Loan Guarantee : వ్యాపారస్తులకు కేంద్రం బంపర్ ఆఫర్..రూ.2.5 లక్షల కోట్ల భారీ ప్యాకేజీ

Loan Guarantee : మధ్యప్రాచ్య దేశాల్లో నెలకొన్న యుద్ధ వాతావరణం భారతీయ వ్యాపారాలపై, ముఖ్యంగా సూక్ష్మ, చిన్న, మధ్యతరహా పరిశ్రమల పై తీవ్ర ప్రభావం చూపుతోంది. ఈ సంక్షోభం నుంచి వ్యాపారస్తులను గట్టెక్కించేందుకు కేంద్ర ప్రభుత్వం ఒక భారీ ఊరట ప్యాకేజీని సిద్ధం చేస్తోంది. సుమారు రూ.2.5 లక్షల కోట్ల రుణ గ్యారెంటీ పథకాన్ని ప్రవేశపెట్టే దిశగా అడుగులు వేస్తోంది. అమెరికా-ఇరాన్ మధ్య జరుగుతున్న ఘర్షణల వల్ల ఆర్థికంగా దెబ్బతిన్న వ్యాపారాలకు ఈ పథకం ఒక ఆశాకిరణంలా మారనుంది.

మధ్యప్రాచ్య దేశాల్లో నెలకొన్న అస్థిరత వల్ల చాలామంది వ్యాపారస్తులు తాము తీసుకున్న రుణాలను సకాలంలో చెల్లించలేకపోతున్నారు. ఇలాంటి పరిస్థితుల్లో రుణాలు ఇచ్చే బ్యాంకులకు భరోసా కల్పిస్తూ, వ్యాపారస్తులకు మరిన్ని రుణాలు అందేలా చూడటమే ఈ పథకం ముఖ్య ఉద్దేశ్యం. ఈ పథకం కింద రూ.100 కోట్ల వరకు ఉండే రుణాలపై ప్రభుత్వం సుమారు 90 శాతం గ్యారెంటీని అందిస్తుంది. అంటే ఒకవేళ అప్పు తీసుకున్న వారు చెల్లించలేకపోతే, ఆ బాధ్యతను ప్రభుత్వం తరపున నేషనల్ క్రెడిట్ గ్యారెంటీ ట్రస్టీ కంపెనీ తీసుకుంటుంది. దీనికోసం ప్రభుత్వం తన బడ్జెట్‌లో సుమారు రూ.17,000 నుంచి రూ.18,000 కోట్ల వరకు నిధులను కేటాయించాల్సి ఉంటుందని అంచనా.

నిజానికి ఇలాంటి పథకం కొత్తదేమీ కాదు. 2020లో కోవిడ్ మహమ్మారి వల్ల దేశవ్యాప్తంగా లాక్‌డౌన్‌ విధించినప్పుడు, ఆర్థిక వ్యవస్థను కాపాడేందుకు ప్రభుత్వం ఎమర్జెన్సీ క్రెడిట్ గ్యారెంటీ స్కీమ్ ను తీసుకువచ్చింది. ఆ సమయంలో ఈ పథకం చిన్న వ్యాపారాలకు వెన్నుముకలా నిలిచింది. అదనపు హామీలు లేకుండానే బ్యాంకులు వ్యాపారస్తులకు రుణాలు ఇచ్చేలా ప్రభుత్వం అప్పట్లో 100 శాతం గ్యారెంటీ ఇచ్చింది. ఆ అనుభవంతోనే ఇప్పుడు మధ్యప్రాచ్య యుద్ధం వల్ల తలెత్తిన ఆర్థిక సవాళ్లను ఎదుర్కోవడానికి ప్రభుత్వం సిద్ధమైంది. అప్పట్లో ఈ పథకం ద్వారా లక్షలాది కంపెనీలు మూతపడకుండా ఆగిపోయాయి.

కేవలం వ్యాపారస్తులకే కాకుండా, పెరుగుతున్న ధరల నుంచి సామాన్యులను కాపాడేందుకు కూడా ప్రభుత్వం పలు చర్యలు తీసుకుంది. అంతర్జాతీయ మార్కెట్‌లో క్రూడ్ ఆయిల్ ధరలు భగ్గుమంటున్న తరుణంలో, పెట్రోల్ మరియు డీజిల్ పై ఎక్సైజ్ సుంకాన్ని లీటరుకు రూ.10 వరకు తగ్గించింది. దీనివల్ల రవాణా ఖర్చులు తగ్గి నిత్యావసరాల ధరలు అదుపులోకి వస్తాయని భావిస్తున్నారు. అలాగే పెట్రో కెమికల్ ఉత్పత్తుల దిగుమతులపై కూడా కస్టమ్స్ డ్యూటీని ప్రభుత్వం మినహాయించింది. యుద్ధం వల్ల సముద్ర మార్గాల్లో రవాణా అస్తవ్యస్తమైనా, దేశంలో సరఫరా తగ్గకుండా ప్రభుత్వం అన్ని జాగ్రత్తలు తీసుకుంటోంది.

ఫిబ్రవరిలో ఇరాన్ పై జరిగిన దాడుల తర్వాత ప్రపంచవ్యాప్తంగా చమురు ధరలు 50 శాతం వరకు పెరిగాయి. దీనివల్ల దేశంలో ఇంధన కొరత ఏర్పడకుండా ఉండేందుకు, విదేశాలకు ఎగుమతి చేసే డీజిల్ పై లీటరుకు రూ.21.50, విమాన ఇంధనం పై రూ.29.50 చొప్పున ఎగుమతి సుంకాన్ని ప్రభుత్వం విధించింది. దీనివల్ల మన దేశంలో తయారయ్యే ఇంధనం ముందుగా మన దేశ అవసరాలకే ఉపయోగపడుతుంది. భారత్ కేవలం చమురు మాత్రమే కాకుండా సహజ వాయువు, ఎరువుల కోసం కూడా విదేశాలపై ఆధారపడి ఉన్నందున, ఈ యుద్ధ సంక్షోభం నుండి దేశాన్ని కాపాడటం ప్రభుత్వానికి పెద్ద సవాలుగా మారింది.