Disney Layoffs: డిస్నీలో తీవ్ర సంక్షోభం.. వేలాది మంది ఉద్యోగాలు ఊడే ఛాన్స్
ఉద్యోగాలు ఊడే ఛాన్స్
Disney Layoffs: ప్రపంచ ప్రఖ్యాత ఎంటర్‌టైన్‌మెంట్ దిగ్గజం డిస్నీలో పనిచేస్తున్న ఉద్యోగులకు మళ్లీ కష్టకాలం మొదలైంది. సంస్థ తన వార్షిక ఖర్చులలో ఏకంగా 20 శాతం వరకు కోత విధించడానికి భారీ ప్రణాళికను సిద్ధం చేస్తోంది. ఈ సంచలన నిర్ణయం వల్ల కంపెనీలోని వివిధ విభాగాల్లో పనిచేస్తున్న వేలాది మంది ఉద్యోగుల ఉద్యోగాలపై తీవ్ర అనిశ్చితి నెలకొంది. అధికారికంగా ఎంతమందిని తొలగిస్తారనే దానిపై స్పష్టమైన ప్రకటన రానప్పటికీ, లోపల మాత్రం లేఆఫ్స్‌కు సంబంధించిన ఏర్పాట్లు శరవేగంగా జరుగుతున్నాయని అంతర్జాతీయ మీడియా వర్గాలు స్పష్టం చేస్తున్నాయి.
మేనేజర్లకు బడ్జెట్ కోత ఆదేశాలు
బ్లూమ్‌బెర్గ్ నివేదిక ప్రకారం.. డిస్నీ యాజమాన్యం తమ విభాగాధిపతులకు, మేనేజర్లకు స్పష్టమైన ఆదేశాలు జారీ చేసింది. తమ శాఖలకు సంబంధించి ఏడాది ఖర్చులలో 20 శాతం వరకు తగ్గించే మార్గాలను అన్వేషించాలని ఆదేశించింది. మేనేజర్లు ఈ భారీ బడ్జెట్ కోత లక్ష్యాన్ని చేరుకోవడానికి ఉద్యోగుల సంఖ్యను తగ్గించే మార్గాన్నే ఎంచుకోవచ్చని సమాచారం. డిస్నీ కింద పనిచేసే థీమ్ పార్కులు, టీవీ నెట్‌వర్క్‌లు, ఫిల్మ్ స్టూడియోలు వంటి ప్రధాన వ్యాపార విభాగాలపై ఈ ఉద్యోగుల కోత ప్రభావం తీవ్రంగా ఉండే అవకాశం ఉంది.
ఆదా చేసిన నిధులతో కొత్త వ్యాపారాలు
కేవలం నిధులు పొదుపు చేయడమే కాకుండా, భవిష్యత్తులో మంచి లాభాలు తెచ్చిపెట్టే వ్యాపార రంగాలలో పెట్టుబడులు పెట్టాలని డిస్నీ భావిస్తోంది. ఖర్చుల కోత ద్వారా ఆదా అయిన సొమ్మును కొత్త టెక్నాలజీ, టీవీ ప్రోగ్రామింగ్, థీమ్ పార్కుల విస్తరణతో పాటు క్రూయిజ్ షిప్ వ్యాపారంలోకి మళ్లించనున్నారు. ప్రస్తుత ఆర్థిక సంవత్సరంలో తమ షేర్ల రాబడిని రెండు అంకెల స్థాయిలో పెంచుకోవాలని కంపెనీ లక్ష్యంగా పెట్టుకుంది. ఈ క్రమంలోనే ఖర్చులను నియంత్రించడం ఇప్పుడు కంపెనీ వ్యూహంలో అత్యంత కీలక భాగముగా మారింది.
ఎంటర్‌టైన్‌మెంట్ రంగంలో సంక్షోభం
ప్రస్తుతం తీవ్ర ఒత్తిడిని ఎదుర్కొంటున్న మీడియా సంస్థలలో డిస్నీ ఒక్కటే లేదు. గత కొద్దికాలంగా నెట్‌ఫ్లిక్స్, సోనీ పిక్చర్స్, పారామౌంట్, వార్నర్ బ్రదర్స్ వంటి దిగ్గజ కంపెనీలు కూడా పెద్ద ఎత్తున ఉద్యోగులను తొలగించాయి. ప్రేక్షకుల అలవాట్లలో వచ్చిన మార్పులే ఈ పరిస్థితికి ప్రధాన కారణం. సాంప్రదాయ టెలివిజన్ నుంచి వచ్చే ఆదాయం గణనీయంగా పడిపోగా, స్ట్రీమింగ్ ప్లాట్‌ఫామ్‌లలో కొత్త చందాదారుల పెరుగుదల మందగించింది. ఆన్‌లైన్ వీడియోలు, సోషల్ మీడియా వినియోగం పెరగడం కూడా ఈ రంగాన్ని కోలుకోలేని దెబ్బ తీసింది.
ముదిరిన పోటీతో కఠిన నిర్ణయాలు
ఆపిల్, అమెజాన్ వంటి గ్లోబల్ టెక్ దిగ్గజాలు తమ సొంత స్ట్రీమింగ్ సేవలతో వినోద రంగంలోకి అడుగుపెట్టడం పోటీని మరింత తీవ్రం చేసింది. తీవ్రమైన పోటీ వాతావరణంలో తట్టుకుని నిలబడేందుకు డిస్నీ వంటి సంస్థలు కఠిన నిర్ణయాలు తీసుకోక తప్పడం లేదు. ఫలితంగా వేలాది మంది సామాన్య ఉద్యోగులు తమ ఉపాధిని కోల్పోయే పరిస్థితి ఏర్పడుతోంది. రాబోయే వారాల్లో ఈ లేఆఫ్స్ ప్రక్రియకు సంబంధించి మరిన్ని వివరాలు వెలువడే అవకాశముంది.
