Gold ETF : మారుతున్న కాలం.. మారుతున్న ఇన్వెస్ట్మెంట్ స్టైల్.. ఆభరణాల కంటే గోల్డ్ ఈటీఎఫ్‎లకే ఇన్వెస్టర్ల మొగ్గు

Gold ETF : భారతీయ కుటుంబాలలో బంగారానికి ఎప్పుడూ ఒక ప్రత్యేకమైన స్థానం ఉంటుంది. కష్టకాలంలో ఆదుకునే నిజమైన స్నేహితుడిగా, అత్యంత సురక్షితమైన పెట్టుబడిగా బంగారాన్ని భావిస్తాం. అయితే మారుతున్న కాలానికి అనుగుణంగా మన పెట్టుబడి పెట్టే పద్ధతులు కూడా శరవేగంగా మారుతున్నాయి. ఇప్పుడున్న స్మార్ట్ ఇన్వెస్టర్లు నగల దుకాణానికి వెళ్లి ఫిజికల్ గోల్డ్ అంటే ఆభరణాలు లేదా నాణేలు కొనడానికి అస్సలు ఇష్టపడటం లేదు. దానికి బదులుగా డిజిటల్ రూపంలో ఉండే గోల్డ్ ఈటీఎఫ్‎లలో డబ్బులు పెట్టడానికి ఆసక్తి చూపిస్తున్నారు. దీనికి కారణం కూడా చాలా స్పష్టంగా ఉంది. ఇందులో నగలు చేయించడానికి అయ్యే మేకింగ్ ఛార్జీల భారం ఉండదు, పైగా వీటిని ఇంట్లో దాచుకోవాలనే భయం గానీ, దొంగిలించబడతాయనే ఆందోళన గానీ అస్సలు ఉండదు. అన్నింటికంటే ముఖ్యంగా సంపాదన విషయంలో కూడా ఈ డిజిటల్ బంగారం సాధారణ నగలను ఎప్పుడో దాటేసింది. ఇటీవలి మ్యూచువల్ ఫండ్స్ తాజా గణాంకాల ప్రకారం.. దేశంలోని కొన్ని టాప్ గోల్డ్ ఈటీఎఫ్‌లు గత మూడు ఏళ్లలో ఇన్వెస్టర్లకు ఏకంగా 34 శాతం వరకు వార్షిక కాంపౌండెడ్ రిటర్న్స్ (CAGR) అందించి ఆశ్చర్యపరిచాయి.

అసలు ఏమిటీ డిజిటల్ బంగారం గమ్మత్తు?

గోల్డ్ ఈటీఎఫ్ అనేది నిజానికి ఒక రకమైన మ్యూచువల్ ఫండ్ ప్రొడక్ట్. దీనిని నేరుగా షేర్ మార్కెట్లో లిస్ట్ చేస్తారు. మీరు ఏదైనా ఒక కంపెనీకి చెందిన షేర్లను ఎలాగైతే కొంటారో, అలాగే మీ డిమాట్ అకౌంట్ ద్వారా ఈ గోల్డ్ ఈటీఎఫ్‌లను కూడా చాలా సులభంగా కొనవచ్చు లేదా అమ్మవచ్చు. దీని ధరలు మన దేశీయ మార్కెట్లో నడిచే అసలైన పసిడి ధరలతో ముడిపడి ఉంటాయి. అంటే మార్కెట్లో బంగారం ధరలు పెరిగినప్పుడల్లా.. మీరు కొన్న గోల్డ్ ఈటీఎఫ్ విలువ కూడా అదే వేగంతో పెరుగుతూ పోతుంది. ఒక సామాన్య ఇన్వెస్టర్ కోణంలో చూసుకుంటే, ఇందులో అత్యంత ముఖ్యమైన సదుపాయం లిక్విడిటీ. అంటే మీకు ఎప్పుడు డబ్బులు అత్యవసరమైతే అప్పుడు వీటిని మార్కెట్లో అమ్మేసి వెంటనే మీ సొమ్మును వెనక్కి తీసుకోవచ్చు. అలాగే వీటిలో ట్రాకింగ్ డిఫరెన్స్ కూడా చాలా తక్కువగా ఉంటుంది.

లాభాల్లో యూటీఐ గోల్డ్ ఈటీఎఫ్ టాప్ మార్క్

1500 కోట్ల రూపాయల కంటే ఎక్కువ అసెట్ అండర్ మేనేజ్మెంట్ (AUM) కలిగిన పెద్ద ఫండ్స్ పనితీరును పరిశీలిస్తే.. యూటీఐ గోల్డ్ ఈటీఎఫ్ అందరికంటే ముందు వరుసలో నిలిచి మొనగాడిగా నిరూపించుకుంది. జూలై 2వ తేదీ నాటి లెక్కల ప్రకారం, గత మూడు సంవత్సరాల కాలంలో ఈ ఫండ్ తన ఇన్వెస్టర్లకు ఏడాదికి సగటున 34.0 శాతం చొప్పున బంపర్ రిటర్న్స్ ఇచ్చింది. ఇక్కడ ఆశ్చర్యకరమైన విషయం ఏంటంటే, ఇదే కాలంలో దీనికి సంబంధించిన బెంచ్‌మార్క్ ఇండెక్స్ కేవలం 1.7 శాతం రిటర్న్స్ మాత్రమే ఇవ్వగలిగింది. అంటే ఈ ఫండ్ తన బెంచ్‌మార్క్‌ను ఏకంగా 32.2 శాతం భారీ తేడాతో ఓడించి రికార్డు సృష్టించింది. కేవలం ఒక ఏడాది కాల వ్యవధిని చూసుకున్నా కూడా, యూటీఐ గోల్డ్ ఈటీఎఫ్ 45.6 శాతం రిటర్న్స్‌తో మొదటి స్థానంలో ఉంది, కాగా దీని బెంచ్‌మార్క్ కేవలం 10.1 శాతమే పెరిగింది.

మూడు ఏళ్లలో ఇన్వెస్టర్లకు కాసుల పంట పండించిన టాప్-5 ఫండ్స్ పూర్తి వివరాలు:

మన దేశంలో తక్కువ రిస్క్‌తో ఎక్కువ లాభాలు అందిస్తూ, భారీ ఫండ్ సైజ్ కలిగి ఉన్న టాప్ ఐదు గోల్డ్ ఈటీఎఫ్‌ల వివరాలు ఇలా ఉన్నాయి.

* యూటీఐ గోల్డ్ ఈటీఎఫ్ : ఈ ఫండ్ మూడు ఏళ్లలో 34.0 శాతం, అలాగే ఒక్క ఏడాదిలోనే 45.6 శాతం రిటర్న్స్ ఇచ్చింది. దీని మొత్తం ఫండ్ సైజ్ రూ.4,382.2 కోట్లుగా ఉంది.

* ఐసీఐసీఐ ప్రూ గోల్డ్ ఈటీఎఫ్ : మూడు ఏళ్లలో 33.7 శాతం లాభాన్ని అందించిన ఈ ఫండ్, ఏకంగా రూ. 27,578.2 కోట్ల భారీ నిధుల నిర్వహణతో సైజ్ పరంగా దేశంలోనే అత్యంత పెద్ద గోల్డ్ ఫండ్‌గా రికార్డు సాధించింది. గత ఏడాది కాలంలో ఇది 45.3 శాతం రిటర్న్స్ ఇచ్చింది.

* మిరే అసెట్ గోల్డ్ ఈటీఎఫ్ : ఈ ఫండ్ మూడు ఏళ్లలో 33.6 శాతం లాభాలను ఇచ్చింది. షార్ట్ టర్మ్ (1 నుండి 3 నెలలు) లో మార్కెట్ పడిపోయిన సమయంలో కూడా తన పతనాన్ని కేవలం -2.5 శాతానికే పరిమితం చేసుకుని స్థిరమైన ప్రదర్శన ఇచ్చింది.

* ఆదిత్య బిర్లా సన్ లైఫ్ గోల్డ్ ఈటీఎఫ్ : ఈ ఫండ్ గత మూడు ఏళ్లలో 33.6 శాతం రిటర్న్స్ ఇవ్వగా, గడచిన ఒకే ఒక్క ఏడాదిలో ఇన్వెస్టర్లకు 45.4 శాతం భారీ లాభాలను తెచ్చిపెట్టింది.

* కోటక్ గోల్డ్ ఈటీఎఫ్ : మూడు ఏళ్లలో 33.6 శాతం మరియు ఏడాది కాలంలో 45.2 శాతం లాభాలతో ఈ ఫండ్ కూడా టాప్-5 లిస్టులో చేరింది. దీని మొత్తం ఫండ్ సైజ్ రూ. 14,891.9 కోట్లు.

ఫిజికల్ గోల్డ్ కంటే ఇవే ఎందుకు బెస్ట్?

మీరు కూడా మీ ఇన్వెస్ట్మెంట్ పోర్ట్‌ఫోలియోలో బంగారం తళుకులను జోడించుకోవాలని అనుకుంటే, సాంప్రదాయ పద్ధతులను పక్కన పెట్టి డిజిటల్ ఇన్వెస్ట్‌మెంట్ వైపు అడుగులు వేయడానికి ఇది సరైన సమయం. చేతితో పట్టుకునే ఫిజికల్ గోల్డ్‌తో పోలిస్తే ఈటీఎఫ్‌లు మీకు 100 శాతం ప్యూరిటీ గ్యారెంటీని ఇస్తాయి. ఎందుకంటే ఇందులో మోసపోయే అవకాశమే ఉండదు. అంతేకాకుండా, ఈ బంగారాన్ని భద్రపరుచుకోవడానికి బ్యాంకు లాకర్ల కోసం ప్రతి ఏడూ వేల రూపాయలు ఖర్చు చేయాల్సిన అవసరం లేదు. భవిష్యత్తులో వీటిని విక్రయించేటప్పుడు తరుగు లేదా కరిగింపు ఖర్చుల పేరుతో ఎలాంటి కోతలు ఉండవు. స్టాక్ మార్కెట్లో ట్రేడ్ అయ్యే ఈ డిజిటల్ బంగారం ఈనాటి కాలంలో పెరుగుతున్న ద్రవ్యోల్బణాన్ని తిప్పికొట్టే అత్యంత బలమైన ఆయుధంగా మారిందని మార్కెట్ విశ్లేషకులు చెబుతున్నారు.