ITR Filing : టాక్స్ పేయర్లకు అలర్ట్.. అసలు ఐటీఆర్-2 ఎవరెవరు ఫైల్ చేయాలో తెలుసా?

ITR Filing : ఐటీఆర్ దాఖలు చేయడానికి గడువు తేదీ వేగంగా దగ్గరపడుతోంది. పన్ను చెల్లింపుదారులు తమకు వచ్చే ఆదాయ వనరులను బట్టి సరైన ఐటీఆర్ ఫామ్‌ను ఎంచుకోవడం చాలా ముఖ్యం. ఇందులో భాగంగా ఐటీఆర్-2 అనేది సాధారణ జీతం, ఒకే ఒక్క ఇల్లు ఉన్నవారి పరిధిని దాటి అదనపు ఆదాయ వనరులు ఉన్న వ్యక్తుల కోసం ఉద్దేశించబడింది. మీకు ఒకవేళ షేర్లు, మ్యూచువల్ ఫండ్స్ లేదా ఇతర పెట్టుబడుల అమ్మకం ద్వారా లాభాలు లేదా నష్టాలు వచ్చి ఉంటే, మీరు ఖచ్చితంగా ఐటీఆర్-2 ఫామ్‌నే ఎంచుకోవాలి. అలాగే ఒకరి కంటే ఎక్కువ మంది యజమానుల పేరిట హౌస్ ప్రాపర్టీలు ఉన్నా, విదేశాలలో ఏదైనా ఆస్తి లేదా ఆదాయం కలిగి ఉన్నా, లేదా వ్యవసాయం ద్వారా వచ్చే వార్షిక ఆదాయం రూ.5,000 దాటినా ఈ ఫామ్ కిందకే వస్తారు. వీటితో పాటు ఏదైనా కంపెనీ డైరెక్టర్లుగా ఉన్నవారు, బోర్డు మెంబర్లు, అన్‌లిస్టెడ్ కంపెనీల షేర్ హోల్డర్లు, NRI కూడా ఐటీఆర్-2 దాఖలు చేయాల్సి ఉంటుంది.

ఆన్‌లైన్‌లో ఐటీఆర్-2 సులువుగా ఫైల్ చేయడం ఎలా?

ఐటీఆర్-2 ఫామ్‌ను ఆన్‌లైన్‌లో సులభంగా ఫైల్ చేయవచ్చు. దీనికోసం పన్ను చెల్లింపుదారులు ముందుగా ఆదాయపు పన్ను శాఖకు చెందిన అధికారిక ఈ-ఫైలింగ్ పోర్టల్‌లోకి వెళ్లి, తమ పాన్ కార్డ్ నంబర్, పాస్‌వర్డ్ సహాయంతో లాగిన్ అవ్వాలి. ఆ తర్వాత మెనూ బార్‌లోని e-File ఆప్షన్‌ను ఎంచుకుని, అందులో Income Tax Returns పై క్లిక్ చేసి, ఆపై File Income Tax Return ఆప్షన్‌ను సెలెక్ట్ చేసుకోవాలి. అక్కడ అసెస్‌మెంట్ ఇయర్ ను ఎంచుకుని ఆన్‌లైన్ ఫైలింగ్ ప్రక్రియను ప్రారంభించవచ్చు. ఈ ఆధునిక సిస్టమ్ పన్ను చెల్లింపుదారుల ఏఐఎస్, టీఐఎస్, ఫామ్ 26AS ఆధారంగా చాలా వరకు సమాచారాన్ని ఆటోమేటిక్‌గా రీడ్ చేస్తుంది. అయితే, ఈ వివరాలను మీ వ్యక్తిగత ఆదాయం, పెట్టుబడులు, బ్యాంక్ రికార్డులతో ఒకటికి రెండుసార్లు సరిచూసుకోవడం మంచిది.

షేర్లు, మ్యూచువల్ ఫండ్స్ పెట్టుబడిదారులు జాగ్రత్త

ఐటీఆర్-2 ఫామ్ నింపేటప్పుడు అన్నింటికంటే అత్యంత కీలకమైన భాగం క్యాపిటల్ గెయిన్స్. ఇందులో షేర్లు, మ్యూచువల్ ఫండ్స్, బంగారం లేదా స్థిరాస్తుల కొనుగోలు, విక్రయాలకు సంబంధించిన పూర్తి వివరాలను చాలా ఖచ్చితంగా నమోదు చేయాల్సి ఉంటుంది. ఆయా ఆస్తులను కొనుగోలు చేసిన తేదీ, విక్రయించిన తేదీ, కొన్న ధర, అమ్మిన ధర వంటి వివరాల్లో చిన్న తప్పు జరిగినా పన్ను గణన మొత్తం తారుమారై ఐటీ శాఖ నుంచి నోటీసులు వచ్చే ప్రమాదం ఉంది. దీనితో పాటు మీ జీతం, ఇతర గృహాల ద్వారా వచ్చే అద్దె ఆదాయం, బ్యాంక్ డిపాజిట్లపై వచ్చే వడ్డీ, డివిడెండ్ల వివరాలను కూడా జాగ్రత్తగా పూరించాలి. మీ వార్షిక ఆదాయానికి సరిపోయేలా కొత్త లేదా పాత పన్ను విధానాలలో దేనివల్ల తక్కువ పన్ను భారం పడుతుందో చూసుకుని ఆ ఆప్షన్‌ను ఎంచుకోవాలి.

ఐటీఆర్ సబ్మిట్ చేసినంత మాత్రాన సరిపోదు

మొత్తం వివరాలన్నీ పూర్తి చేసిన తర్వాత, మీ జీతం నుండి కట్ అయిన టీడీఎస్, మీరు చెల్లించిన అడ్వాన్స్ టాక్స్ వివరాలను ఫామ్ 26AS తో పూర్తిగా సరిపోల్చాలి. ఒకవేళ ప్రభుత్వానికి ఇంకా ఏదైనా పన్ను బాకీ ఉంటే, ఐటీఆర్ సబ్మిట్ చేయడానికి ముందే ఆ బకాయిని ఆన్‌లైన్ ద్వారా చెల్లించాల్సి ఉంటుంది. రిటర్నులను ఆన్‌లైన్‌లో సబ్‌మిట్ చేసిన తర్వాత అత్యంత ముఖ్యమైన స్టెప్ ఈ-వెరిఫికేషన్. ఐటీఆర్ సబ్మిట్ చేసిన 30 రోజుల లోపు మీ ఆధార్ ఓటీపీ, నెట్ బ్యాంకింగ్ లేదా ఇతర అందుబాటులో ఉన్న డిజిటల్ మార్గాల ద్వారా ఈ-వెరిఫికేషన్ ప్రక్రియను పూర్తి చేయాలి. ఒకవేళ గడువు లోగా ఈ-వెరిఫికేషన్ చేయకపోతే, మీరు ఫైల్ చేసిన ఐటీఆర్ చెల్లకుండా పోతుంది. ఐటీ శాఖ దానిని అసంపూర్ణమైనదిగా పరిగణిస్తుంది.

గడువు దాటితే లేట్ ఫీజ్ బాదుడే

ఆదాయపు పన్ను రిటర్నులు దాఖలు చేయడానికి జూలై 31 ఆఖరి తేదీగా నిర్ణయించారు. ఈ గడువు ముగిసిన తర్వాత రిటర్నులు సమర్పిస్తే భారీగా లేట్ ఫీజు చెల్లించాల్సి వస్తుంది. సమయానికి ఐటీఆర్ దాఖలు చేయడం వల్ల మరో పెద్ద ప్రయోజనం కూడా ఉంది. ముఖ్యంగా షేర్ మార్కెట్ లేదా మ్యూచువల్ ఫండ్స్ పెట్టుబడులలో నష్టాలు చవిచూసిన వారు, తమ నష్టాలను భవిష్యత్తు సంవత్సరాల్లో వచ్చే లాభాలతో అడ్జస్ట్ చేసుకోవచ్చు. అయితే జూలై 31 లోపు ఐటీఆర్ దాఖలు చేయని వారికి ఈ నష్టాలను క్యారీ ఫార్వార్డ్ చేసుకునే వెసులుబాటు ఉండదు. అందుకే, పన్ను నిపుణుల సలహా ప్రకారం చివరి నిమిషం వరకు వేచి ఉండకుండా, మీ వద్ద ఉన్న అన్ని ఆర్థిక పత్రాలను సిద్ధం చేసుకుని ఇప్పుడే ఐటీఆర్-2 ఫైలింగ్ పూర్తి చేయడం ఉత్తమం.