Home Loan : రెపో రేటు తగ్గడంతో హోమ్ లోన్స్ చౌక.. వివిధ బ్యాంకుల వడ్డీ రేట్లు ఇవే

Home Loan : రిజర్వ్ బ్యాంక్ ఆఫ్ ఇండియా రెపో రేటును వరుసగా మూడుసార్లు తగ్గించింది. దీని తర్వాత దాదాపు అన్ని బ్యాంకులు కూడా తమ వడ్డీ రేట్లను తగ్గిస్తున్నాయి. ముఖ్యంగా లోన్ల పై వడ్డీ రేట్లు గణనీయంగా తగ్గాయి. హోమ్ లోన్ వడ్డీ రేట్లు కూడా తగ్గాయి. ఈ రోజుల్లో ఒక సాధారణ ఇంటిని నిర్మించడానికి కనీసం రూ.25 లక్షలు అవసరం అవుతుంది.

హైదరాబాద్ వంటి ప్రాంతంలో ఇంటి నిర్మాణం సగటున రూ.60 లక్షలు ఖర్చవుతుందని అంచనా. ప్రతి చదరపు అడుగు నిర్మాణ వ్యయం రూ.1,500 నుండి రూ.6,000 వరకు ఉండవచ్చు. ఇంటిని నిర్మించడానికి లోన్ తీసుకోవడం తప్పనిసరి. అందుకే, హోమ్ లోన్ వడ్డీ రేటు చాలా ముఖ్యం. బ్యాంక్ ఆఫ్ ఇండియా నుంచి కెనరా బ్యాంక్ వరకు వివిధ బ్యాంకుల్లో హోమ్ లోన్ల పై వడ్డీ రేట్లు ఎలా ఉన్నాయో తెలుసుకుందాం.

వివిధ బ్యాంకుల తాజా గృహ రుణ వడ్డీ రేట్లు

* కోటక్ మహీంద్ర బ్యాంక్: ఈ ప్రైవేట్ బ్యాంక్ రూ.75 లక్షలకు పైబడిన రుణాలపై వడ్డీని 8.20శాతం నుండి ప్రారంభిస్తుంది. ప్రాసెసింగ్ ఫీజు 2శాతం ఉంటుంది.

* హెచ్‌డిఎఫ్‌సి బ్యాంక్: భారతదేశంలో అతిపెద్ద ప్రైవేట్ బ్యాంక్ అయిన హెచ్‌డిఎఫ్‌సిలో హోమ్ లోన్ వడ్డీ రేటు 8.15శాతం నుండి ప్రారంభమవుతుంది. ప్రాసెసింగ్ ఫీజు 0.50శాతం నుండి 1.50శాతం వరకు ఉంటుంది.

* పంజాబ్ నేషనల్ బ్యాంక్: భారతదేశంలో రెండవ అతిపెద్ద ప్రభుత్వ రంగ బ్యాంక్ అయిన పిఎన్‌బిలో హోమ్ లోన్ వడ్డీ రేటు 7.50శాతం నుండి ప్రారంభమవుతుంది. దీనితో పాటు ప్రాసెసింగ్ ఫీజు 0.35శాతం చెల్లించాలి.

* బ్యాంక్ ఆఫ్ బరోడా: ఈ ప్రభుత్వ రంగ బ్యాంక్ ఆఫ్ బరోడాలో హోమ్ లోన్ రేటు 7.50శాతం నుండి ప్రారంభమవుతుంది. ప్రాసెసింగ్ ఫీజు రూ.5,000 నుండి ప్రారంభమవుతుంది.

* స్టేట్ బ్యాంక్ ఆఫ్ ఇండియా: భారతదేశంలో అతిపెద్ద ప్రభుత్వ రంగ బ్యాంక్ అయిన ఎస్‌బిఐలో గృహ రుణ రేటు 7.50శాతం నుండి 10.50శాతం వరకు ఉంటుంది. ప్రాసెసింగ్ ఫీజు 0.35% ఉంటుంది. ఈ రుసుము రూ.2,000 నుండి రూ.10,000 వరకు ఉండవచ్చు.

* కెనరా బ్యాంక్: ఈ ప్రభుత్వ రంగ బ్యాంకులో రూ.75 లక్షలకు పైబడిన గృహ రుణాలపై వడ్డీ రేటు 7.40శాతం నుండి ప్రారంభమవుతుంది. ప్రాసెసింగ్ ఫీజు రూ.1,500 నుండి రూ.10,000 వరకు ఉంటుంది.

* బ్యాంక్ ఆఫ్ ఇండియా: ఈ ప్రభుత్వ రంగ బ్యాంకులో హోమ్ లోన్‌పై వడ్డీ రేటు 7.35శాతం నుండి ప్రారంభమవుతుంది. భారతదేశంలోని బ్యాంకుల్లో ప్రస్తుతం దీనిలోనే అత్యంత తక్కువ గృహ రుణ రేటు ఉంది.

బ్యాంకులు గృహ రుణాల కోసం క్రెడిట్ స్కోర్‌ను కూడా పరిశీలిస్తాయి. మంచి క్రెడిట్ స్కోర్ ఉంటే, వడ్డీ రేటు కనిష్టంగా ఉంటుంది. క్రెడిట్ స్కోర్ సాధారణంగా ఉంటే, వడ్డీ రేటు కొద్దిగా ఎక్కువగా ఉంటుంది. కాబట్టి, గృహ రుణం కోసం దరఖాస్తు చేసే ముందు మీ క్రెడిట్ స్కోర్‌ను మెరుగుపరచుకోవడం చాలా ముఖ్యం.