HDFC Bank : హెచ్డీఎఫ్సీ బ్యాంక్ సంచలన నిర్ణయం.. ముగ్గురు ఉన్నతాధికారుల పై వేటు
ముగ్గురు ఉన్నతాధికారుల పై వేటు
HDFC Bank : దేశంలోనే అతిపెద్ద ప్రైవేట్ రంగ బ్యాంక్ అయిన హెచ్డీఎఫ్సీలో ప్రస్తుతం ప్రకంపనలు రేగుతున్నాయి. బ్యాంక్ మేనేజ్మెంట్ అత్యంత కఠినమైన నిర్ణయం తీసుకుంటూ ముగ్గురు అగ్రశ్రేణి అధికారులను ఉద్యోగాల నుంచి తొలగించింది. దుబాయ్ బ్రాంచ్లో జరిగిన భారీ ఆర్థిక అవకతవకలు, నిబంధనలకు విరుద్ధంగా పెట్టుబడులు పెట్టించడం వంటి ఆరోపణలు నిరూపణ కావడంతో ఈ వేటు పడింది. ముఖ్యంగా విదేశీ కస్టమర్లను తప్పుదోవ పట్టించి, రిస్క్ ఎక్కువగా ఉండే బాండ్లను విక్రయించిన వ్యవహారం ఇప్పుడు బ్యాంకింగ్ రంగంలో హాట్ టాపిక్గా మారింది.
దుబాయ్ బ్రాంచ్లో ఏం జరిగింది?
హెచ్డీఎఫ్సీ బ్యాంక్కు చెందిన దుబాయ్ బ్రాంచ్లో విదేశీ కస్టమర్లను చేర్చుకునే ప్రక్రియలో భారీ లోపాలు ఉన్నట్లు బ్యాంక్ అంతర్గత విచారణలో తేలింది. ఇన్వెస్టర్లకు సరైన సమాచారం ఇవ్వకుండా, వారిని తప్పుదోవ పట్టించి పెట్టుబడులు పెట్టించినట్లు ఆరోపణలు వచ్చాయి. ముఖ్యంగా, భారత్లో ఉన్న విదేశీ కరెన్సీ (FCNR) డిపాజిట్లను బహ్రెయిన్కు తరలించి, అక్కడ అత్యంత ప్రమాదకరమైన క్రెడిట్ సుయిస్ ఎటి-1 బాండ్లలో పెట్టుబడి పెట్టేలా అధికారులే ప్రోత్సహించారని తేలింది. ఈ బాండ్లలో రిస్క్ ఎక్కువగా ఉంటుందని తెలిసినా, కస్టమర్లకు ఆ విషయం చెప్పకుండా మోసం చేశారన్నది ప్రధాన ఫిర్యాదు.
ఎవరెవరిపై వేటు పడింది?
ఈ కేసులో బాధ్యులుగా తేలిన ముగ్గురు కీలక అధికారులను బ్యాంక్ వెంటనే విధుల్లోంచి తొలగించింది. వారిలో బ్రాంచ్ బ్యాంకింగ్ గ్రూప్ హెడ్ సంపత్ కుమార్ ఒకరు. ఈయనతో పాటు మిడిల్ ఈస్ట్ అండ్ ఆఫ్రికా ఎగ్జిక్యూటివ్ వైస్ ప్రెసిడెంట్ హర్ష్ గుప్తా, మరో అధికారి పాయల్ మంధ్యాన్లను కూడా బర్తరఫ్ చేశారు. నిజానికి హర్ష్ గుప్తా, పాయల్ మంధ్యాన్లను గత ఏడాది జనవరిలోనే సస్పెండ్ చేశారు. తాజాగా విచారణ పూర్తి కావడంతో, బ్యాంక్ తన కఠినమైన విధానాలను అనుసరిస్తూ వారిని శాశ్వతంగా పంపించేసింది. నిబంధనల విషయంలో తాము ఏమాత్రం రాజీపడబోమని హెచ్డీఎఫ్సీ స్పష్టం చేసింది.
దుబాయ్ అథారిటీ సీరియస్
ఈ వివాదం కారణంగా సెప్టెంబర్ 2025లోనే దుబాయ్ ఫైనాన్షియల్ సర్వీసెస్ అథారిటీ హెచ్డీఎఫ్సీ దుబాయ్ బ్రాంచ్పై ఆంక్షలు విధించింది. కొత్త కస్టమర్లను చేర్చుకోవద్దని, ఎటువంటి వ్యాపారం చేయవద్దని ఆదేశించింది. బ్యాంక్ అనుసరిస్తున్న క్రాస్ బోర్డర్ ఆపరేటింగ్ మోడల్ వల్ల అనేక సమస్యలు తలెత్తుతున్నాయని గుర్తించింది. యూఏఈలో రిలేషన్షిప్ మేనేజర్లు మాట్లాడటం, దుబాయ్ నుంచి సలహాలు ఇవ్వడం, ఖాతాలు మాత్రం బహ్రెయిన్లో తెరవడం వంటి సంక్లిష్ట ప్రక్రియ విచారణ సంస్థల దృష్టిని ఆకర్షించింది.
చైర్మన్ రాజీనామాతో పెరిగిన ఉత్కంఠ
ఇదిలా ఉండగా, ఇటీవల బ్యాంక్ మాజీ చైర్మన్ అతాను చక్రవర్తి మేనేజ్మెంట్తో నైతిక విభేదాలు ఉన్నాయని చెప్తూ అకస్మాత్తుగా రాజీనామా చేయడం పరిస్థితిని మరింత క్లిష్టంగా మార్చింది. ఒకవైపు టాప్ అధికారుల తొలగింపు, మరోవైపు చైర్మన్ రాజీనామాతో హెచ్డీఎఫ్సీలో ఏదో పెద్ద గొడవే జరుగుతోందని మార్కెట్ వర్గాలు భావిస్తున్నాయి. అయితే, తమ మేనేజ్మెంట్ వ్యవస్థ చాలా పటిష్టంగా ఉందని, నిబంధనలను అతిక్రమిస్తే ఎవరినైనా ఉపేక్షించే ప్రసక్తే లేదని బ్యాంక్ యాజమాన్యం గట్టిగా చెబుతోంది.
