Gold Silver Price : వెనిజులా సంక్షోభంతో రికార్డు స్థాయిలో పెరిగిన ధరలు..తులం బంగారం లక్షన్నర దిశగా

Gold Silver Price : ప్రపంచ రాజకీయాల్లో చోటుచేసుకున్న అనూహ్య పరిణామాలు పసిడి మార్కెట్‌ను కుదిపేస్తున్నాయి. సోమవారం (జనవరి 5) ఉదయం మార్కెట్ ప్రారంభం కావడమే భారీ లాభాలతో మొదలైంది. వెనిజులాలో నెలకొన్న ఉద్రిక్త పరిస్థితులు, అమెరికా సైనిక చర్యల వార్తల నేపథ్యంలో మదుపర్లు బంగారం, వెండి కొనుగోళ్లపై ఎగబడ్డారు. ఫలితంగా తెలుగు రాష్ట్రాల్లోనూ పసిడి ధరలు సామాన్యుడికి అందనంత ఎత్తుకు చేరుకున్నాయి.

అమెరికా సైన్యం వెనిజులాపై దాడి చేసి, అక్కడి అధ్యక్షుడు మదురోను అదుపులోకి తీసుకున్నారన్న వార్తలు అంతర్జాతీయ మార్కెట్లను ఒక్కసారిగా వేడెక్కించాయి. యుద్ధ వాతావరణం నెలకొన్నప్పుడు మదుపర్లు సురక్షితమైన పెట్టుబడిగా భావించే బంగారం వైపు మళ్లుతారు. దీనివల్ల మల్టీ కమోడిటీ ఎక్స్ఛేంజ్‎లో 10 గ్రాముల బంగారం ధర ఏకంగా రూ.2,400 పైగా పెరిగింది. ఒకానొక దశలో తులం బంగారం ధర రూ.1,38,200 మార్కును తాకింది. ఇది త్వరలోనే రూ. 1.50 లక్షల మైలురాయిని చేరుకుంటుందని మార్కెట్ నిపుణులు అంచనా వేస్తున్నారు.

బంగారం కంటే వేగంగా వెండి ధరలు ఆకాశాన్ని తాకాయి. కిలో వెండి ధర ఏకంగా రూ.13,500 మేర ఎగబాకి రూ.2,49,900 వద్ద ట్రేడ్ అయ్యింది. అంటే కిలో వెండి పావు కోటి రూపాయలకు చేరువలో ఉందన్నమాట. గత శుక్రవారంతో పోలిస్తే ఈ పెరుగుదల పారిశ్రామికవేత్తలను, సామాన్య కొనుగోలుదారులను విస్మయానికి గురిచేస్తోంది. అంతర్జాతీయ మార్కెట్ అయిన కామెక్స్‎లో కూడా వెండి ధర 6 శాతం పెరిగి 75 డాలర్ల వద్ద కొనసాగుతోంది.

హైదరాబాద్, విజయవాడ, విశాఖపట్నం వంటి ప్రధాన నగరాల్లోని రిటైల్ మార్కెట్లలో కూడా ఈ ప్రభావం గట్టిగా కనిపిస్తోంది. ప్యూర్ గోల్డ్ (24 క్యారెట్లు) ధర రూ.1.38 లక్షల పైన పలుకుతుండగా, ఆభరణాల తయారీకి వాడే 22 క్యారెట్ల బంగారం ధర కూడా భారీగా పెరిగింది. పెళ్లిళ్ల సీజన్ సమీపిస్తుండటంతో ఈ రేట్లు చూసి మధ్యతరగతి జనం బెంబేలెత్తిపోతున్నారు. వెనిజులా సంక్షోభంతో పాటు రష్యా-ఉక్రెయిన్ శాంతి చర్చల్లో అనిశ్చితి, అమెరికాలో వడ్డీ రేట్ల తగ్గింపు అంచనాలు కూడా పసిడికి రెక్కలు తొడుగుతున్నాయి.

ఈ వారం వెలువడనున్న అమెరికా ఉపాధి గణాంకాలు, తయారీ రంగ డేటా వంటివి మార్కెట్ దిశను నిర్ణయించనున్నాయి. ఒకవేళ వెనిజులాలో ఉద్రిక్తతలు మరింత పెరిగితే, బంగారం ధర తన ఆల్-టైమ్ హై రికార్డు అయిన రూ.1,40,465ను దాటి కొత్త రికార్డులను సృష్టించే అవకాశం ఉంది. వెండి కూడా రూ.2.75 లక్షల మార్కును తాకవచ్చని విశ్లేషకులు చెబుతున్నారు. కాబట్టి కొనుగోలుదారులు వేచి చూసే ధోరణి అవలంబించడం ఉత్తమమని నిపుణుల సలహా.