Aviation Sector : విమాన ప్రయాణాలకు బ్రేక్.. ఏప్రిల్లో తగ్గిన దేశీయ ప్రయాణికుల రద్దీ
ఏప్రిల్లో తగ్గిన దేశీయ ప్రయాణికుల రద్దీ
Aviation Sector : భారతీయ విమానయాన రంగంలో ఏప్రిల్ నెలలో ప్రయాణికుల రద్దీ కాస్త మందగించింది. వేసవి కాలం ప్రారంభమైనప్పటికీ దేశీయ విమాన ప్రయాణాల డిమాండ్లో క్షీణత కనిపించింది. డైరెక్టరేట్ జనరల్ ఆఫ్ సివిల్ ఏవియేషన్ (DGCA) విడుదల చేసిన తాజా గణాంకాల ప్రకారం.. మార్చి నెలతో పోలిస్తే ఏప్రిల్లో దేశీయ ప్రయాణికుల సంఖ్య 4.2 శాతం మేర పడిపోయింది. ప్రయాణాల డిమాండ్ తగ్గడం, విమాన ఇంధన ధరలు పెరగడం, ఎయిర్లైన్స్ తమ నెట్వర్క్లలో చేసుకున్న మార్పుల వల్ల ఈ ప్రభావం పడినట్లు తెలుస్తోంది. అయితే, ఈ మందగమనంలోనూ ప్రముఖ విమానయాన సంస్థ ఇండిగో మాత్రం తన మార్కెట్ వాటాను పెంచుకుని దూసుకుపోతోంది.
గతేడాది కంటే పడిపోయిన ప్రయాణికుల గ్రాఫ్
డీజీసీఏ నివేదిక ప్రకారం, ఏప్రిల్ నెలలో దేశీయ విమానయాన సంస్థలు మొత్తం 1.38 కోట్లకు పైగా ప్రయాణికులను చేరవేర్చాయి. మార్చి నెలలో ఈ సంఖ్య 1.44 కోట్లుగా ఉండగా, ఏప్రిల్ నాటికి ఇది 4.2 శాతం తగ్గింది. అంతేకాకుండా, గత ఏడాది ఏప్రిల్లో ప్రయాణించిన 1.43 కోట్ల మందితో పోల్చినా ఈసారి 3.47 శాతం తక్కువ ట్రాఫిక్ నమోదైంది. కాకపోతే, ఈ ఏడాది జనవరి నుండి ఏప్రిల్ 2026 మధ్య కాలంలో మొత్తం 575.49 లక్షల మంది ప్రయాణించగా.. గతేడాది ఇదే సమయంతో పోలిస్తే ఇది 0.06 శాతం స్వల్ప వార్షిక వృద్ధిని సూచిస్తోంది.
ఎయిర్ ఇండియాకు షాక్
మొత్తం విమానయాన మార్కెట్లో ప్రయాణికుల సంఖ్య తగ్గినప్పటికీ.. ఇండిగో ఎయిర్లైన్స్ తన పట్టును మరింత బలోపేతం చేసుకుంది. ఏప్రిల్ నెలలో ఇండిగో తన మార్కెట్ షేర్ను 63.3 శాతం నుండి ఏకంగా 65 శాతానికి పెంచుకుంది. ఇదే సమయంలో టాటా గ్రూప్నకు చెందిన ఎయిర్ ఇండియా గ్రూప్ మార్కెట్ వాటా 26.2 శాతం నుంచి 24.7 శాతానికి పడిపోయింది. మరోవైపు కొత్త ఎయిర్లైన్స్ ఆకాశ ఎయిర్ 5.8 శాతంతో తన మార్కెట్ వాటాను కొద్దిగా మెరుగుపరుచుకోగా, స్పైస్జెట్ వాటా మాత్రం 3.4 శాతానికి పడిపోయింది.
విమానాలు కరెక్ట్ టైమ్కి నడపడం (ఆన్-టైమ్ పర్ఫార్మెన్స్ - OTP)లో కూడా ఇండిగో తన నంబర్ వన్ స్థానాన్ని నిలబెట్టుకుంది. దేశంలోని ప్రధాన విమానాశ్రయాలలో ఇండిగో అత్యధికంగా 88.5 శాతం ఆన్-టైమ్ రికార్డును నమోదు చేసింది. ఆ తర్వాత స్థానాల్లో ఎయిర్ ఇండియా గ్రూప్, ఆకాశ ఎయిర్ నిలిచాయి. డీజీసీఏ గణాంకాల ప్రకారం ఏప్రిల్ నెలలో పలు సర్వీసుల అంతరాయం వల్ల ప్రయాణికులు తీవ్ర ఇబ్బందులు పడ్డారు. విమానాల ఆలస్యం కారణంగా 1.35 లక్షల మందికి పైగా ప్రయాణికులు ఇబ్బంది పడగా, ఫ్లైట్స్ క్యాన్సిల్ అవ్వడం వల్ల 77,000 మందికి పైగా ప్యాసింజర్లు ఇక్కట్లను ఎదుర్కొన్నారు. దీనికి బాధ్యతగా విమానయాన సంస్థలు బాధితులకు పరిహారం, ఇతర సౌకర్యాల కింద ఉమ్మడిగా కొన్ని కోట్ల రూపాయలను చెల్లించాల్సి వచ్చింది.
