CIBIL Score:సిబిల్ స్కోర్ దారుణంగా పడిపోతోందా? తెలియక చేసే ఈ చిన్న తప్పులే అసలు కారణం
ఈ చిన్న తప్పులే అసలు కారణం
CIBIL Score:అవసరానికి బ్యాంకు నుంచి రుణం పొందేందుకు సిబిల్ స్కోర్ అత్యంత కీలకమైన అంశంగా మారింది. రోజువారీ జీవితంలో తెలియకుండా చేసే కొన్ని చిన్న తప్పులు సిబిల్ స్కోర్ను దారుణంగా పడేసి లోన్ పొందే అవకాశాలను పూర్తిగా దెబ్బతీస్తాయి. బ్యాంకుల వద్ద రుణాలు తిరస్కరణకు గురికాకుండా ఉండాలంటే ఈ విషయాలపై అవగాహన పెంచుకోవడం ఎంతో అవసరం.
ఈఎంఐ చెల్లింపులో నిర్లక్ష్యం వద్దు
గతంలో అత్యవసరాల కోసం బంధువులు, స్నేహితులపై ఆధారపడే రోజులు ఉండేవి. ప్రస్తుత కాలంలో వ్యక్తిగత, గృహ, విద్య, వ్యాపార రుణాల రూపంలో బ్యాంకులు ప్రజల ఆర్థిక అవసరాలను తీరుస్తున్నాయి. అయితే బ్యాంకు తీసుకున్న రుణాలు లేదా క్రెడిట్ కార్డ్ నెలవారీ వాయిదాలు (ఈఎంఐ) సమయానికి చెల్లించకపోవడం సిబిల్ స్కోర్పై తీవ్రమైన ప్రతికూల ప్రభావం చూపుతుంది. ఒక్క వాయిదా ఆలస్యమైనా సరే ఆర్థిక క్రమశిక్షణ లేని వ్యక్తిగా బ్యాంకులు మిమ్మల్ని పరిగణిస్తాయి. ఆ కారణంతో భవిష్యత్తులో పొందే రుణాలపై తీవ్ర ప్రభావం పడుతుంది.
పరిమితికి మించిన క్రెడిట్ కార్డ్ వాడకం
చాలామంది క్రెడిట్ కార్డ్ లభించగానే దానికి ఉన్న మొత్తం పరిమితిని వాడేస్తుంటారు. ఉదాహరణకు లక్ష రూపాయల పరిమితి ఉన్న కార్డ్పై 30 శాతానికి మించి అంటే రూ.30,000 కన్నా ఎక్కువ ఖర్చు చేయకూడదని నిపుణులు స్పష్టం చేస్తున్నారు. ప్రతిసారీ అందుబాటులో ఉన్న పూర్తి పరిమితిని ఉపయోగించడం వల్ల మీరు తీవ్ర ఆర్థిక ఇబ్బందుల్లో ఉన్నారనే భావన బ్యాంకులకు కలుగుతుంది. దీనివల్ల క్రెడిట్ వినియోగ నిష్పత్తి పెరిగిపోవడంతో పాటు సిబిల్ స్కోర్ గణనీయంగా క్షీణిస్తుంది.
ఒకేసారి అనేక లోన్లకు దరఖాస్తు చేయడం
అత్యవసర సమయంలో ఒకేసారి అనేక బ్యాంకులు లేదా ఆర్థిక సంస్థల్లో రుణాల కోసం దరఖాస్తు చేయడం కూడా తీవ్రమైన పొరపాటు. తక్కువ వ్యవధిలో ఎక్కువ చోట్ల దరఖాస్తు చేసుకున్నప్పుడు, మీ ప్రొఫైల్పై బ్యాంకులు విచారణ జరుపుతాయి. ఇలాంటి దరఖాస్తుల వల్ల కస్టమర్ రుణాల కోసం విపరీతంగా ఆరాటపడుతున్నారనే సంకేతాలు వెళ్తాయి. అది క్రెడిట్ నివేదికలో నమోదై స్కోర్ తీవ్రంగా తగ్గిపోవడానికి కారణమవుతుంది.
