Samsung : కొత్త ఫోన్ రాగానే కొంటే భారీ లాస్.. శాంసంగ్ మొబైల్స్ పై ఆసక్తికర నిజాలు

Samsung : కొత్త శాంసంగ్ ఫోన్ మార్కెట్లోకి రాగానే కొనేయాలని చాలా మంది ఉవ్విళ్లూరుతుంటారు. కానీ ఆ తొందరపాటే మీ జేబుకు చిల్లు పెట్టే అవకాశం ఉంది. శాంసంగ్ ఫోన్ల విషయంలో కాస్త ఓపిక పడితే వేల రూపాయలు ఆదా చేసుకోవచ్చని మార్కెట్ విశ్లేషణలు చెబుతున్నాయి. ఫోన్ లాంచ్ అయిన రెండు మూడు నెలల్లోనే దాని ధర 20 నుంచి 30 శాతం వరకు పడిపోవడం మనం గమనిస్తూనే ఉంటాం. కొన్నిసార్లు ఏకంగా సగం ధరకే ఫోన్లు లభించే సందర్భాలు కూడా ఉన్నాయి. అందుకే శాంసంగ్ స్మార్ట్‌ఫోన్ల కొనుగోలు విషయంలో వెయిట్ అండ్ వాచ్ పాలసీ పాటించడం ఉత్తమం.

సాధారణంగా ఏ కంపెనీ అయినా కొత్త మోడల్ లాంచ్ చేసినప్పుడు డిమాండ్‌ను బట్టి భారీ ధరను నిర్ణయిస్తుంది. ఉదాహరణకు రూ.1.35 లక్షలకు లాంచ్ అయిన Samsung S24 Ultra ప్రస్తుతం లక్ష రూపాయల లోపు ధరకే అందుబాటులో ఉంది. అలాగే రూ.74,999 కి విడుదలైన Samsung S24 కొన్ని నెలలకే రూ.40 వేల లోపు ధరకు లభించింది. శాంసంగ్ ప్రీమియం మోడల్స్‌లో ఈ ట్రెండ్ ఎక్కువగా కనిపిస్తుంది. సరఫరా పెరగడం, పాత మోడల్స్ క్లియరెన్స్ వంటి కారణాల వల్ల ధరలు వేగంగా దిగివస్తాయి. కొంచెం ఎదురుచూస్తే అదే ఫోన్‌ను భారీ డిస్కౌంట్‌తో సొంతం చేసుకోవచ్చు.

మరో ముఖ్యమైన విషయం ఏమిటంటే.. కొత్త ఫోన్ల తొలి బ్యాచ్‌లలో తరచుగా సాఫ్ట్‌వేర్ బగ్స్ లేదా చిన్న చిన్న హార్డ్‌వేర్ సమస్యలు ఎదురవుతుంటాయి. ఫోన్ వేడెక్కడం, బ్యాటరీ త్వరగా అయిపోవడం వంటి ఇబ్బందులు ప్రారంభంలో వినియోగదారులను వేధిస్తాయి. కొద్ది నెలల తర్వాత కంపెనీలు సాఫ్ట్‌వేర్ అప్‌డేట్ల ద్వారా వీటిని సరిచేస్తాయి. కాబట్టి 2-3 నెలల తర్వాత ఫోన్ కొంటే మీకు మరింత స్థిరమైన, మెరుగైన డివైజ్ లభిస్తుంది. పైగా ఇప్పుడు శాంసంగ్ తన ఫోన్లకు 4 నుంచి 7 ఏళ్ల వరకు అప్‌డేట్లు ఇస్తోంది. దీనివల్ల ఏడాది క్రితం లాంచ్ అయిన ఫోన్ కొన్నా కూడా, మీరు దానిని మరో 5-6 ఏళ్లు నిరభ్యంతరంగా వాడుకోవచ్చు.

అంతేకాకుండా పండుగల సీజన్లు, ఈ-కామర్స్ సేల్స్ సమయంలో బ్యాంక్ ఆఫర్లు, ఎక్స్ఛేంజ్ బోనస్‌లు ఎక్కువగా ఉంటాయి. ఇలాంటి సమయంలో ఫోన్ కొంటే ధర మరింత తగ్గుతుంది. ఒకవేళ మీరు ఫ్లాగ్‌షిప్ ఫోన్ కొనాలనుకుంటే, లేటెస్ట్ మోడల్ కంటే ఏడాది క్రితం వచ్చిన వెర్షన్‌ను ఎంచుకోవడం తెలివైన పని. ఎందుకంటే అప్పటికి దాని ధర సగానికి తగ్గిపోతుంది కానీ ఫీచర్లు మాత్రం దాదాపు సమానంగానే ఉంటాయి. సంక్షిప్తంగా చెప్పాలంటే, శాంసంగ్ ఫోన్ లాంచ్ అయిన వెంటనే కొని వేల రూపాయలు నష్టపోయే కంటే, కనీసం 3 నెలల పాటు వేచి చూడటం ఆర్థికంగా మేలు చేస్తుంది.