India-New Zealand FTA : భారత యువతకు న్యూజిలాండ్ బంపర్ ఆఫర్..ఇక చదువుతో పాటు సంపాదన కూడా

India-New Zealand FTA : భారత్, న్యూజిలాండ్ మధ్య కుదిరిన చారిత్రాత్మక స్వేచ్ఛా వాణిజ్య ఒప్పందం (FTA) భారతీయ యువతకు, నిపుణులకు, విద్యార్థులకు వరంగా మారబోతోంది. దాదాపు పదేళ్ల నిరీక్షణ తర్వాత కుదిరిన ఈ ఒప్పందం కేవలం ఎగుమతులు, దిగుమతులకే పరిమితం కాకుండా.. ఉద్యోగ, ఉపాధి అవకాశాలలో కొత్త ద్వారాలను తెరిచింది. ఈ ఒప్పందంలో భారతీయ యువతను ఆకర్షిస్తున్న ప్రధాన అంశం వర్కింగ్ హాలిడే వీసా. ఈ పథకం కింద 18 నుండి 30 ఏళ్ల లోపు వయస్సు ఉన్న భారతీయ యువకులు ప్రతి ఏటా న్యూజిలాండ్‌కు వెళ్లవచ్చు. అక్కడ 12 నెలల పాటు పర్యటిస్తూనే, చట్టబద్ధంగా పార్ట్ టైమ్ ఉద్యోగాలు చేసుకునే వెసులుబాటు కల్పించారు. దీనివల్ల ప్రయాణ ఖర్చుల కోసం ఇంటి నుంచి డబ్బు ఆశించకుండా, అక్కడే సంపాదించుకుంటూ ఆ దేశాన్ని చుట్టేయవచ్చు. యువతకు అంతర్జాతీయ అనుభవాన్ని అందించడానికి ఇది ఒక అద్భుతమైన అవకాశం.

ఐటీ, ఇంజనీరింగ్ వంటి సంప్రదాయ రంగాలకే కాకుండా, భారతీయ సంస్కృతికి సంబంధించిన వృత్తులకు కూడా న్యూజిలాండ్ పెద్దపీట వేసింది. కొత్తగా ప్రవేశపెట్టిన టెంపరరీ వర్క్ వీసా ద్వారా సుమారు 5000 మంది భారతీయ నిపుణులు ఒకేసారి మూడేళ్ల పాటు అక్కడ పనిచేసే అవకాశం ఉంటుంది. ఇందులో విశేషం ఏమిటంటే.. ఐటీ నిపుణులతో పాటు యోగా శిక్షకులు, ఆయుష్ వైద్యులు, భారతీయ వంటకాలు చేసే షెఫ్‌లు, సంగీత ఉపాధ్యాయులకు కూడా ప్రత్యేకంగా వీసాలు కేటాయించారు. దీనివల్ల భారతీయ నైపుణ్యానికి అంతర్జాతీయ వేదిక లభించినట్లయింది.

న్యూజిలాండ్ చరిత్రలో మొదటిసారిగా ఒక దేశంతో విద్యా సంబంధిత ప్రత్యేక ఒప్పందం చేసుకుంది, అది మన భారతదేశంతోనే. ఇకపై న్యూజిలాండ్‌కు వెళ్లే భారతీయ విద్యార్థుల సంఖ్యపై ఎలాంటి పరిమితులు ఉండవు. చదువుకునే సమయంలోనే వారానికి 20 గంటల పాటు పని చేసుకునే వీలుంటుంది. చదువు పూర్తయిన తర్వాత ఇచ్చే పోస్ట్-స్టడీ వర్క్ వీసాలో కూడా కీలక మార్పులు చేశారు. సైన్స్, టెక్నాలజీ కోర్సులు చేసిన వారికి 3 ఏళ్లు, పీహెచ్‌డీ చేసిన వారికి ఏకంగా 4 ఏళ్ల పాటు అక్కడ ఉండి ఉద్యోగం చేసుకునే అవకాశం లభిస్తుంది.

ఈ ఒప్పందం కేవలం రెండు దేశాల మధ్య వ్యాపారాన్ని పెంచడమే కాకుండా, వేలాది మంది భారతీయ విద్యార్థుల, నిపుణుల కెరీర్‌కు గట్టి పునాది వేయనుంది. 2025 మార్చిలో చర్చలు మొదలైన అతి తక్కువ కాలంలోనే ఈ స్థాయి ఒప్పందం కుదరడం భారత్ దౌత్య నీతికి నిదర్శనం. రాబోయే రోజుల్లో న్యూజిలాండ్ వెళ్లాలనుకునే తెలుగు విద్యార్థులకు, వృత్తి నిపుణులకు ఈ నిబంధనలు ఎంతో మేలు చేయనున్నాయి. దీనివల్ల రెండు దేశాల మధ్య ఆర్థిక సంబంధాలతో పాటు సాంస్కృతిక బంధం కూడా మరింత బలోపేతం కానుంది.