Gold Price Maker : గనుల తవ్వకం పెంచితే.. ప్రపంచ మార్కెట్‌లో బంగారం ధరను మనమే ఫిక్స్ చేయవచ్చా ?

Gold Price Maker : రాబోయే దశాబ్దంలో భారతదేశం బంగారం మార్కెట్‌లో ప్రైస్-మేకర్ గా ఎదిగేందుకు బలమైన అవకాశాలు ఉన్నాయని స్వర్ణ పరిశ్రమ నిపుణులు అంటున్నారు. దేశీయంగా బంగారం గనుల తవ్వకాన్ని పెంచడం ద్వారా, రాబోయే పదేళ్లలో భారతదేశం తన స్వర్ణ వినియోగంలో దాదాపు 20 శాతం వరకు స్వయంగా ఉత్పత్తి చేయగలుగుతుందని వారు అంచనా వేస్తున్నారు. ప్రస్తుతం మన దేశం ప్రపంచ మార్కెట్‌లో నిర్ణయించబడిన ధరలకు కట్టుబడి ఉండే ప్రైస్-టేకర్ గా మాత్రమే ఉంది. అయితే రిజర్వ్ బ్యాంక్ ఆఫ్ ఇండియా చొరవ, బలమైన గోల్డ్ బ్యాంకింగ్ సిస్టమ్ అభివృద్ధి ద్వారా ఈ పరిస్థితి మారనుందని నిపుణులు అభిప్రాయపడుతున్నారు.

వరల్డ్ గోల్డ్ కౌన్సిల్ ఇండియా సీఈవో సచిన్ జైన్, ఛాంబర్ ఆఫ్ కామర్స్ ఆఫ్ ఇండియా సమావేశంలో మాట్లాడుతూ.. బలమైన దేశీయ తవ్వకం, గోల్డ్ బ్యాంకింగ్ సిస్టమ్ లేకపోవడం వల్లనే భారత్ ఇప్పటివరకు ప్రైస్-టేకర్ గా ఉండిపోయిందని అన్నారు. రిజర్వ్ బ్యాంక్ ఆఫ్ ఇండియా చొరవ, బ్యాంకింగ్ సిస్టమ్ అభివృద్ధి చెందడంతో, భారతదేశం ప్రపంచ బంగారం ధరలపై తన పట్టును బలోపేతం చేసుకుంటుంది. ప్రైస్-మేకర్‎గా మారే దిశగా పయనిస్తుందని ఆయన ధీమా వ్యక్తం చేశారు.

ప్రస్తుతం విదేశీ మార్కెట్లలో నిర్ణయించబడిన ధరలకు కట్టుబడి ఉండాల్సిన పరిస్థితి భారత్‌కు ఉంది. కానీ దేశీయ స్థాయిలో బంగారం తవ్వకం పెరిగితే, భారతదేశం ధరలను ప్రభావితం చేసే లేదా నిర్ణయించే సామర్థ్యాన్ని సంపాదించుకోగలుగుతుంది. ఆదిత్య బిర్లా గ్రూప్ నోవెల్ జ్యువెలరీస్ సీఈవో సందీప్ కోహ్లీ ఈ సందర్భంగా కొన్ని ఆసక్తికర గణాంకాలను పంచుకున్నారు.

భారతీయ వినియోగదారుల వద్ద సుమారు 25,000 టన్నుల బంగారం నిల్వలు ఉన్నాయి. దీనితో పోలిస్తే ప్రభుత్వ వద్ద కేవలం 800 టన్నుల బంగారం మాత్రమే ఉంది. దేశంలో ఇంత భారీ స్థాయిలో బంగారం వినియోగం ఉన్నప్పటికీ, తుది వినియోగదారుల ధరలపై భారత మార్కెట్ ప్రభావం పరిమితంగానే ఉందని ఆయన అన్నారు. గ్లోబల్ పోటీ కోసం అంతర్జాతీయ ప్రమాణాలను అనుసరించడం అవసరం. 24 క్యారెట్ల బంగారు ఇటుకలు, కడ్డీల ఎగుమతిపై RBI 2012-13 ఆర్థిక సంవత్సరంలో విధించిన నిషేధాన్ని ఎత్తివేయాలని ఆయన డిమాండ్ చేశారు.