Global Oil Crisis : పొరుగు దేశాల్లో పెట్రోల్ బాంబు.. శ్రీలంక, పాకిస్థాన్లో చుక్కలు చూపిస్తున్న ధరలు
శ్రీలంక, పాకిస్థాన్లో చుక్కలు చూపిస్తున్న ధరలు
Global Oil Crisis : పశ్చిమ ఆసియాలో యుద్ధ మేఘాలు కమ్ముకోవడంతో ప్రపంచవ్యాప్తంగా చమురు సెగ తగులుతోంది. ఇజ్రాయెల్, ఇరాన్ మధ్య ఘర్షణలు తీవ్రం కావడంతో అంతర్జాతీయ మార్కెట్లో ముడి చమురు ధరలు ఒక్కసారిగా భగ్గుమన్నాయి. దాదాపు నాలుగేళ్ల తర్వాత బ్రెంట్ క్రూడ్ ధర బ్యారెల్కు 100 డాలర్ల మార్కును దాటి, ఏకంగా 120 డాలర్ల వరకు వెళ్లింది. ఈ ప్రభావంతో మన పొరుగు దేశాలైన శ్రీలంక, పాకిస్థాన్లలో పెట్రోల్, డీజిల్ ధరలు చుక్కలను తాకుతున్నాయి. అక్కడ ప్రజలు ఇంధనం కోసం అల్లాడిపోతుంటే, భారత్లో మాత్రం పరిస్థితి వేరుగా ఉండటం గమనార్హం.
శ్రీలంక, పాకిస్థాన్లలో పెట్రో బాదుడు
శ్రీలంక ప్రభుత్వం సోమవారం అర్ధరాత్రి నుంచి ఇంధన ధరలను ఏకంగా 8 శాతం పెంచుతూ నిర్ణయం తీసుకుంది. లీటర్ పెట్రోల్, డీజిల్పై 22 శ్రీలంక రూపాయలను పెంచారు. యుద్ధ వార్తలు రావడంతో జనం పెట్రోల్ బంకుల వద్ద క్యూ కట్టడం, ఇంధనాన్ని నిల్వ చేసుకోవడం మొదలుపెట్టడంతో ఈ పెంపు తప్పలేదని అక్కడి అధికారులు చెబుతున్నారు. మరోవైపు పాకిస్థాన్ పరిస్థితి మరీ ఘోరంగా ఉంది. మూడు రోజుల క్రితమే అక్కడ లీటర్ పెట్రోల్పై ఏకంగా 55 పాక్ రూపాయలను పెంచారు. దీంతో అక్కడ లీటర్ డీజిల్ ధర రూ.335 దాటేసింది. ఆర్థిక సంక్షోభంతో కొట్టుమిట్టాడుతున్న ఆ దేశాల్లో ఈ పెంపు సామాన్యుడి నడ్డి విరుస్తోంది.
భారత్లో ధరల పెంపు లేదు
అంతర్జాతీయంగా ముడి చమురు ధరలు కొండెక్కినా, భారత్లో మాత్రం పెట్రోల్, డీజిల్ ధరలను పెంచే ఉద్దేశ్యం లేదని ప్రభుత్వ వర్గాలు స్పష్టం చేశాయి. గ్లోబల్ మార్కెట్లో ధరల పెరుగుదల భారాన్ని సామాన్యులపై వేయకూడదని కేంద్రం భావిస్తోంది. చమురు సంస్థలే ఈ అదనపు భారాన్ని ప్రస్తుతానికి భరిస్తాయని సమాచారం. ప్రస్తుతం దేశంలో 6 నుంచి 8 వారాలకు సరిపడా చమురు నిల్వలు ఉన్నాయని, సరఫరాలో ఎలాంటి ఆటంకాలు కలగకుండా చర్యలు తీసుకుంటున్నామని అధికారులు భరోసా ఇస్తున్నారు. యుద్ధం వల్ల ధరలు పెరిగే ప్రమాదం ఉన్నప్పటికీ, భారత్ తన వ్యూహాత్మక నిల్వలతో సంక్షోభాన్ని ఎదుర్కోవడానికి సిద్ధంగా ఉంది.
గ్యాస్ సిలిండర్ బుకింగ్పై కొత్త నిబంధనలు
ధరల విషయంలో ఊరటనిచ్చిన ప్రభుత్వం, గ్యాస్ సిలిండర్ల విషయంలో మాత్రం కీలక మార్పులు చేసింది. గ్యాస్ కొరత ఏర్పడుతుందనే భయంతో జనం సిలిండర్లను అక్రమంగా నిల్వ చేయకుండా చూడాలని నిర్ణయించింది. ఇందులో భాగంగా, ఒక సిలిండర్ బుక్ చేసిన తర్వాత రెండో సిలిండర్ కోసం వేచి చూడాల్సిన సమయాన్ని 21 రోజుల నుంచి 25 రోజులకు పెంచారు. అంటే, ఒకసారి సిలిండర్ తీసుకున్న తర్వాత మళ్ళీ 25 రోజుల దాకా బుకింగ్ చేసుకోవడానికి వీలుండదు. సాధారణంగా ఒక కుటుంబానికి నెల రోజులకు పైగా సిలిండర్ సరిపోతుంది కాబట్టి, దీనివల్ల సామాన్యులకు ఇబ్బంది ఉండదని, కేవలం బ్లాక్ మార్కెట్ను అరికట్టడానికే ఈ నిర్ణయం తీసుకున్నామని ప్రభుత్వం వెల్లడించింది.
