Income Tax : పెరిగిన సంపాదన.. తగ్గిన పన్ను భారం.. 2026లో మారనున్న సేవింగ్స్ లెక్కలు

Income Tax : 2025 ఏడాది ఆదాయపు పన్ను చెల్లింపుదారులకు అనేక కీలక మార్పులను మోసుకొచ్చింది. ట్యాక్స్ సిస్టమ్‎ను సరళతరం చేయడం, పారదర్శకతను పెంచడం, నిజాయితీగా పన్ను కట్టే వారికి ఊరటనివ్వడమే లక్ష్యంగా కేంద్ర ప్రభుత్వం పలు నిర్ణయాలు తీసుకుంది. ఇప్పుడు 2026 ప్రారంభంలో ఉన్నాం కాబట్టి, గడిచిన ఏడాదిలో మారిన నిబంధనలు మన సంపాదన మరియు పొదుపుపై ఎలాంటి ప్రభావం చూపుతాయో క్లియర్ కట్‌గా తెలుసుకోవడం చాలా ముఖ్యం.

2025 బడ్జెట్‌లో కేంద్ర ప్రభుత్వం తీసుకున్న అతిపెద్ద నిర్ణయం ట్యాక్స్ ఫ్రీ ఆదాయ పరిమితిని పెంచడం. కొత్త పన్ను విధానం కింద పన్ను రాయితీలను పెంచడం వల్ల, ఇప్పుడు గణనీయమైన జీతం తీసుకునే వారు కూడా ఒక్క రూపాయి పన్ను కట్టాల్సిన అవసరం లేకుండా పోయింది. స్టాండర్డ్ డిడక్షన్ ప్రయోజనం కూడా తోడవ్వడంతో మధ్యతరగతి మరియు ఉద్యోగస్థులకు ఇది నేరుగా లాభం చేకూర్చింది. దీనివల్ల చేతికి వచ్చే నికర ఆదాయం పెరిగి, సామాన్యుడికి పొదుపు చేసుకునే అవకాశం చిక్కింది.

రిటర్న్‌లు దాఖలు చేసే ప్రక్రియను ప్రభుత్వం మరింత సులభతరం చేసింది. 2025లో ఐటీఆర్ ఫైలింగ్ పోర్టల్‌ను ఆధునీకరించడమే కాకుండా, తప్పులను సరిదిద్దుకోవడానికి ఆన్‌లైన్ రెక్టిఫికేషన్ సదుపాయాన్ని మెరుగుపరిచారు. దీనివల్ల పన్ను చెల్లింపుదారులు ఆదాయపు పన్ను కార్యాలయాల చుట్టూ తిరగాల్సిన అవసరం తప్పింది. డెడ్‌లైన్లను కూడా సమయానుకూలంగా పొడిగించడం ద్వారా, ట్యాక్స్ పేయర్స్ ఎక్కడా టెన్షన్ పడకుండా తమ లెక్కలను పక్కాగా సమర్పించే వీలు కలిగింది.

చిన్న పన్ను చెల్లింపుదారులు, సీనియర్ సిటిజన్ల కోసం 2025 అనేక తీపి కబుర్లను అందించింది. బ్యాంకు వడ్డీలు, అద్దెలు, కొన్ని రకాల చెల్లింపులపై టీడీఎస్ పరిమితిని ప్రభుత్వం పెంచింది. దీనివల్ల మాటిమాటికీ ట్యాక్స్ కట్ అవ్వడం, మళ్ళీ రీఫండ్ కోసం వేచి చూడటం వంటి తలనొప్పులు తగ్గాయి. ముఖ్యంగా పెన్షన్ దారులు, చిన్న వ్యాపారస్తులకు నగదు లభ్యత పెరిగింది.

వ్యాపార సంస్థలు, ఎల్‌ఎల్‌పీలలో భాగస్వాములకు ఇచ్చే జీతాలు, బోనస్‌లు, కమిషన్ లేదా వడ్డీపై కొత్త టీడీఎస్ నిబంధనలను ప్రవేశపెట్టారు. దీనివల్ల ట్యాక్స్ సిస్టమ్‌లో మరింత పారదర్శకత రానుంది. మొదట్లో ఇది కొంత భారంగా అనిపించినా, దీర్ఘకాలంలో పన్ను ఎగవేతలను అరికట్టడానికి, నమ్మకమైన వ్యవస్థను నిర్మించడానికి ఇది సహాయపడుతుందని ఆర్థిక నిపుణులు విశ్లేషిస్తున్నారు.

ఒకవేళ మీరు గతంలో ఐటీఆర్ ఫైల్ చేసేటప్పుడు ఏదైనా ఆదాయాన్ని చూపించడం మర్చిపోయినా లేదా పొరపాటు చేసినా, ఇప్పుడు భయపడాల్సిన అవసరం లేదు. అప్‌డేటెడ్ రిటర్న్ ఫైల్ చేయడానికి ప్రభుత్వం కాలపరిమితిని పెంచింది. దీనివల్ల పన్ను నోటీసులు వచ్చే వరకు వేచి చూడకుండా, స్వచ్ఛందంగా తప్పును సరిదిద్దుకుని పన్ను చెల్లించవచ్చు. ఇది పన్ను వివాదాలను తగ్గించడమే కాకుండా, పౌరుల్లో పన్ను బాధ్యతను పెంచుతోంది.