Salary Hike : బ్యాంకు ఉద్యోగులకు పండగే పండగ.. ఏళ్ల నిరీక్షణకు చెక్ పెడుతూ జీతాల పెంపుకు కేంద్రం గ్రీన్ సిగ్నల్

Salary Hike : ప్రభుత్వ బ్యాంకుల్లో రేయింబవళ్లు కష్టపడుతున్న లక్షలాది మంది ఉద్యోగులకు కేంద్ర ప్రభుత్వం అదిరిపోయే తీపి కబురు అందించింది. సాధారణంగా బ్యాంకు ఉద్యోగులకు జీతాల పెంపు అంటే ఏళ్ల తరబడి నిరీక్షణ తప్పదు. కానీ, ఈసారి సీన్ మారింది. ఎప్పుడో జరగాల్సిన చర్చలను ఇప్పుడే మొదలుపెట్టి, సకాలంలో పెంచిన జీతాలను ఉద్యోగుల చేతికి అందించాలని కేంద్రం బ్యాంకులకు డెడ్ లైన్ విధించింది. 13వ ద్వైపాక్షిక ఒప్పందం ద్వారా 2027 నవంబర్ 1 నాటికే కొత్త జీతాలు అమల్లోకి రావాలని ప్రభుత్వం స్పష్టమైన ఆదేశాలు జారీ చేసింది.

కేంద్ర ఆర్థిక మంత్రిత్వ శాఖ పరిధిలోని ఆర్థిక సేవల విభాగం ఈ నెల 20న అన్ని ప్రభుత్వ బ్యాంకుల అధిపతులకు కీలక ఆదేశాలు పంపింది. గతంలో ప్రధాన ఒప్పందం కుదిరిన తర్వాత కూడా నిబంధనల్లో మార్పులకు చాలా సమయం పట్టేది. దీనివల్ల ఉద్యోగులు నష్టపోయేవారు. అందుకే ఈసారి చర్చల ప్రక్రియను కేవలం 12 నెలల్లోపే పూర్తి చేయాలని ప్రభుత్వం అల్టిమేటం ఇచ్చింది. నవంబర్ 1, 2027 నాటికి పెరిగిన జీతాలు ఉద్యోగుల అకౌంట్లలో జమ కావాల్సిందేనని, అందుకోసం ఇండియన్ బ్యాంక్స్ అసోసియేషన్, ఉద్యోగ సంఘాలు ఇప్పుడే చర్చలు ప్రారంభించాలని స్పష్టం చేసింది.

బ్యాంకు ఉద్యోగులకు జీతాలు పెంచడానికి యాజమాన్యాలు గతంలో సాకులు చెప్పేవి. కానీ ఇప్పుడు ప్రభుత్వ బ్యాంకుల ఆర్థిక పరిస్థితి అద్భుతంగా ఉంది. 2023 ఆర్థిక సంవత్సరంలో రూ.1.05 లక్షల కోట్లుగా ఉన్న బ్యాంకుల లాభాలు, 2025 నాటికి ఏకంగా రూ.1.78 లక్షల కోట్ల చారిత్రక స్థాయికి చేరుకున్నాయి. బ్యాంకుల లాభాలు పెరగడంతో పాటు ఎన్పీఏ (NPA)లు రికార్డు స్థాయిలో 2.30% కి పడిపోయాయి. బ్యాంకుల బ్యాలెన్స్ షీట్లు స్ట్రాంగ్‌గా ఉండటంతో ఉద్యోగులకు మెరుగైన జీతాలు ఇచ్చేందుకు ఎలాంటి ఆటంకాలు లేవని విశ్లేషకులు భావిస్తున్నారు.

ప్రతి ఐదేళ్లకోసారి జరిగే ఈ వేతన సవరణ వల్ల ప్రభుత్వ రంగ బ్యాంకుల లక్షలాది మంది సిబ్బందికి నేరుగా లబ్ధి చేకూరుతుంది. కేవలం ప్రభుత్వ బ్యాంకులు మాత్రమే కాకుండా, ఈ ఒప్పందంలో భాగస్వాములుగా ఉన్న కొన్ని పాత ప్రైవేట్ బ్యాంకులు మరియు విదేశీ బ్యాంకుల ఉద్యోగులకు కూడా జీతాలు పెరుగుతాయి. ఆఫీసర్ల నుంచి క్లరికల్ స్టాఫ్ వరకు అందరికీ ఈ పెంపు వర్తిస్తుంది.

రాబోయే రోజుల్లో బ్యాంకింగ్ రంగంలో మరిన్ని సంస్కరణలు తీసుకురావాలని ప్రభుత్వం భావిస్తోంది. ఈ క్రమంలో ఉద్యోగుల్లో ఉత్సాహాన్ని నింపడానికి సకాలంలో వేతన సవరణ పూర్తి చేయడం చాలా ముఖ్యం. చర్చల ప్రక్రియలో తలెత్తే న్యాయపరమైన, సాంకేతిక ఇబ్బందులను ముందే పరిష్కరించుకుని, గడువు ముగిసే లోపు తుది నివేదిక సిద్ధం చేయాలని బ్యాంకులకు సూచించింది. దీనివల్ల గతంలోలాగా ఏళ్ల తరబడి బకాయిల కోసం వేచి చూడాల్సిన అవసరం ఉద్యోగులకు ఉండదు.