Foreign Currency : భారత ఆర్థిక వ్యవస్థకు షాక్.. వరుసగా రెండో వారం తగ్గిన విదేశీ మారక నిల్వలు.. 7.5 బిలియన్ డాలర్లు మాయం

Foreign Currency : భారతదేశ విదేశీ మారక నిల్వల పరంగా కేంద్ర ప్రభుత్వానికి, ఆర్థిక నిపుణులకు కొంత ఆందోళన కలిగించే వార్త బయటకు వచ్చింది. దేశీయ ఫారెక్స్ మార్కెట్లో భారత విదేశీ మారక నిల్వలు వరుసగా రెండో వారంలోనూ భారీ పతనాన్ని నమోదు చేశాయి. ఆర్బీఐ విడుదల చేసిన తాజా అధికారిక గణాంకాల ప్రకారం.. మే 22, 2026తో ముగిసిన వారానికి గాను దేశ ఫారెక్స్ నిల్వలు ఏకంగా 7.51 బిలియన్ డాలర్లు (సుమారు 751 కోట్ల డాలర్లు) కుప్పకూలి.. 681.38 బిలియన్ డాలర్ల స్థాయికి పడిపోయాయి. అంతకుముందు వారంలో కూడా ఈ నిల్వలు ఏకంగా 8.09 బిలియన్ డాలర్లు మేర క్షీణించడం గమనార్హం. గ్లోబల్ మార్కెట్లో డాలర్ విపరీతంగా బలోపేతం కావడం, బంగారం ధరల్లో తీవ్ర హెచ్చుతగ్గులు రావడమే ఈ భారీ క్షీణతకు ప్రధాన కారణాలుగా ఆర్థిక విశ్లేషకులు భావిస్తున్నారు.

భారత ఫారెక్స్ నిల్వలు ఈ స్థాయిలో పడిపోవడానికి ప్రధాన కారణం ఫారిన్ కరెన్సీ అసెట్స్ లో వచ్చిన భారీ తగ్గుదలేనని ఆర్బీఐ నివేదిక స్పష్టం చేసింది. విదేశీ మారక నిల్వలలో అతిపెద్ద భాగం ఈ ఎఫ్‌సీఏ మాత్రమే. ఇందులో అమెరికన్ డాలర్లతో పాటు యూరో, పౌండ్, యెన్ వంటి అంతర్జాతీయ బలమైన కరెన్సీల రూపంలో ఆస్తులు ఉంటాయి. తాజా సమీక్షా వారంలో ఈ ఫారిన్ కరెన్సీ అసెట్స్ విలువ ఏకంగా 6.48 బిలియన్ డాలర్లు తగ్గి.. 545.90 బిలియన్ డాలర్లకు పరిమితమైంది. అంతర్జాతీయ మార్కెట్లో డాలర్ ఇండెక్స్ పుంజుకోవడం, అలాగే డాలర్‌తో పోలిస్తే రూపాయి విలువ పడిపోకుండా కాపాడేందుకు ఆర్బీఐ మార్కెట్లో డాలర్లను విక్రయించడం వల్లే ఈ నిల్వలు తగ్గినట్లు తెలుస్తోంది.

మరోవైపు దేశంలోని బంగారం నిల్వలు కూడా ఈ వారంలో భారీగా క్షీణించడం గమనార్హం. ఆర్బీఐ లెక్కల ప్రకారం.. మే 22తో ముగిసిన వారంలో భారత గోల్డ్ రిజర్వ్ విలువ 4.53 బిలియన్ డాలర్లు తగ్గి.. 114.78 బిలియన్ డాలర్ల వద్దకు చేరింది. అంతర్జాతీయ మార్కెట్లో బంగారం ధరలలో వచ్చిన భారీ మార్పులు, వాల్యుయేషన్ వ్యత్యాసాల వల్లే మన దగ్గర ఉన్న బంగారం మొత్తం విలువ తగ్గింది. దేశ ఆర్థిక భద్రత కోసం భారతదేశం నిరంతరం టన్నుల కొద్దీ బంగారాన్ని కొనుగోలు చేస్తూ తన రిజర్వులను బలోపేతం చేస్తున్నప్పటికీ.. అంతర్జాతీయ మార్కెట్ హెచ్చుతగ్గుల ప్రభావం దీనిపై నేరుగా పడింది.

కేవలం ఎఫ్‌సీఏ, గోల్డ్ మాత్రమే కాకుండా విదేశీ నిల్వలలోని మిగిలిన ఇతర విభాగాలు కూడా ఈ వారం స్వల్ప నష్టాలను చవిచూశాయి. అంతర్జాతీయ ద్రవ్య నిధి వద్ద ఉండే ప్రత్యేక డ్రాయింగ్ హక్కులు లేదా స్పెషల్ డ్రాయింగ్ రైట్స్ 77 మిలియన్ డాలర్లు తగ్గి.. 18.74 బిలియన్ డాలర్లకు చేరుకున్నాయి. అదేవిధంగా ఐఎంఎఫ్ వద్ద ఉన్న భారతదేశ రిజర్వ్ పొజిషన్ కూడా 33 మిలియన్ డాలర్లు తగ్గి.. 4.81 బిలియన్ డాలర్ల వద్ద స్థిరపడింది. మిగిలిన రెండు విభాగాలతో పోలిస్తే ఐఎంఎఫ్, ఎస్డీఆర్ లలో క్షీణత చాలా తక్కువగా ఉన్నప్పటికీ.. ఓవరాల్ ఫారెక్స్ నిల్వల పతనానికి ఇవి కూడా తోడయ్యాయి.

ఏదైనా ఒక దేశం ఆర్థిక పటిష్టతను, గ్లోబల్ మార్కెట్ క్రెడిబిలిటీని అంచనా వేయడానికి ఈ విదేశీ మారక నిల్వలే ప్రధాన కొలమానం. మనం విదేశాల నుంచి దిగుమతి చేసుకునే వస్తువులకు (ముఖ్యంగా ముడి చమురు, ఎలక్ట్రానిక్స్) చెల్లింపులు చేయాలన్నా, అంతర్జాతీయ అప్పులు తీర్చాలన్నా ఈ నిల్వలు ఎంతో అవసరం. అంతేకాకుండా అంతర్జాతీయ మార్కెట్లో మన రూపాయి విలువ తీవ్రంగా పడిపోకుండా స్థిరంగా ఉంచడానికి ఆర్‌బీఐ ఈ నిల్వలను ఒక రక్షణ కవచంలా వాడుతుంది. ప్రస్తుతం మన నిల్వలు తగ్గినప్పటికీ.. భారతదేశం ఇంకా సురక్షితమైన జోన్ లోనే ఉందని, ఎలాంటి ఆర్థిక సంక్షోభాన్ని అయినా తట్టుకునే సామర్థ్యం భారత్‌కు ఉందని నిపుణులు చెప్తున్నారు.