EPF : ఈపీఎఫ్‌ఓ పెన్షన్ పొందాలంటే ఇది చేయాల్సిందే.. లేదంటే నష్టపోతారు జాగ్రత్త!

EPF : మీరు ఉద్యోగం చేస్తున్నట్లు అయితే ప్రతి నెలా మీ జీతం నుండి కొంత భాగం పీఎఫ్ అంటే ప్రోవిడెంట్ ఫండ్ లోకి వెళ్తుంది. ఈ డబ్బు మీ భవిష్యత్తు భద్రత కోసం ఉద్దేశించింది. ఈ పీఎఫ్ అకౌంట్ నుండి పొదుపు మాత్రమే కాదు, పదవీ విరమణ తర్వాత పెన్షన్ కూడా పొందవచ్చు. అయితే, దీనికి కొన్ని నియమాలను పాటించడం చాలా ముఖ్యం. పొరపాటున మీరు మీ పీఎఫ్ డబ్బు మొత్తాన్ని తీసేసుకుంటే పెన్షన్ రాకపోవచ్చు.

ప్రతి నెలా మీ బేసిక్ సాలరీలో 12% శాతం పీఎఫ్ ఖాతాలో జమ అవుతుంది. అంతేకాదు, మీ కంపెనీ కూడా అంతే మొత్తాన్ని తన ఖజానా నుండి జమ చేస్తుంది. అయితే ఈ మొత్తం డబ్బు ఒకే చోట జమ అవ్వదు. కంపెనీ జమ చేసే 12%లో 8.33% శాతం ఈపీఎస్ అంటే ఉద్యోగుల పెన్షన్ పథకంలోకి వెళ్తుంది. మిగిలిన 3.67% శాతం మీ ఈపీఎఫ్ అంటే ఉద్యోగుల ప్రోవిడెంట్ ఫండ్‌లోకి వెళ్తుంది. ఈ ఈపీఎస్ భాగమే మీకు పదవీ విరమణ తర్వాత పెన్షన్‌ను అందిస్తుంది.

మీరు 10 సంవత్సరాల పాటు శ్రమించి పీఎఫ్ ఖాతాలో డబ్బు జమ చేశారు అనుకుందాం. ఇప్పుడు 50 సంవత్సరాల వయస్సులో మీకు పెన్షన్ లభిస్తుందని ఆశిస్తున్నారు. కానీ మీరు ఉద్యోగం మానేసినప్పుడు లేదా మధ్యలో పీఎఫ్ డబ్బు మొత్తాన్ని తీసేసుకుంటే, అందులో ఈపీఎస్ భాగం కూడా చేరి ఉంటే, మీకు పెన్షన్‌గా ఒక్క రూపాయి కూడా లభించదు. ఈపీఎస్ డబ్బును తీసేసుకోవడం అంటే మీరు మీ పెన్షన్ పొందే హక్కును కోల్పోయినట్టే. చాలా మంది ఉద్యోగం మారేటప్పుడు లేదా అవసరం వచ్చినప్పుడు తొందరపడి పీఎఫ్ డబ్బు మొత్తాన్ని తీసేసుకుంటారు. ఇక్కడే పొరపాటు జరుగుతుంది. కాబట్టి, తదుపరిసారి పీఎఫ్ డబ్బును తీసేసుకునే ముందు బాగా ఆలోచించుకుని నిర్ణయం తీసుకోండి.

మరిప్పుడు పెన్షన్‌ను ఎలా సురక్షితంగా ఉంచుకోవాలంటే ఈపీఎస్ ఫండ్‌ను ముట్టుకోవద్దు. మీకు పీఎఫ్ నుండి డబ్బు తీయాల్సి వస్తే, కేవలం ఈపీఎఫ్ లోని భాగాన్ని మాత్రమే తీసుకోండి. ఈపీఎస్ ఫండ్‌ను అలాగే వదిలేయండి. ఇలా చేయడం వల్ల మీరు 50 ఏళ్ల తర్వాత పెన్షన్‌కు అర్హులుగా ఉంటారు. మీరు 10 సంవత్సరాలు లేదా అంతకంటే ఎక్కువ కాలం పీఎఫ్ ఖాతాలో జమ చేసి, ఈపీఎస్ ఫండ్‌ను ముట్టుకోకుండా ఉంటే, 50 సంవత్సరాల వయస్సు తర్వాత మీరు పెన్షన్ కోసం క్లెయిమ్ చేయవచ్చు. ఈ పెన్షన్ మీ రిటైర్మెంట్ జీవితాన్ని సులభతరం చేస్తుంది.

ఈపీఎఫ్‌ఓ 2025 జనవరి 1 నుండి ఒక సౌకర్యాన్ని ప్రారంభించింది, ఇది పెన్షన్ పొందే విధానాన్ని మరింత సులభతరం చేసింది. ఇప్పుడు మీరు ఏ బ్యాంక్ నుండి అయినా మీ పెన్షన్‌ను తీసుకోవచ్చు. గతంలో ఈ సౌకర్యం ఒక నిర్దిష్ట బ్యాంక్‌కు మాత్రమే పరిమితమై ఉండేది. కానీ ఇప్పుడు డిజిటల్ వెరిఫికేషన్ ద్వారా మీరు ఎక్కడ నుండి అయినా మీ పెన్షన్‌ను పొందవచ్చు. ముఖ్యంగా ఉద్యోగం మానేసిన తర్వాత తమ స్వగ్రామానికి లేదా మరొక నగరానికి మారిన వారికి ఇది పెద్ద ఊరట.