EPFO : పీఎఫ్ ఖాతాదారులకు టెన్షన్.. ఇంకా అకౌంట్‌లోకి రాని వడ్డీ.. ఆలస్యమైతే నష్టపోతారా?

EPFO : కేంద్ర ప్రభుత్వ ఉద్యోగులు, ప్రైవేట్ ఉద్యోగులు సహా కోట్లాది మంది EPF ఖాతాదారులు ప్రస్తుతం ఒకే సందేహంతో ఉన్నారు. 2025-26 ఆర్థిక సంవత్సరానికి EPFO 8.25 శాతం వడ్డీ రేటును కొనసాగిస్తున్నట్లు ఇప్పటికే ప్రకటించినప్పటికీ, చాలా మంది ఖాతాల్లో ఇప్పటికీ వడ్డీ జమ అయినట్లు కనిపించడం లేదు. దీంతో ఉద్యోగుల్లో ఆందోళన పెరిగింది. అయితే దీనిపై ఆర్థిక నిపుణులు, EPFO వర్గాలు స్పష్టత ఇచ్చాయి. వడ్డీ ఖాతాలో కనిపించకపోవడం వల్ల సభ్యులకు ఎలాంటి నష్టం జరగదని చెబుతున్నారు. వడ్డీ జమ ప్రక్రియ కొంత సమయం తీసుకోవడం సహజమని వివరించారు.

ఈ ఏడాది మార్చిలో EPFO కేంద్ర ట్రస్టీ బోర్డు సమావేశంలో 2025-26 ఆర్థిక సంవత్సరానికి EPF డిపాజిట్లపై 8.25 శాతం వడ్డీ కొనసాగించాలని నిర్ణయించింది. అయితే ఈ నిర్ణయానికి కేంద్ర ప్రభుత్వ ఆమోదం, అధికారిక నోటిఫికేషన్, ఖాతాల సమన్వయం, కోట్లాది సభ్యుల డేటా అప్‌డేట్ వంటి పలు పరిపాలనా ప్రక్రియలు పూర్తి కావాల్సి ఉంటుంది. అందుకే వడ్డీ మొత్తాన్ని వెంటనే ఖాతాల్లో జమ చేయడం సాధ్యం కాదు. సాధారణంగా ఆర్థిక సంవత్సరం ముగిసిన తర్వాత కొన్ని వారాలు లేదా నెలలు పట్టే అవకాశం ఉంటుంది. గతంలో కూడా చాలా సందర్భాల్లో జూన్, జూలై నెలల్లోనే సభ్యుల ఖాతాల్లో వడ్డీ కనిపించింది.

నిపుణుల ప్రకారం, వడ్డీ ఆలస్యంగా క్రెడిట్ అయినా సభ్యులకు ఆర్థికంగా ఎలాంటి నష్టం ఉండదు. ఎందుకంటే EPFO ప్రతి నెల రన్నింగ్ బ్యాలెన్స్ ఆధారంగా వడ్డీని లెక్కించి, ఆర్థిక సంవత్సరం ముగిసిన తర్వాత మొత్తం వడ్డీని ఖాతాలో జమ చేస్తుంది. కాబట్టి ఎంట్రీ ఆలస్యమైనా వడ్డీ లెక్క మాత్రం ఆగదు. ఖాతాలో వడ్డీ జమ అయిందో లేదో తెలుసుకోవడానికి సభ్యులు UMANG యాప్, EPFO అధికారిక పోర్టల్, మిస్డ్ కాల్ సేవ లేదా SMS సేవలను ఉపయోగించవచ్చు. ఇందుకోసం UAN యాక్టివ్‌గా ఉండటంతో పాటు ఆధార్, పాన్, బ్యాంక్ ఖాతా వివరాలు UANతో లింక్ అయి ఉండాలి. మొత్తానికి ప్రస్తుతం మీ PF ఖాతాలో వడ్డీ కనిపించకపోయినా ఆందోళన చెందాల్సిన అవసరం లేదు. EPFO ప్రక్రియ పూర్తయిన తర్వాత పూర్తి వడ్డీ మొత్తాన్ని సభ్యుల ఖాతాల్లో జమ చేయనుంది.