్య 20.32 కోట్లకు పెరిగింది. డ్రైవింగ్ లైసెన్స్, ఆధార్, పాన్ కార్డ్ వంటి పత్రాలను ఎప్పుడైనా, ఎక్కడైనా యాక్సెస్ చేయడానికి డిజిలాకర్ వీలు కల్పిస్తుంది. ఇది కాగిత రహిత పాలనకు దోహదపడుతుంది.

భారత్ AI మిషన్

ప్రధాని నరేంద్ర మోదీ నాయకత్వంలో, ప్రభుత్వం మార్చి 7, 2024న భారత్ AI మిషన్ను ఆమోదించింది. మే 30, 2025 నాటికి దేశం కంప్యూట్ కెపాసిటీ 34 వేల GPUలను దాటింది. ఇది AI ఆధారిత పరిశోధన, అభివృద్ధికి ఒక బలమైన పునాదిని సూచిస్తుంది. 2030 నాటికి దేశం మొత్తం ఆర్థిక వ్యవస్థలో డిజిటల్ ఆర్థిక వ్యవస్థ ఐదవ వంతు వాటాను కలిగి ఉంటుందని అంచనా. ఇది టెక్నాలజీలో దేశం ఎంత బలంగా మారుతుందో స్పష్టంగా తెలియజేస్తుంది. మొత్తంగా, మోదీ ప్రభుత్వం డిజిటల్ ఇండియాను కేవలం ఒక నినాదంగా కాకుండా, ఒక వాస్తవంగా మార్చడానికి తీవ్రంగా కృషి చేసింది.