Stock Market: షేర్ మార్కెట్‌లో ఊహించని కుదుపు.. 4 రోజుల్లోనే రూ.35 వేల కోట్ల షేర్లు అమ్మేసిన విదేశీ మదుపర్లు

Stock Market: భారతీయ స్టాక్ మార్కెట్‌లో గత కొన్ని రోజులుగా భారీ అమ్మకాల పర్వం కొనసాగుతోంది. విదేశీ సంస్థాగత మదుపర్లు (FII) దేశీయ మార్కెట్ల నుంచి వేగంగా తమ పెట్టుబడులను వెనక్కి తీసుకుంటుండటం ఆర్థిక వర్గాల్లో కలవరం సృష్టిస్తోంది. గత నాలుగు రోజులుగా ఈ విక్రయాల జోరు మరింత పెరిగింది. ఈ తక్కువ వ్యవధిలోనే విదేశీ మదుపర్లు దాదాపు రూ.35,000 కోట్ల విలువైన షేర్లను విక్రయించారు. ఈ భారీ పెట్టుబడుల విత్ డ్రాల ప్రభావం సెన్సెక్స్, నిఫ్టీలపై తీవ్రంగా పడింది. మార్కెట్ అంతటా ఎక్కడ చూసినా నష్టాల పరంపర కొనసాగుతుండటంతో మదుపర్లలో తీవ్ర ఆందోళన వ్యక్తమవుతోంది.

నాలుగు రోజుల్లో రూ.35 వేల కోట్ల విక్రయాల వివరాలు

విదేశీ ఇన్వెస్టర్లు రోజూ సరాసరి రూ.5,000 కోట్లకు పైగా షేర్లను వదిలించుకుంటున్నారు. వరుసగా చూస్తే ఒక్కో రోజు భారీగా నిధులు తరలిపోయాయి. సెప్టెంబర్ 28న రూ.5,353 కోట్లు, మరుసటి రోజు సెప్టెంబర్ 29న ఏకంగా రూ.9,980 కోట్లు విక్రయించారు. సెప్టెంబర్ 30న రూ.10,148 కోట్లు, అక్టోబర్ 1న మరో రూ.9,484 కోట్ల షేర్లను మార్కెట్లో అమ్మేశారు. కేవలం నాలుగు రోజుల వ్యవధిలో మొత్తం రూ.34,966 కోట్లను విదేశీ శక్తులు బయటకు లాగేశాయి. దీంతో భారత మార్కెట్ల నుంచి పెద్ద ఎత్తున విదేశీ కరెన్సీ తరలిపోవడం గమనించదగ్గ విషయం.

ఆదుకున్న దేశీయ సంస్థాగత మదుపర్లు

విదేశీ ఇన్వెస్టర్లు వరుసగా షేర్లు అమ్ముతున్నప్పటికీ, దేశీయ సంస్థాగత మదుపర్లు (DII) మాత్రం మార్కెట్ పూర్తిగా పడిపోకుండా గట్టిగా నిలబెట్టే ప్రయత్నం చేశారు. డీఐఐలు భారీగా కొనుగోళ్లు జరుపుతూ మార్కెట్‌‌కు మద్దతుగా నిలిచారు. ఈ నాలుగు రోజుల్లో డీఐఐలు మొత్తం రూ.33,455 కోట్ల విలువైన షేర్లను కొనుగోలు చేశారు. విదేశీ ఇన్వెస్టర్లు అమ్మిన షేర్లలో సింహభాగాన్ని మన దేశీయ మదుపర్లే కొనుగోలు చేయడం విశేషం. అయినప్పటికీ అంతర్జాతీయ ఒత్తిళ్ల కారణంగా మార్కెట్ పతనాన్ని పూర్తిగా నివారించడం సాధ్యం కాలేదు.

మదుపర్లకు రూ.20 లక్షల కోట్ల నష్టం

ఈ భారీ అమ్మకాల ఒత్తిడి కారణంగా సాధారణ మదుపర్ల సంపద కరిగిపోయింది. నాలుగు రోజుల నష్టాల దెబ్బకు నిఫ్టీ మూడు శాతానికి పైగా పడిపోయింది. బాంబే స్టాక్ ఎక్స్ఛేంజ్ సూచీ సెన్సెక్స్ సైతం భారీగా క్షీణించింది. బ్రాడర్ మార్కెట్లలో నిఫ్టీ మిడ్ క్యాప్ దాదాపు నాలుగు శాతం నష్టపోయింది. బీఎస్‌ఈలో లిస్టైన కంపెనీల మొత్తం మార్కెట్ క్యాపిటలైజేషన్ ఏకంగా రూ.20 లక్షల కోట్లు ఆవిరైంది. ఈ భారీ పతనంతో ఇన్వెస్టర్లు తీవ్ర ఆర్థిక నష్టాలను చవిచూడాల్సి వచ్చింది.

భారత రూపాయిపై తీవ్ర ప్రభావం

ఈ పరిణామాల ప్రభావం కేవలం షేర్ మార్కెట్‌కే పరిమితం కాలేదు, దేశీయ కరెన్సీ రూపాయి విలువపై కూడా పడింది. అమెరికన్ డాలర్‌‌తో పోలిస్తే రూపాయి విలువ భారీగా క్షీణించింది. ఒకే రోజు భారీగా పడిపోయిన రూపాయి విలువ చారిత్రక కనిష్ట స్థాయికి చేరింది. విదేశీ ఇన్వెస్టర్లు నిరంతరం డాలర్లను వెనక్కి తీసుకుంటుండటమే రూపాయి బలహీనపడటానికి ప్రధాన కారణం. విదేశీ విక్రయాల ధోరణి ఇలాగే కొనసాగితే మార్కెట్లతో పాటు కరెన్సీపై కూడా ఒత్తిడి మరింత పెరిగే అవకాశం ఉందని నిపుణులు హెచ్చరిస్తున్నారు.