ITR Filing : లాస్ట్ ఛాన్స్ ఇచ్చిన ఆదాయపు పన్ను శాఖ.. ఆలస్యం చేస్తే జరిమానా, జైలు శిక్ష తప్పదు

ITR Filing : ఆదాయపు పన్ను రిటర్న్స్ సమర్పించడానికి గడువు కేవలం ఒక రోజు మాత్రమే పొడిగించబడింది. గతంలో సెప్టెంబర్ 15 వరకు గడువు ఉండేది. ఇప్పుడు దానిని సెప్టెంబర్ 16 వరకు పొడిగించారు. ఈ మధ్యలో వెబ్‌సైట్ క్రాష్ అవ్వడం వంటి సాంకేతిక సమస్యల వల్ల ఐటీఆర్ దాఖలు చేయడంలో ఆలస్యం జరిగింది. అందుకే గడువును పొడిగించాలని అభ్యర్థనలు వచ్చాయి. దీంతో ఒక రోజు అదనపు గడువును ఇచ్చారు.

గడువు సెప్టెంబర్ 30 వరకు పొడిగించబడింది అంటూ ఒక పోస్ట్ ఆన్‌లైన్‌లో వైరల్ అయింది. ఆర్థిక మంత్రిత్వ శాఖ జారీ చేసినట్లుగా ఒక నోటీసును కూడా దానిలో చూపించారు. కానీ అది ఒక తప్పుడు వార్త అని ఆదాయపు పన్ను శాఖ దీనిపై స్పష్టత ఇచ్చింది. ఇప్పుడు కేవలం ఒక రోజు మాత్రమే పొడిగించారు. ఐటీఆర్ దాఖలు చేయడానికి ఉన్న గడువులోగా చెల్లించకపోతే, వివిధ రకాల జరిమానాలు ఎదుర్కోవాల్సి వస్తుంది. రూ. 1,000 నుండి రూ. 5,000 వరకు లేట్ ఫీజు చెల్లించాల్సి ఉంటుంది.

పన్ను బకాయిలపై వడ్డీ చెల్లించడం వంటి సమస్యలను ఎదుర్కోవాల్సి రావచ్చు. ఆదాయపు పన్ను ఇ-ఫైలింగ్ పోర్టల్‌లో ఉన్న టెక్నికల్ సమస్యల వల్ల రిటర్న్స్ దాఖలు చేయడంలో సమస్యలను ఎదుర్కొంటున్న పన్ను చెల్లింపుదారుల సౌలభ్యం కోసం ఈ చర్య తీసుకున్నారు. ఐటీఆర్ దాఖలు గడువు ఒక రోజు పొడిగించడం వల్ల పన్ను చెల్లింపుదారులకు కొద్దిగా ఉపశమనం లభించింది. కానీ చివరి నిమిషంలో సాంకేతిక సమస్యలు లేదా జరిమానాలను నివారించడానికి, ప్రతి ఒక్కరూ తమ ఆదాయపు పన్ను రిటర్న్‌లను సమయానికి దాఖలు చేయాలని శాఖ కోరింది.

సెక్షన్ 234ఎ ప్రకారం పన్ను బకాయిలపై ప్రతి నెల 1% వడ్డీ చెల్లించాల్సి ఉంటుంది. అంతేకాకుండా, రిటర్న్ ఆలస్యంగా దాఖలు చేస్తే, ప్రక్రియకు ఎక్కువ సమయం పడుతుంది. వాపసు పొందడంలో ఆలస్యం జరుగుతుంది. సమాచారాన్ని దాచిపెట్టినా లేదా తప్పుగా ఇచ్చినా, ఆదాయపు పన్ను చట్టం కింద జైలు శిక్ష కూడా విధించవచ్చు. తీవ్రమైన కేసులలో 3 నెలల నుండి 2 సంవత్సరాల వరకు శిక్ష విధించడానికి అవకాశం ఉంది.