Digital India : ఇండియాలో డిజిటల్ విప్లవం.. ఫోన్లో కచ్చితంగా ఉండాల్సిన 12 ప్రభుత్వ యాప్స్ ఇవే

Digital India : డిజిటల్ ఇండియా దిశగా అడుగులు వేస్తున్న మన దేశంలో ప్రభుత్వ సేవలు సామాన్యులకు మరింత చేరువయ్యాయి. గత దశాబ్ద కాలంలో భారత ప్రభుత్వం ప్రజల సౌకర్యార్థం అనేక మొబైల్ అప్లికేషన్లను అందుబాటులోకి తీసుకొచ్చింది. ప్రభుత్వ కార్యాలయాల చుట్టూ తిరిగే పని లేకుండా, ఎలాంటి పేపర్ వర్క్ అవసరం లేకుండా ఇంట్లోనే కూర్చుని పనులు పూర్తి చేసుకునేందుకు ఈ యాప్స్ ఎంతగానో ఉపయోగపడుతున్నాయి. అధికారిక పత్రాల డిజిటల్ కాపీలను భద్రపరచడం నుంచి ప్రయాణాలు, ఆరోగ్య రికార్డులు, డిజిటల్ చెల్లింపుల వరకు మన రోజువారీ పనులను సులభతరం చేసే టాప్-12 అఫీషియల్ యాప్స్ గురించి వివరంగా తెలుసుకుందాం.

డాక్యుమెంట్లు, గుర్తింపు కార్డులు, సేవల కోసం టాప్ యాప్స్

1. డిజిలాకర్ :

కేంద్ర ఐటీ మంత్రిత్వ శాఖ ఆధ్వర్యంలో నడిచే ఈ యాప్ డిజిటల్ ఇండియా ప్రోగ్రామ్‌లో అత్యంత కీలకమైనది. ఇన్వెస్టర్లు, డ్రైవర్లు, విద్యార్థులు తమ డ్రైవింగ్ లైసెన్స్, వాహన రిజిస్ట్రేషన్ సర్టిఫికేట్, విద్యా అర్హత పత్రాలు, ఇన్సూరెన్స్ పేపర్స్ వంటి ముఖ్యమైన డాక్యుమెంట్లను ఇందులో డిజిటల్ రూపంలో భద్రపరుచుకోవచ్చు. ఈ యాప్ ద్వారా జారీ చేయబడిన డిజిటల్ పత్రాలు అన్ని ప్రభుత్వ, ప్రైవేట్ తనిఖీలలో చట్టబద్ధంగా పూర్తిగా చెల్లుబాటు అవుతాయి.

2. ఉమంగ్ :

యూనిఫైడ్ మొబైల్ అప్లికేషన్ ఫర్ న్యూ-ఏజ్ గవర్నెన్స్ (UMANG) అనేది వందలాది కేంద్ర, రాష్ట్ర ప్రభుత్వ సేవలకు ఒకే ఒక్క వేదికగా పనిచేస్తుంది. వినియోగదారులు వేర్వేరు యాప్స్ వాడే అవసరం లేకుండా ఒకే ప్లాట్‌ఫామ్ నుంచి ఈపీఎఫ్ఓ , పాన్ కార్డ్, ఆరోగ్యం, విద్య, కరెంట్, గ్యాస్ బిల్లుల వంటి యుటిలిటీ సేవలకు సంబంధించిన సమాచారాన్ని ఇక్కడ పొందవచ్చు.

3. ఎమ్‌ఆధార్ :

భారత విశిష్ట గుర్తింపు ప్రాధికార సంస్థ (UIDAI) రూపొందించిన అధికారిక యాప్ ఇది. వినియోగదారులు తమ ఆధార్ కార్డు డిజిటల్ కాపీని ఇందులో ఎల్లప్పుడూ భద్రంగా ఉంచుకోవచ్చు. ప్రయాణాల్లో లేదా ఇతర వెరిఫికేషన్ సమయాల్లో ఒరిజినల్ కార్డు లేనప్పుడు ఐడెంటిటీ ప్రూఫ్ కోసం వర్చువల్ ఐడీని క్రియేట్ చేసుకోవడానికి, అలాగే కొన్ని వ్యక్తిగత వివరాలను అప్‌డేట్ చేసుకోవడానికి ఈ యాప్ ఎంతో ఉపయోగపడుతుంది.

4. భీమ్ యాప్ :

భారత్ ఇంటర్‌ఫేస్ ఫర్ మనీ (BHIM) అనేది యూపీఐ ఆధారిత డిజిటల్ చెల్లింపులు, డబ్బు బదిలీ చేయడానికి కేంద్ర ప్రభుత్వం తీసుకొచ్చిన అఫీషియల్ ప్లాట్‌ఫామ్. ప్రస్తుతం మార్కెట్లో ఎన్నో ప్రైవేట్ పేమెంట్ యాప్స్ హవా నడుస్తున్నప్పటికీ, సురక్షితమైన లావాదేవీల కోసం ప్రభుత్వం అందిస్తున్న ప్రధాన డిజిటల్ చెల్లింపుల సాధనంగా భీమ్ యాప్ నిలుస్తోంది.

5. ఎం పరివాహన్ :

రోడ్డు రవాణా, రహదారుల మంత్రిత్వ శాఖకు చెందిన ఈ యాప్ వాహనదారులకు ఒక వరం లాంటిది. మీ వాహనం ఆర్సీ, డ్రైవింగ్ లైసెన్స్ డిజిటల్ కాపీలను ఇందులో చూయించవచ్చు. అంతేకాకుండా ఏదైనా సెకండ్ హ్యాండ్ వాహనం కొనేటప్పుడు దాని యజమాని వివరాలు, వాహన ఫిట్‌నెస్ సమాచారాన్ని ఇన్‌స్టంట్‌గా వెరిఫై చేసుకోవడానికి ఇది బాగా హెల్ప్ అవుతుంది.

6. ఫాస్ట్‌ట్యాగ్:

‘నేషనల్ ఎలక్ట్రానిక్ టోల్ కలెక్షన్’ సిస్టమ్‌తో అనుసంధానించబడిన ఈ FASTag App ద్వారా వాహనదారులు తమ టోల్ ప్లాజా చెల్లింపులను సులభంగా ట్రాక్ చేయవచ్చు. ఇందులో మీ ఫాస్ట్‌ట్యాగ్ అకౌంట్‌ను రీఛార్జ్ చేసుకోవడం, పాత లావాదేవీల (ట్రాన్సాక్షన్స్) హిస్టరీని ఎప్పటికప్పుడు పర్యవేక్షించడం చాలా ఈజీ.

ఆరోగ్యం, ప్రయాణం, పౌర సేవలకు సంబంధించిన యాప్స్

7. అభా యాప్ :

ఆయుష్మాన్ భారత్ హెల్త్ అకౌంట్ (ABHA) యాప్ ద్వారా ప్రతి పౌరుడు తమకంటూ ఒక ప్రత్యేకమైన డిజిటల్ హెల్త్ ఐడీని క్రియేట్ చేసుకోవచ్చు. దేశవ్యాప్తంగా ఒక సమగ్ర డిజిటల్ ఆరోగ్య వ్యవస్థను నిర్మించాలనే లక్ష్యంతో ప్రభుత్వం దీనిని తెచ్చింది. ఇందులో మీ పాత ప్రిస్క్రిప్షన్లు, ల్యాబ్ రిపోర్టులు, మెడికల్ హిస్టరీని డిజిటల్ పద్ధతిలో మేనేజ్ చేసుకోవచ్చు.

8. ఆరోగ్య సేతు :

ప్రారంభంలో కరోనా మహమ్మారి వ్యాప్తి సమయంలో కాంటాక్ట్ ట్రేసింగ్ కోసం ఈ యాప్ లాంచ్ అయినప్పటికీ, ప్రస్తుతం ఇది ఒక పెద్ద హెల్త్ అండ్ పబ్లిక్ ఇన్ఫర్మేషన్ ప్లాట్‌ఫామ్‌గా మారిపోయింది. ప్రజారోగ్యానికి సంబంధించిన తాజా గైడ్‌లైన్స్, హెల్త్ సర్వీసెస్ సమాచారం ఇందులో అందుబాటులో ఉన్నాయి.

9. రైల్ మదద్ :

భారతీయ రైల్వేలో ప్రయాణించే ప్యాసింజర్లకు ఈ యాప్ అత్యంత రక్షణ కల్పిస్తుంది. ప్రయాణంలో ఎదురయ్యే ఎలాంటి సమస్యలపైనైనా (పరిశుభ్రత, భద్రత, ఆహార నాణ్యత మొదలైనవి) ఇందులో కంప్లైంట్ రిజిస్టర్ చేయవచ్చు. అలాగే మీ ఫిర్యాదు యొక్క ప్రస్తుత స్టేటస్‌ను లైవ్‌లో ట్రాక్ చేస్తూ తక్షణ సహాయాన్ని పొందవచ్చు.

10. ఐఆర్‌సీటీసీ రైల్ కనెక్ట్ :

ఇది భారతీయ రైల్వే అధికారిక టికెట్ బుకింగ్ అప్లికేషన్. ప్రయాణికులు నేరుగా తమ స్మార్ట్‌ఫోన్ నుంచే రైలు టికెట్లను బుక్ చేసుకోవడం, క్యాన్సిల్ చేయడం, రీఫండ్ స్టేటస్ చెక్ చేసుకోవడంతో పాటు ట్రైన్ రన్నింగ్ లైవ్ స్టేటస్, పీఎన్ఆర్ వివరాలను క్షుణ్ణంగా తెలుసుకోవచ్చు.

11. మైగవ్ :

భారత పౌరులు నేరుగా ప్రభుత్వ విధాన నిర్ణయాలలో భాగస్వామ్యం పంచుకునేందుకు రూపొందించిన అద్భుతమైన వేదిక ఇది. ఇందులో వినియోగదారులు వివిధ ప్రభుత్వ సర్వేలలో పాల్గొనవచ్చు, నూతన పాలసీలపై తమ సలహాలు, సూచనలను చర్చల ద్వారా మేనేజ్‌మెంట్‌కు పంపవచ్చు.

12. పీఎం కిసాన్ యాప్ :

దేశంలోని అన్నదాతల కోసం ప్రత్యేకంగా డిజైన్ చేసిన అప్లికేషన్ ఇది. పీఎం-కిసాన్ గౌరవ నిధి యోజన లబ్ధిదారులు ఈ యాప్ ద్వారా తమ అకౌంట్‌కు జమ అయిన ఇన్స్టాల్‌మెంట్ స్టేటస్‌ను చెక్ చేసుకోవచ్చు, ల్యాండ్ వివరాలను అప్‌డేట్ చేయడంతో పాటు స్కీమ్‌కు సంబంధించిన తాజా సమాచారాన్ని ఇక్కడే పొందవచ్చు.

ఈ యాప్స్ మీ ఫోన్ లో ఎందుకు ఉండాలి?

రోజురోజుకూ ప్రభుత్వ రంగానికి చెందిన అన్ని సేవలు ఆన్‌లైన్ మయమవుతున్నాయి. డిజిలాకర్, భీమ్ వంటి పాపులర్ యాప్స్ గురించి చాలా మందికి తెలిసినప్పటికీ.. రైల్ మదద్, అభా, మైగవ్ వంటి అద్భుతమైన యాప్స్ గురించి ఇంకా పూర్తి స్థాయిలో అవగాహన లేదు. మీ స్మార్ట్‌ఫోన్ లో ఈ ఉపయోగకరమైన యాప్స్‌ను ఇన్‌స్టాల్ చేసుకోవడం ద్వారా ప్రభుత్వ కార్యాలయాల చుట్టూ తిరిగే శ్రమ తగ్గడమే కాకుండా సమయం, డబ్బు కూడా ఆదా అవుతాయి.