PM Modi Israel Visit : మోదీ ఇజ్రాయెల్ పర్యటన సక్సెస్..ఏకంగా 27 ఒప్పందాలతో భారత్కు బంపర్ ఆఫర్స్
ఏకంగా 27 ఒప్పందాలతో భారత్కు బంపర్ ఆఫర్స్
PM Modi Israel Visit : ప్రధాని నరేంద్ర మోదీ ఇజ్రాయెల్ పర్యటన కేవలం పలకరింపులకే పరిమితం కాలేదు. ఇది రెండు దేశాల మధ్య ఒక నూతన శకాన్ని ఆవిష్కరించింది. గురువారం ముగిసిన ఈ రెండు రోజుల పర్యటనలో భారత్, ఇజ్రాయెల్ మధ్య ఏకంగా 27 కీలక ఒప్పందాలు కుదిరాయి. ఇందులో 17 అవగాహన ఒప్పందాలు కాగా, 10 వ్యూహాత్మక ప్రకటనలు ఉన్నాయి. సైన్స్, టెక్నాలజీ నుంచి వ్యవసాయం వరకు, డిజిటల్ పేమెంట్స్ నుంచి సైబర్ సెక్యూరిటీ వరకు దాదాపు అన్ని రంగాల్లోనూ ఇరు దేశాలు చేతులు కలిపాయి. మన ప్రధాని మోదీ, ఇజ్రాయెల్ ప్రధాని నెతన్యాహు ఈ భేటీని ప్రత్యేక వ్యూహాత్మక భాగస్వామ్యంగా అభివర్ణించారు.
డిజిటల్ విప్లవంలో భాగంగా భారత యూపీఐ ఇప్పుడు ఇజ్రాయెల్లోనూ తన సత్తా చాటబోతోంది. ఎన్పీసీఐ ఇంటర్నేషనల్, ఇజ్రాయెల్ మాసావ్ మధ్య జరిగిన ఒప్పందం వల్ల దేశాల మధ్య నగదు బదిలీ చాలా సులభతరం కానుంది. ఇక వ్యవసాయ రంగంలో విప్లవాత్మక మార్పుల కోసం ఇండియా-ఇజ్రాయెల్ ఇన్నోవేషన్ సెంటర్ ఫర్ అగ్రికల్చర్ ఏర్పాటు కానుంది. ఇది శాటిలైట్ ఆధారిత నీటి పారుదల, డ్రోన్ల వినియోగం వంటి అత్యాధునిక సాంకేతికతను మన రైతులకు అందుబాటులోకి తెస్తుంది. సముద్రపు ఆహారం, చేపల పెంపకంలో కూడా అధునాతన ఇజ్రాయెల్ టెక్నాలజీని భారత్ వాడుకోనుంది.
టెక్నాలజీ, విద్యారంగంలో ఆర్టిఫిషియల్ ఇంటెలిజెన్స్ పాత్రను పెంచాలని రెండు దేశాలు నిర్ణయించుకున్నాయి. పాఠశాలల్లో విద్యార్థుల అభ్యసన సామర్థ్యాన్ని పెంచడానికి, ఉపాధ్యాయుల నైపుణ్యాలను మెరుగుపరచడానికి ఏఐని వినియోగించనున్నారు. అలాగే, ప్రఖ్యాత నలంద యూనివర్సిటీ మరియు జెరూసలేం హిబ్రూ యూనివర్సిటీ మధ్య కుదిరిన ఒప్పందం వల్ల విద్యార్థులు, అధ్యాపకుల మార్పిడి జరుగుతుంది. సైబర్ దాడులను ఎదుర్కోవడానికి భారత్లో ఇండో-ఇజ్రాయెల్ సైబర్ సెంటర్ ఆఫ్ ఎక్సలెన్స్ ఏర్పాటు చేయనుండటం ఒక గొప్ప పరిణామం. ఇది మన డిజిటల్ భద్రతను మరింత పటిష్టం చేస్తుంది.
మరో ముఖ్యమైన విషయం ఏమిటంటే, రాబోయే ఐదేళ్లలో దాదాపు 50,000 మంది భారతీయ కార్మికులకు ఇజ్రాయెల్లో పని చేసే అవకాశం లభించనుంది. దీని కోసం ప్రత్యేక కోటాను కేటాయించారు. గుజరాత్లోని లోథల్లో నిర్మిస్తున్న నేషనల్ మారిటైమ్ హెరిటేజ్ కాంప్లెక్స్ అభివృద్ధిలో కూడా ఇజ్రాయెల్ తన సహకారాన్ని అందిస్తుంది. సాంస్కృతిక సంబంధాలను బలోపేతం చేసేందుకు 2026 నుంచి 2029 వరకు మ్యూజిక్, డాన్స్, థియేటర్ రంగాల్లో ఎక్స్ఛేంజ్ ప్రోగ్రామ్స్ నిర్వహించనున్నారు. మొత్తానికి మోదీ పర్యటనతో భారత్-ఇజ్రాయెల్ బంధం ఆకాశమే హద్దుగా దూసుకుపోతోంది.
