EPFO : పీఎఫ్ డబ్బులు ఇక పెన్షన్ ఖాతాకు.. 30 కోట్ల ఈపీఎఫ్ఓ సభ్యులకు కొత్త ఆప్షన్

EPFO : ఉద్యోగుల భవిష్య నిధి సంస్థ సభ్యులకు ఒక కొత్త ఆప్షన్ అందుబాటులోకి వచ్చింది. అందుబాటులోకి వచ్చింది. ఇప్పటి నుంచి పీఎఫ్, పెన్షన్ మొత్తాన్ని పూర్తిగా విత్‌డ్రా చేసుకోవాలంటే వారు వరుసగా 12 నెలలు, 36 నెలల పాటు నిరుద్యోగులుగా ఉండాల్సి ఉంటుంది. కేంద్ర మంత్రి మన్‌సుఖ్ మాండవియా నేతృత్వంలోని ఈపీఎఫ్ఓ ​​సెంట్రల్ బోర్డ్ ఆఫ్ ట్రస్టీస్, ప్రతి సభ్యుడు తమ పీఎఫ్ ఖాతాలో కనీసం 25% మొత్తాన్ని ఎల్లప్పుడూ మెయింటెయిన్ చేయాలని కూడా నిర్ణయించింది.

గతంలో ఏ ఉద్యోగి అయినా వరుసగా రెండు నెలల పాటు నిరుద్యోగిగా ఉంటే, వారు తమ పీఎఫ్ డబ్బు మొత్తాన్ని పూర్తిగా విత్‌డ్రా చేసుకునే అవకాశం ఉండేది. అలాగే, ఖాతాలో కనీస బ్యాలెన్స్ ఉంచాలనే నిబంధన కూడా ఉండేది కాదు. కానీ కొత్త నిబంధనల ప్రకారం.. సభ్యులు తమ ఖాతాలోని మొత్తం డబ్బులో 25% భాగాన్ని ఎల్లప్పుడూ ఉంచాలి. మిగిలిన 75% మొత్తాన్ని సంవత్సరంలో ఆరు సార్లు వరకు విత్‌డ్రా చేసుకునే అవకాశం ఉంటుంది.

ఈ మార్పులతో పాటు సభ్యులు కోరుకుంటే తమ పీఎఫ్ మొత్తాన్ని పెన్షన్ ఖాతాకు బదిలీ చేసుకునే కొత్త ఆప్షన్ కూడా ఈపీఎఫ్ఓ అందుబాటులోకి తెచ్చింది. సోమవారం జరిగిన బోర్డు సమావేశంలో ఈ కీలక మార్పులకు ఆమోదం లభించింది. ఈ కొత్త నిబంధనల ద్వారా అవసరమైనప్పుడు డబ్బులు విత్‌డ్రా చేసుకునే సౌలభ్యం ఉండటంతో పాటు, వారి రిటైర్మెంట్ కోసం కొంత మొత్తం ఎల్లప్పుడూ సురక్షితంగా ఉంటుందని ప్రభుత్వం పేర్కొంది. ఈ మార్పులకు కారణం, దాదాపు 87% మంది సభ్యులు సెటిల్‌మెంట్ సమయంలో వారి ఖాతాలో రూ.లక్ష కంటే తక్కువ మొత్తాన్ని కలిగి ఉండటమే.

ఈ కొత్త మార్పుల ద్వారా దేశంలోని దాదాపు 30 కోట్ల మంది ఈపీఎఫ్ఓ సభ్యులకు ప్రయోజనం చేకూరుతుందని మంత్రి మన్‌సుఖ్ మాండవియా తెలిపారు. ఈ మార్పుల వల్ల, సభ్యులు ఈపీఎఫ్ఓ అందించే 8.25% వార్షిక వడ్డీ రేటు, కంపౌండింగ్ ప్రయోజనంతో ఒక మంచి రిటైర్మెంట్ ఫండ్‌ను తయారు చేసుకోవడానికి వీలు కలుగుతుంది. ఈ చర్య ద్వారా సభ్యులకు డబ్బును సులభంగా పొందే అవకాశం ఇవ్వడమే కాకుండా, వారి రిటైర్మెంట్ కోసం తగినంత పొదుపు ఉండేలా చూడటం కూడా ప్రభుత్వ లక్ష్యం అని మంత్రి స్పష్టం చేశారు.