Indian Railways : జేబులో టికెట్ లేకపోయినా రైలు ప్రయాణం ఆగదు.. రైల్వే తెచ్చిన సరికొత్త రూల్
రైల్వే తెచ్చిన సరికొత్త రూల్
Indian Railways : భారతీయ రైల్వే ప్రయాణీకుల సౌకర్యార్థం నిరంతరం సరికొత్త నిబంధనలను అందుబాటులోకి తెస్తూనే ఉంటుంది. ఇందులో భాగంగానే రైలు ప్రయాణీకులకు ఎంతో ఊరటనిచ్చే మరో అద్భుతమైన నియమాన్ని రైల్వే శాఖ అమలు చేస్తోంది. చాలామంది కౌంటర్లలో కన్ఫర్మ్ రైలు టికెట్ కొనుగోలు చేసినప్పటికీ, హడావుడిలో ఆ ఫిజికల్ టికెట్ను ఇంట్లోనే మరిచిపోతుంటారు. తీరా రైల్వే స్టేషన్కు వచ్చాక లేదా రైలు ఎక్కాక టికెట్ లేదనే విషయం గుర్తుకువచ్చి తీవ్ర ఆందోళనకు గురవుతుంటారు. ఇకపై అలాంటి టెన్షన్ పడాల్సిన అవసరం లేదని, మీ టికెట్ అధికారికంగా వెరిఫికేషన్ అయితే జేబులో టికెట్ లేకపోయినా ప్రయాణాన్ని కొనసాగించవచ్చని రైల్వే అధికారులు స్పష్టం చేశారు.
కుటుంబ సభ్యుల సాయంతో వెరిఫికేషన్
మీరు రైలు ప్రయాణంలో ఉన్నప్పుడు కౌంటర్ టికెట్ ఇంట్లో ఉండిపోయిందని గుర్తిస్తే.. వెంటనే మీ కుటుంబ సభ్యులకు లేదా మీకు తెలిసిన వారికి ఫోన్ చేయాలి. ఆ ఒరిజినల్ టికెట్ను తీసుకుని వారు మీ బోర్డింగ్ రైల్వే స్టేషన్కు వెళ్లి, అక్కడి స్టేషన్ మాస్టర్కి సమర్పించాల్సి ఉంటుంది. స్టేషన్ మాస్టర్ ఆ టికెట్ వివరాలను క్షుణ్ణంగా పరిశీలించి, అది నిజమైన టికెట్ అని నిర్ధారించుకున్న తర్వాత.. రైలు ప్రయాణించే తదుపరి స్టేషన్లకు, సదరు రైలులోని అధికారులకు ఇంటర్నల్ వైర్లెస్ లేదా అఫీషియల్ సిస్టమ్ ద్వారా ఒక అధికారిక మెసేజ్ పంపుతారు. ఈ మెసేజ్ ఆధారంగా రైలులోని టీటీఈ మీ ప్రయాణాన్ని చట్టబద్ధంగా అనుమతిస్తారు.
ఆన్లైన్ ఈ-టికెట్ వినియోగదారులకు ఈ రూల్ వర్తించదు
రైల్వే శాఖ తీసుకొచ్చిన ఈ సరికొత్త వెసులుబాటు కేవలం రైల్వే రిజర్వేషన్ కౌంటర్ల ద్వారా నగదు చెల్లించి కొనుగోలు చేసిన ఫిజికల్ టికెట్లకు మాత్రమే వర్తిస్తుంది. ఎవరైనా కస్టమర్లు ఐఆర్సీటీసీ వెబ్సైట్ లేదా మొబైల్ యాప్ ద్వారా ఆన్లైన్ ఈ-టికెట్ బుక్ చేసుకుని ఉంటే, వారికి ఈ నిబంధన వర్తించదు. ఎందుకంటే ఆన్లైన్ టికెట్లను డిజిటల్ పద్ధతిలో మొబైల్ లేదా ఈమెయిల్ ద్వారా సులభంగా చూపించవచ్చు కాబట్టి, వాటి కోసం రైల్వేలో ఇప్పటికే వేరే రకమైన డిజిటల్ చెకింగ్ వ్యవస్థ అందుబాటులో ఉంది.
టికెట్ మరిచిపోతే ప్రయాణీకులు వెంటనే చేయాల్సిన పనులు
రైలులో ప్రయాణిస్తున్నప్పుడు మీ వద్ద కౌంటర్ టికెట్ లేదని తెలిస్తే అస్సలు భయపడకుండా కొన్ని తక్షణ చర్యలు చేపట్టాలి. మొదటగా మీ బోగీలో ఉండే టీటీఈని కలిసి అసలు విషయం చెప్పాలి. టికెట్ నంబర్ లేదా మీ సీటు వివరాలను వారికి అందించాలి. అదే సమయంలో ఇంట్లో ఉన్నవారికి సమాచారం ఇచ్చి ఒరిజినల్ టికెట్ను బోర్డింగ్ స్టేషన్ మాస్టర్కు చూపించమనాలి. స్టేషన్ మాస్టర్ నుంచి రైల్వే అధికారులకు సమాచారం అందిన వెంటనే, టికెట్ ఉన్నట్లుగా టీటీఈ ధృవీకరిస్తారు. దీనివల్ల ఎలాంటి జరిమానా పడకుండా, ప్రయాణం మధ్యలో రైలు దిగాల్సిన అవసరం లేకుండా సురక్షితంగా మీ గమ్యస్థానానికి చేరుకోవచ్చు.
