Defense Deal : చైనా, పాకిస్థాన్లకు చెక్..సముద్రంలో ఇండియా విశ్వరూపం..జర్మనీతో చేతులు కలిపిన భారత్
సముద్రంలో ఇండియా విశ్వరూపం..జర్మనీతో చేతులు కలిపిన భారత్
Defense Deal : భారత రక్షణ రంగ చరిత్రలో మరో సువర్ణ అధ్యాయం లిఖించబడబోతోంది. శత్రువుల గుండెల్లో వణుకు పుట్టించేలా, సముద్ర గర్భంలో భారత్ను తిరుగులేని శక్తిగా మార్చేందుకు జర్మనీతో భారీ రక్షణ ఒప్పందానికి రంగం సిద్ధమైంది. సుమారు 8 బిలియన్ డాలర్ల (దాదాపు రూ.67 వేల కోట్లు) విలువైన జలాంతర్గాముల తయారీ ఒప్పందంపై భారత్ సంతకం చేయనుంది. ఇది కేవలం కొనుగోలు ఒప్పందం మాత్రమే కాదు, అత్యాధునిక జర్మన్ టెక్నాలజీని భారత్కు బదిలీ చేసే ఒక చారిత్రాత్మక ఘట్టం.
జర్మనీ ఛాన్సలర్ ఫ్రెడరిక్ మర్జ్ వచ్చే వారం భారత్లో పర్యటించనున్నారు. ఈ పర్యటనలో భాగంగా ప్రధాని నరేంద్ర మోదీతో ఆయన జరిపే చర్చల్లో ఈ భారీ జలాంతర్గాముల డీల్ ప్రధానాంశంగా ఉండబోతోంది. ప్రస్తుతం భారత నావికాదళం వద్ద పాత రష్యన్ జలాంతర్గాములు, కొన్ని ఫ్రెంచ్ జలాంతర్గాములు ఉన్నాయి. హిందూ మహాసముద్రంలో చైనా తన ప్రాబల్యాన్ని పెంచుకుంటున్న తరుణంలో మన రక్షణ వ్యవస్థను మరింత పటిష్టం చేసేందుకు ఈ కొత్త ప్రాజెక్ట్ అత్యంత కీలకం కానుంది.
ఈ ఒప్పందం ప్రకారం జర్మనీకి చెందిన థైసెన్క్రుప్ మెరైన్ సిస్టమ్స్, భారత ప్రభుత్వ రంగ సంస్థ మజగావ్ డాక్ షిప్బిల్డర్స్ కలిసి ఈ జలాంతర్గాములను నిర్మిస్తాయి. దీనివల్ల తొలిసారిగా జర్మనీ తన అడ్వాన్సుడ్ టెక్నాలజీని భారత్కు అందించనుంది. ఈ కొత్త జలాంతర్గాముల్లో ఎయిర్-ఇండిపెండెంట్ ప్రొపల్షన్ సిస్టమ్ ఉంటుంది. దీనివల్ల ఇవి సాధారణ డీజిల్-ఎలక్ట్రిక్ జలాంతర్గాముల కంటే ఎక్కువ కాలం పాటు నీటి అడుగున ఉండి శత్రువుల కంట పడకుండా నిఘా పెట్టగలవు.
ఛాన్సలర్ ఫ్రెడరిక్ మర్జ్ తన పర్యటనను గుజరాత్లో ప్రారంభిస్తారు, అక్కడ ప్రధాని మోదీతో భేటీ అవుతారు. ఆ తర్వాత బెంగళూరులోని జర్మన్ కంపెనీలను సందర్శిస్తారు. రక్షణ రంగంతో పాటు ఫార్మా, క్లీన్ ఎనర్జీ, ఫ్రీ-ట్రేడ్ అగ్రిమెంట్ వంటి విషయాలపై కూడా ఇరు దేశాల మధ్య కీలక చర్చలు జరగనున్నాయి. ఈ ఒప్పందం కుదిరితే గతంలో ఫ్రాన్స్ నుంచి మరో మూడు జలాంతర్గాములు కొనాలనుకున్న ప్లాన్ను భారత్ పక్కన పెట్టే అవకాశం ఉంది.
గత కొన్నేళ్లుగా విదేశీ యుద్ధ విమానాలు, హెలికాప్టర్లు, క్షిపణుల దిగుమతులపై భారత్ ఆంక్షలు విధిస్తూ వాటిని స్వదేశంలోనే తయారు చేసేలా విదేశీ కంపెనీలను ప్రోత్సహిస్తోంది. ఈ జర్మనీ డీల్ కూడా అదే బాటలో సాగుతోంది. టెక్నాలజీ మన దేశానికి రావడం వల్ల భవిష్యత్తులో మనమే సొంతంగా అత్యాధునిక జలాంతర్గాములను తయారు చేసుకునే స్థాయికి చేరుకోవచ్చు. ఇది హిందూ మహాసముద్ర ప్రాంతంలో భారత్ ఆధిపత్యాన్ని మరింత సుస్థిరం చేస్తుంది.
