ITR Filing : ఐటీఆర్ ఫైల్ చేస్తున్నారా?.. విదేశీ సంపాదన దాస్తే రూ.10 లక్షల భారీ జరిమానా తప్పదు
రూ.10 లక్షల భారీ జరిమానా తప్పదు
ITR Filing : భారతదేశంలో ట్యాక్స్ పరిధిలోకి వచ్చే ప్రతి ఒక్కరూ ఏటా ఐటీఆర్ దాఖలు చేయడం చట్టబద్ధమైన నిబంధన. అయితే చాలా మంది ట్యాక్స్ పేయర్లు భారతదేశంలో తాము సంపాదించిన ఆదాయాన్ని మాత్రమే ఐటీఆర్లో చూపిస్తూ, విదేశాలలో ఉన్న ఆస్తులు లేదా సంపాదనను ఉద్దేశపూర్వకంగానో లేదా అవగాహన లేకనో దాచేస్తుంటారు. ముఖ్యంగా ఎన్ఆర్ఐలుగా ఉండి వచ్చిన వారు, విదేశీ క్లయింట్లతో వ్యాపారాలు చేసేవారు ఈ తప్పు చేస్తుంటారు. కానీ ప్రస్తుత నిబంధనల ప్రకారం, భారతీయ పౌరుడిగా ఉంటూ విదేశాల్లో ఎలాంటి చిన్న ఆస్తి లేదా బ్యాంక్ ఖాతా ఉన్నా.. దాని వివరాలను ఐటీఆర్లో స్పష్టంగా పేర్కొనడం తప్పనిసరి.
విదేశీ ఆదాయాన్ని కనిపెట్టడం ఇప్పుడు చాలా ఈజీ
ఈ ఆధునిక డిజిటల్ యుగంలో ఆస్తులను లేదా ఆదాయాన్ని ఐటీ శాఖ కంటికి కనబడకుండా దాచడం దాదాపు అసాధ్యం. గతంలో లాగా విదేశీ అకౌంట్ల వివరాలు తెలుసుకోవడం కేంద్ర ప్రభుత్వానికి పెద్ద కష్టమేమీ కాదు. ఎందుకంటే, భారత ప్రభుత్వం ప్రపంచంలోని అనేక ప్రధాన దేశాలతో నేరుగా సమాచార మార్పిడి ఒప్పందాలు కుదుర్చుకుంది. ఈ ఒప్పందాల ప్రకారం, విదేశీ ప్రభుత్వాలు, అక్కడి అంతర్జాతీయ బ్యాంకులు, ఆర్థిక సంస్థలు.. భారతీయులకు సంబంధించిన పూర్తి ఆర్థిక లావాదేవీల డేటాను నేరుగా భారత ఆదాయపు పన్ను శాఖకు బదిలీ చేస్తాయి.
మీ దగ్గర విదేశీ ఆస్తుల డేటా ముందే ఉంటుంది
దీని అర్థం ఏమిటంటే.. మీరు ఐటీఆర్ ఫైల్ చేయడానికి ముందే, మీకు ఏ దేశంలో బ్యాంక్ అకౌంట్ ఉంది, ఎక్కడ రియల్ ఎస్టేట్ పెట్టుబడులు ఉన్నాయి, ఏ విదేశీ మార్కెట్లో షేర్లు కొన్నారు అనే పూర్తి సమాచారం ఐటీ శాఖ కంప్యూటర్లలో సిద్ధంగా ఉంటుంది. ఇలాంటి సమయంలో మీరు ఐటీఆర్లో ఆ వివరాలను గోప్యంగా ఉంచితే లేదా తప్పుడు సమాచారం ఇస్తే, సిస్టమ్ వెంటనే దానిని కనిపెట్టేస్తుంది. ఇది నేరుగా ట్యాక్స్ ఎగవేత కిందకు వస్తుంది కాబట్టి, సదరు ట్యాక్స్ పేయర్కు ఐటీ శాఖ నుండి వెంటనే డిమాండ్ నోటీసులు రావడం ఖాయం.
మల్టీనేషనల్ కంపెనీల ఉద్యోగులకు ఐటీఆర్ రూల్స్
మీరు ఏదైనా గ్లోబల్ మల్టీనేషనల్ కంపెనీలో పని చేస్తూ, కంపెనీ మీకు రివార్డ్ లేదా ప్యాకేజీ రూపంలో షేర్లను కేటాయిస్తే ఈ రూల్స్ మీకు కూడా వర్తిస్తాయి. ప్రముఖ ట్యాక్స్ నిపుణుల ప్రకారం.. ఉద్యోగులకు కంపెనీల నుంచి లభించే ఈసాప్స్ (ESOPs), ఆర్ఎస్యూలు (RSUs) లేదా గ్లోబల్ మ్యుచువల్ ఫండ్స్ ఇన్వెస్ట్మెంట్లు కూడా విదేశీ ఆస్తుల కిందకే వస్తాయి. భారత్ వెలుపల నుంచి మీకు ఎలాంటి చిన్న డివిడెండ్ ఆదాయం లేదా వడ్డీ రూపంలో డబ్బులు వచ్చినా.. వాటన్నింటినీ ఐటీఆర్ ఫామ్లోని నిర్దేశిత షెడ్యూల్లో డిక్లేర్ చేయడం చట్టరీత్యా ఖచ్చితంగా అవసరం.
రూ.10 లక్షల జరిమానా, జైలు శిక్ష ముప్పు
ఒకవేళ ఏ ట్యాక్స్ పేయర్ అయినా విదేశీ ఆస్తుల వివరాలను ఐటీఆర్లో చూపించకపోతే ఎలాంటి చర్యలు ఉంటాయనే దానికి ఐటీ చట్టాలు చాలా కఠినమైన సమాధానాన్ని ఇస్తున్నాయి. ఇలాంటి కేసులను సాధారణ ట్యాక్స్ ఎగవేతగా కాకుండా, నేరుగా బ్లాక్ మనీ చట్టం కింద ఐటీ శాఖ పరిగణిస్తుంది. ఈ నేరానికి గానూ సదరు వ్యక్తిపై రూ.10 లక్షల వరకు ముక్కు పిండి భారీ జరిమానా వసూలు చేస్తారు. విషయం కేవలం ఆర్థిక పెనాల్టీతోనే ముగిసిపోదు. ఒకవేళ దాచిన ఆస్తుల విలువ చాలా ఎక్కువగా ఉండి, ఉద్దేశపూర్వకంగానే నల్లధనాన్ని దాచారని రుజువైతే, సదరు వ్యక్తిపై లీగల్ యాక్షన్ తీసుకుని జైలుకు పంపే కఠినమైన నిబంధనలు కూడా ఈ చట్టంలో ఉన్నాయి.
