Delivery Partners : మండే ఎండల్లో క్విక్ కామర్స్ విలవిల.. డెలివరీ బాయ్స్ లేక ఆగిపోతున్న ఆర్డర్లు

Delivery Partners : భారతదేశంలో ఇప్పుడు ఎండలు మండిపోతున్నాయి. ఈ భానుడి భగభగలకు సాధారణ ప్రజలే కాదు, దేశంలోని క్విక్ కామర్స్ కంపెనీలు కూడా విలవిలలాడుతున్నాయి. 10 నిమిషాల్లో డెలివరీ చేస్తామంటూ ఊదరగొట్టిన కంపెనీలకు ఇప్పుడు డెలివరీ పార్ట్‌నర్స్ దొరకక చుక్కలు కనిపిస్తున్నాయి. మధ్యాహ్నం పూట ఎండ తీవ్రత తట్టుకోలేక డెలివరీ బాయ్స్ రోడ్ల మీదకు రావడానికి భయపడుతున్నారు. దీంతో డిమాండ్ విపరీతంగా ఉన్నా, సరఫరా చేయలేక కంపెనీలు బేజారవుతున్నాయి. అసలు 10 నిమిషాల డెలివరీ మోడల్‌కు వచ్చిన కష్టాలేంటి? కంపెనీలు చేస్తున్న ప్రయత్నాలేంటో చూద్దాం.

ఎండ ప్రతాపం - డెలివరీల కష్టం

దేశంలో ఉష్ణోగ్రతలు 45 డిగ్రీల మార్కును దాటుతున్నాయి. ఈ భీభత్సమైన ఎండల వల్ల మధ్యాహ్నం 12 గంటల నుంచి సాయంత్రం 4 గంటల వరకు డెలివరీ పార్ట్‌నర్లు పని చేయడానికి ఇష్టపడటం లేదు. సాధారణంగా వేసవిలో కూల్ డ్రింక్స్, ఐస్ క్రీమ్స్, జ్యూస్ పౌడర్ల కోసం డిమాండ్ 20 శాతం వరకు పెరుగుతుంది. కానీ ఈసారి డిమాండ్ పెరిగినప్పటికీ, వాటిని కస్టమర్ల దగ్గరికి చేర్చే రైడర్లు అందుబాటులో లేకపోవడం కంపెనీలకు పెద్ద తలనొప్పిగా మారింది. మెట్రో నగరాల్లో డెలివరీ పార్ట్‌నర్ల కొరత తీవ్రంగా ఉంది.

ఇన్సెంటివ్‌ల వర్షం కురిపిస్తున్న కంపెనీలు

డెలివరీ పార్ట్‌నర్లను ఆకర్షించడానికి కంపెనీలు భారీగా ఇన్సెంటివ్‌లను ప్రకటిస్తున్నాయి. మామూలుగా ఒక డెలివరీపై రూ.20 నుంచి రూ.30 సంపాదించే రైడర్లకు, ఇప్పుడు మధ్యాహ్నం సమయంలో ఆర్డర్లు డెలివరీ చేస్తే అదనంగా రూ.8 నుండి రూ.15 వరకు బోనస్ ఇస్తున్నారు. అంటే డెలివరీ ఛార్జీ కంటే ఇన్సెంటివ్‌ల కోసమే కంపెనీలు ఎక్కువ ఖర్చు చేయాల్సి వస్తోంది. అయినప్పటికీ ప్రాణాల మీదకు తెచ్చుకుని ఎండలో తిరగడం కంటే విశ్రాంతి తీసుకోవడమే మేలని రైడర్లు భావిస్తున్నారు.

రైడర్ల కోసం ప్రత్యేక సదుపాయాలు

అమెజాన్, బిగ్ బాస్కెట్ వంటి కంపెనీలు తమ డెలివరీ పార్ట్‌నర్ల ఆరోగ్యం కోసం కొన్ని చర్యలు తీసుకున్నాయి. డెలివరీ సెంటర్ల వద్ద చల్లని తాగునీరు, ఎలక్ట్రోలైట్స్ (ఓఆర్ఎస్) అందుబాటులో ఉంచారు. అలాగే హీట్-ఇండెక్స్ మానిటరింగ్ ద్వారా వాతావరణం మరీ దారుణంగా ఉన్నప్పుడు ఆర్డర్లను తాత్కాలికంగా నిలిపివేస్తున్నారు. రైడర్లు విశ్రాంతి తీసుకోవడానికి ప్రత్యేక రెస్టింగ్ పాయింట్లు కూడా ఏర్పాటు చేశారు. అయినా సరే, ఎండ వేడికి భయపడి చాలామంది రైడర్లు తమ సొంత గ్రామాలకు లేదా వ్యవసాయ పనుల కోసం వెళ్ళిపోవడం మెట్రో నగరాల్లో సంక్షోభాన్ని పెంచుతోంది.

సప్లై చైన్‌పై ఒత్తిడి

డిమాండ్ అంచనాల కంటే 3 రెట్లు పెరగడంతో ఉత్పత్తి, పంపిణీ మేనేజ్ చేయడం కంపెనీలకు సవాల్‌గా మారింది. ఐస్ క్రీములు కరిగిపోకుండా ఉండటానికి కోల్డ్ స్టోరేజ్ సామర్థ్యాన్ని పెంచారు. యాప్ లలో సమ్మర్ ఎసెన్షియల్స్ పేరుతో ప్రత్యేక సెక్షన్లను పెట్టారు. మరోవైపు గిగ్ వర్కర్స్ యూనియన్లు ప్రభుత్వానికి విన్నవిస్తూ.. హీట్ వేవ్ సమయంలో పనిచేసే వర్కర్ల కోసం ప్రత్యేక రక్షణ చట్టాలు తీసుకురావాలని డిమాండ్ చేస్తున్నాయి. మొత్తానికి ఈ వేసవి 10 నిమిషాల డెలివరీ మోడల్ లో ఉన్న లొసుగులను బయటపెట్టింది.