EPFO 3.0 : ఈపీఎఫ్ఓ 3.0 వచ్చేస్తోంది.. పీఎఫ్ విత్డ్రా ఇక చిటికెలో పని
పీఎఫ్ విత్డ్రా ఇక చిటికెలో పని
EPFO 3.0 :ఎంప్లాయీస్ ప్రావిడెంట్ ఫండ్ ఆర్గనైజేషన్ తన ఖాతాదారుల కోసం ఒక భారీ విప్లవానికి తెరలేపింది. దశాబ్దాల నాటి పాత పద్ధతులకు స్వస్తి పలికి, టెక్నాలజీతో కూడిన ఈపీఎఫ్ఓ 3.0 వెర్షన్ను ప్రవేశపెట్టేందుకు సర్వం సిద్ధం చేసింది. ఇకపై పీఎఫ్ డబ్బులు విత్డ్రా చేసుకోవడం బ్యాంక్ ఏటీఎం నుంచి డబ్బులు తీసినంత ఈజీ కాబోతోంది. ఈ కొత్త వ్యవస్థలో ఆర్టిఫిషియల్ ఇంటెలిజెన్స్, యూపీఐ వంటి అత్యాధునిక ఫీచర్లను జోడిస్తుండటంతో సుమారు 8 కోట్ల మంది సభ్యులకు భారీ ఊరట లభించనుంది.
కోట్లాది మంది ఉద్యోగుల రిటైర్మెంట్ ఫండ్ నిర్వహించే ఈపీఎఫ్ఓ, తన సేవలను మరింత వేగవంతం చేసేందుకు ఈపీఎఫ్ఓ 3.0 పేరుతో సమూల మార్పులు చేస్తోంది. ప్రస్తుతం ఉన్న వెబ్సైట్, బ్యాక్-ఎండ్ సాఫ్ట్వేర్ తరచుగా మొరాయించడం, క్లెయిమ్స్ సెటిల్మెంట్ కావడానికి వారాల సమయం పట్టడం వంటి సమస్యలకు ఈ కొత్త వెర్షన్ చెక్ పెట్టనుంది. ఈ ప్రాజెక్టులో భాగంగా సరికొత్త పోర్టల్, హై-స్పీడ్ సాఫ్ట్వేర్ను రూపొందిస్తున్నారు. ఇది రాబోయే పదేళ్ల భవిష్యత్తు అవసరాలను దృష్టిలో ఉంచుకుని డిజైన్ చేయబడింది.
ఈపీఎఫ్ఓ 3.0 లోని ప్రధాన ఆకర్షణ కోర్ బ్యాంకింగ్ సొల్యూషన్. ప్రస్తుతం బ్యాంకులు ఎలాగైతే పనిచేస్తాయో, పీఎఫ్ వ్యవస్థ కూడా అలాగే సెంట్రలైజ్డ్ అవుతుంది. అంటే మీరు దేశంలో ఏ మూల ఉన్నా, ఏ ఆఫీసు పరిధిలో మీ అకౌంట్ ఉన్నా.. ఆన్లైన్ ద్వారా లేదా సమీపంలోని ఏదైనా పీఎఫ్ సెంటర్ ద్వారా మీ సమస్యలను పరిష్కరించుకోవచ్చు. అంతేకాకుండా గిగ్ వర్కర్లు (జొమాటో, స్విగ్గీ వంటి ప్లాట్ఫారమ్ కార్మికులు), అసంఘటిత రంగ కార్మికులను కూడా ఈ పరిధిలోకి తీసుకురావాలని ప్రభుత్వం భావిస్తోంది. దీనివల్ల దాదాపు రూ.28 లక్షల కోట్ల నిధి మరింత సమర్థవంతంగా నిర్వహించబడుతుంది.
టెక్నికల్ పరంగా చూస్తే.. ఈపీఎఫ్ఓ ఇప్పుడు ఆర్టిఫిషియల్ ఇంటెలిజెన్స్ను వాడుకోబోతోంది. భాషా సమస్యల వల్ల చాలా మంది కార్మికులు తమ ఫిర్యాదులను సరిగ్గా చెప్పుకోలేకపోతున్నారు. దీనికోసం ప్రభుత్వం అభివృద్ధి చేసిన భాషిణి వంటి ఏఐ లాంగ్వేజ్ టూల్స్ను అనుసంధానించనున్నారు. దీనివల్ల సభ్యులు తమ మాతృభాషలో (తెలుగు, తమిళ్, హిందీ మొదలైనవి) అడిగే ప్రశ్నలకు ఏఐ వెంటనే సమాధానం ఇస్తుంది. అలాగే అత్యవసర సమయాల్లో పీఎఫ్ డబ్బులను యూపీఐ ద్వారా నేరుగా విత్డ్రా చేసుకునే వెసులుబాటును కూడా కల్పించే ప్రతిపాదన పరిశీలనలో ఉంది.
ఈపీఎఫ్ఓ 3.0 అమలుకు సంబంధించి ఐటీ ప్లాట్ఫారమ్ నిర్వహణ కోసం టెండర్ల ప్రక్రియ చివరి దశకు చేరుకుందని అధికారిక వర్గాల సమాచారం. ప్రస్తుతం ఆర్థికపరమైన తనిఖీలు జరుగుతున్నాయని, త్వరలోనే ఈ ప్రాజెక్టు పట్టాలెక్కుతుందని అధికారులు చెబుతున్నారు. ఫార్మల్ రంగంతో పాటు ఇన్ఫార్మల్ కార్మికుల సామాజిక భద్రతకు ఈ అప్డేట్ ఒక మైలురాయిగా నిలవనుంది. సుమారు 8 కోట్ల మంది యాక్టివ్ సభ్యులకు ఇది ఒక డిజిటల్ పండగ లాంటిదని చెప్పవచ్చు.
